Муассисаи давлатии “Телевизиони Сафина” дар баробари таҳияи барномаҳои фарҳангӣ ва фароғатӣ як қатор филмҳои истеҳсолии худро низ пешкаши тамошобинон гардонидааст.

Дар ин бора 10 феврал Носир Саидов, директори “Телевизиони Сафина” зимни нишасти хабарӣ ба рӯзноманигорон иттилоъ дод.

Зикр гардид, ки яке аз дастовардҳои телевизиони мазкур дар соли 2020 дар 8-умин Намоиши байналмилалии кинои кӯтоҳмуддати Осиё дар Чин соҳиби ҷоизаи “Golden Begonia Award” гардидани филми “Ношунаво”-и коргардони ҷавони шабака Усмон Юсуфов мебошад.

Инчунин гуфта шуд, ки ҳамкориҳо бо телевизионҳои хориҷа низ густариш ёфта, дар давоми соли 2020 дар ҳамкорӣ бо гурӯҳи эҷодии Телевизиони давлатии KBS-и Корея филми илмию иттилоотӣ оид ба ҳайвоноти нодир ва табиати нотакрори Тоҷикистон наворбардорӣ гардида, тариқи телевизиони Корея намоиш дода шуд ва миллионҳо нафарро ба мавзеъҳои сайёҳӣ ва табиати кишварамон ошно сохт.

Исфандиёр АМАКҶОНОВ, “ҶТ”