Чемпиони Тоҷикистон - дастаи "Истиқлол"-и Душанбе дар бозии санҷишӣ, ки 10 январ дар варзишгоҳи марказии ҷумҳуриявии Шаҳри Душанбе доир гашт, бар тими КМВА "Помир" бо ҳисоби 4:1 ғалаба кард.

Ин дуюм бозии санҷишии "Истиқлол" дар доираи машғулиятҳои омӯзишиву машқӣ дар Душанбе буд.

Ду голро ҳамлагари русиягӣ Дмитрий Барков, ки барои назорат ба дастаи футболи пойтахт даъват шудааст, ба ҳадаф расонд. Сармураббӣ Муҳсин Муҳаммадиев дар қисми дуюм 11 бозингари навро ба майдон баровард. Дар дақиқаи 73 Александ Кулинитс, ки низ барои назорат дар даста қарор дорад, ҳисобро афзуд - 3:0. 7 дақиқа то охири бозӣ монда буд, ки артишиҳо як гол заданд. Баъд аз ду дақиқа бошад, Ромиш Ҷалилов голи охирини вохӯриро зад - 4:1.

Бозии аввали санҷишии "Истиқлол" бо "Ҳосилот"-и Фархор 27 декабр мусовӣ - 2:2 шуда буд. Бозии навбатии «Истиқлол» 13 январ ба нақша гирифта шудааст.