Додгоҳи олии толибон* эълон кард, ки дар вилояти Ҷурҷон (шимоли Афғонистон) ҳукми қатли як нафареро, ки ба одамкушӣ мутаҳам мешуд, ба иҷро даровардааст.

Дар ин бора бахши форсии BBC хабар додааст.

Ба иттилои манбаъ ин саввумин нафарест, ки дар як ҳафтаи охир аз ҷониби толибон* бо ҳукми қатл эъдом мешавад.

Дар баёнияи додгоҳи олии толибон* омадааст, ки нафари эъдомшуда Назармуҳамад буда, сокини шаҳри Шибирғони ин вилоят аст. Ӯ бо гумони куштори нафаре бо номи Холмуҳаммад дастгир шуда буд.

Ҳукми Назармуҳаммад дар варзишгоҳи марказии шаҳри Шибирғон бо иштироки васеи мардуми маҳаллӣ иҷро шудааст. Дар иҷрои ин гуна “ҳукмҳо” толибон* мардумро даъват мекунанд, ки дар ҷои иҷрои ҳукм ҷамъ шаванд ва дар ҳузури ом маҳкумонро ба қатл мерасонанд.

Чи гунае, ки BBC менависад, “дар баёнияи додгоҳи олии толибон* таъкид шудааст, ки ҳукми эъдоми ин фард пас аз баррасӣ ва таъйид дар додгоҳи сегонаи толибон* ва дар мувофиқа бо Ҳайбатулло Охунзода, раҳбари феълии толибон* иҷро шудааст”.

Аммо мунтақидони сохти давлатдории толибон* пайваста таъкид мекунанд, ки муҳокимаҳои толибон* пайваста бидуни вакили мудофеъ, додситон ва додани ҳаққи дифоъ маҳкумшавандаҳо баргузор мегардад ва чигунагии баррасии парвандаҳо шаффоф нест.

Ёдовар мешавем, ки гурӯҳи толибон* пас аз зимоми қудратро ба даст гирифтан дар августи соли 2021 ҳукми қатл ва шаллоқзаниро дар ин кишвар дигарбора “зинда” карданд, ки ҷомеаи ҷаҳонӣ барои ин амал пайваста аз ин гурӯҳ интиқод мекунад.

*Толибон - гурӯҳи мамнуъ дар Тоҷикистон