Имрӯз таҳти роҳбарии Олуфта Бодурӣ, мушовири бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа як гурӯҳи таблиғотиву ташвиқотӣ ҷиҳати вохӯрӣ бо кормандони НБО Роғун ба шаҳри Роғун рафтанд.

Дар ҳайати гурӯҳ аз ҷумла Дилноза Аҳмадзода, муовини раиси Кумитаи ҷавонон, варзиш ва сайёҳӣ, Зоҳир Ҳабибзода, мудири шуъбаи дастгоҳи КИМ ҲХДТ, Бахтовар Каримов, сармуҳаррири рӯзномаи “Ҷавонони Тоҷикистон”, Муҳиба Маҳмадҷонова, мудири шуъбаи Институти фалсафа, сиёсатшиносӣ ва ҳуқуқи ба номи Алоуддин Баҳоваддинови Академияи илмҳои ҷумҳурӣ, муовини раиси ИНТ Юнус Юсуфӣ, шоир Хайрандеш шомил буданд.

Олуфта Бодурӣ зимни вохӯрӣ бо кормандони НБО Роғун иброз дошт, ки НБО Роғун орзуву ормони миллату давлати Тоҷикистон аст. “Ҳар як бинокори иншооти тақдирсоз бояд хуб эҳсос намояд, ки неругоҳи Роғун ба тамоми соҳаҳои ҳаётан муҳими халқи тоҷик тағйироти ҷиддӣ ворид хоҳад сохт. – таъкид дошт мушовири бахши Ёрдамчии Президент. - Неругоҳи Роғун асрҳо ба мардуми Тоҷикистон ва минтақа хизмат хоҳад кард. Ҳамин аст, ки имрӯз давлату миллати тоҷик аз он умеди калон дошта, аз бинокорон танҳо бо сифати баланд ба истифода додани ин иншооти азими асрро хоҳонанд”.

Баъд аз суҳбату вохӯрии гурӯҳи таблиғотиву ташвиқотӣ бо ҳайати кормандони НБО Роғун бо иштироки ҳунармандон ва сарояндагони Филармонияи давлатии Тоҷикистон, Муассисаи давлатии ансамбли сафарию ҳунарии “Базморо”, гурӯҳи ҳунарии “Гулшан”, гурӯҳи рақсии “Зебо” ва гурӯҳи ҳаҷвнигорони “Шакарханд” маҳфили адабиву фарҳангӣ доир гашт.

Чунин маҳфилҳо бо ҳайати кормандони НБО Роғун то охири моҳи апрел ҳафтае ду маротиба баргузор мешаванд.