МУАЛЛИФ: ШЕРАЛӢ АЗИМӢ

17 феврал дар КВД “Маркази фарҳангии ҷумҳуриявии ҷавонон “Ориёно” бо мақсади иҷрои дастуру супоришҳои дар Паёми Президенти мамлакат, муҳтарам Эмомалӣ Раҳмон ба Маҷлиси Олии кишвар додашуда вобаста ба рушди ҳунарҳои мардумӣ, касбомӯзӣ ва ба ҷойи кор таъмин намудани шаҳрвандон дар доираи нақшаи чорабиниҳои Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон дар ҳамкорӣ бо Вазорати меҳнат, муҳоҷират ва шуғли аҳолии кишвар бахшида ба “Соли ҷавонон” ярмаркаи соҳавии ҷойҳои кории холӣ баргузор шуд.



Дар ярмарка 80 муассиса ва ташкилотҳои шаҳри Душанбе иштирок намуда, ба корҷӯён 2127 ҷойи кор пешниҳод намуданд. Аз 1010 нафар иштирокчӣ 104 нафар ба кор роҳхат гирифта, 28 нафар ба марказҳои омӯзиши касбу ҳунар фиристода шуданд. Ба 326 нафар, ки азми сафар ба муҳоҷирати меҳнатӣ ба хориҷи кишвар доранд, маслиҳатҳо дода шуд.

Аз ҷониби КВД “Биржаи меҳнатии ҷавонон” ба корҷуёне, ки ба муҳоҷирати корӣ майл доранд, 210 ҷойи кори холӣ пешниҳод гардида, ба 45 нафар шаҳрванд, ки хоҳиши ба Федератсияи Руссия ба кор рафтан доранд, роҳхат дода шуд.

Мунтазам баргузор кардани чунин ярмаркаҳо дар нақшаи солонаи кории Корхонаи воҳиди давлатии “Биржаи меҳнатии ҷавонон” дарҷ гардидааст, ки ба ин васила ниёзи ҷавононро ба шуғл ва бозомузӣ таъмин кардан имкон дорад.

Боиси зикр аст, ки чунин ярмаркаҳо дар тамоми шаҳру ноҳияи кишвар дар ин рӯз баргузор карда шуд.