Имрӯз, 21 май 10-умин Дави миллӣ баргузор шуд. Дар шаҳри Душанбе 51300 нафар намояндагони синну соли гуногун дар ин чорабинии муҳими варзишӣ иштирок карда, аз дидбонгоҳи Чорбоғ то Наврӯзгоҳ, ки 10 километрро ташкил медиҳад, давиданд.

Иштирокчиёнро Сайфиддин Давлатзода – сардори Раёсати илму маърифати Дастгоҳи иҷроияи Президенти ҷумҳурӣ, Маҳмадсаид Зувайдзода – муовини аввали раиси шаҳри Душанбе ва Аҳтам Абдуллозода – раиси Кумитаи ҷавонон, варзиш ва сайёҳӣ, ҳамзамон муовини Президенти Кумитаи миллии олимпии Ҷумҳурии Тоҷикистон бо 10-солагии Дави миллӣ ва Рӯзи ҷавонони Тоҷикистон шодбош гуфтанд.

Зикр шуд, ки Дави миллӣ 10-ум сол аст, ки бо ташаббуси Пешвои миллат, Президенти ҷумҳурӣ, муҳтарам Эмомалӣ Раҳмон баргузор мешавад. Фармони Президенти Ҷумҳурии Тоҷикистон дар бораи якшанбеи сеюми моҳи майи ҳар сол доир кардани Рӯзи Дави миллӣ 28 марти соли 2007, №225 ба тасвиб расида, аввалин Дави миллӣ бо иштироки Пешвои миллат, муҳтарам Эмомалӣ Раҳмон 20 майи соли 2007 доир гардида буд.