7-уми октябр дар Мактаби махсуси варзишӣ оид ба намудҳои камонварии вилояти Суғд маросими қадршиносии ғолибони мусобиқаи байналмилалӣ оид ба камонварӣ барои дарёфти “Ҷоми Президенти Ҷумҳурии Тоҷикистон” доир шуд.

Дар ин бора Раёсати кор бо ҷавонон ва варзиши вилояти Суғд хабар медиҳад.

Бино ба иттилои манбаъ, мусобиқаи мазкур дар асоси нақшаи чорабиниҳои Федератсияи камонварии Тоҷикистон, Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва мусоидати Мақомоти иҷроияи ҳокимияти давлатии вилояти Суғд бахшида ба Рӯзи Конститутсия ва Рӯзи Президенти Ҷумҳурии Тоҷикистон рӯзҳои 4-7 октябр баргузор шуда, дар он беш аз 100 варзишгар ва мураббӣ иштирок карданд.

Раҷаббой Аҳмадзода, раиси вилояти Суғд, раиси Федератсияи камонварии Тоҷикистон зимни иштирок дар чорабинии варзишӣ иштирокчиёни он -котиби генералии Федератсияи ҷаҳонӣ оид ба камонварӣ Том Дилен, намояндагони Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва варзишгаронро, ки аз ҷумҳуриҳои Узбекистон, Қазоқистон, Туркманистон, Қирғизистон, Озарбойҷон, Гурҷистон, Судон, Ҷумҳурии Исломии Эрон ва Федератсияи Русия дар мусобиқаи мазкур иштирок карданд, хайрамақдам гуфт.

Гуфта шуд, ки бо ҳидоят ва ғамхориҳои пайвастаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз рӯзҳои нахустини истиқлол дар кишвари азизамон - Тоҷикистон ба рушди соҳаи варзиш таваҷҷуҳи хосса зоҳир гардида, ба мустаҳкам намудани базаи моддию техникӣ ва тарғиби тарзи ҳаёти солим дар байни қишрҳои ҷомеа қадамҳои устувор гузошта шуд. Дар ин замина, мақомоти иҷроияи ҳокимияти давлатии вилоят ҷиҳати рушди соҳаи варзиш як силсила қарорҳо ва барномаҳоро қабул ва амалӣ карда, кӯшиш менамояд, ки барои мунтазам инкишоф ёфтани соҳаи варзиш тамоми шароитҳои заруриро фароҳам орад.

Таъкид гардид, дар замони соҳибистиқлолӣ камонварӣ яке аз намудҳои маъмули варзиш ба ҳисоб меравад, ки шумораи дӯстдорони он аз ҳисоби ҷавонону наврасон торафт меафзояд.

Дар охир, ғолибони мусобиқа дар вазъияти тантанавӣ бо медалу мукофотҳои пулӣ ва Ҷом қадрдонӣ шуданд.