Таеквондо яке аз варзишҳои маъмул дар кишвар ба ҳисоб рафта, ҷавонону наврасони зиёде барои омӯзиши нозукиҳои он пайваста тамрин мекунанд.

Пас аз соҳибистиқлол гардидани кишвар таэквондо аз нахустин навъҳои варзиш буд, ки соҳиби федератсия гардид. Аз соли 1992, яъне 30 сол боз дар Ҷумҳурии Тоҷикистон Федератсияи таеквондо ВТФ мақоми расмӣ дошта, узви Федератсияи таеквондои ҷаҳонӣ ва Шӯрои осиёии он мебошад.

Ҳамин аст, ки ҳамасола дастпарварони ин риштаи варзиш дар як қатор мусобиқаҳои фароҷумҳурӣ иштирок намуда, хазинаи варзишии кишварро бо унвону ҷоизаҳо ғанӣ мегардонанд. Аммо чӣ гунае, ки ба назар мерасад, солҳои охир машқварзони ин риштаи варзиш аз мусобиқоти ҷаҳонӣ дастовардҳои камтар доранд.

Доир ба ин масъала бо Ҷаҳонзеб Кармишев, раиси Федератсияи таеквондо ВТФ-и кишвар суҳбате оростем, ки фишурдааш пешкаши хонанда мегардад.

- Чаро варзишгарони ин риштаро дар мусобиқаҳои байналмилалӣ нисбати солҳои қаблӣ хеле кам мебинем?

- Бинобар бемории сироятии COVID-19 Федератсия ба як қатор мушкилиҳо мувоҷеҳ шуда буд. Варзишгарону мураббиён бо мақсади баланд бардоштани маҳорати хеш имконияти сафар ба давлатҳои ҳамсояро аз даст доданд. Инчунин бо сабаби баланд шудани нархҳои чипта, буду бош дар давлатҳои мизбон мушкилиҳои зиёде ба амал овард, ки федератсия хароҷотҳои мазкурро партохт карда натавонист.

- Барои Бозиҳои олимпии Париж-2024 чӣ нақша доред?

- Федератсияи таеквондо ВТФ дар якҷоягӣ бо Кумитаи кор бо ҷавонон ва варзиш ва Кумитаи миллии олимпӣ шартномаи сеҷониба бастаанд, то барои Бозиҳои олимпии Париж-2024 ягон мушкилӣ пеш наояд. Ин боис мегардад, ки таеквондочиёни мо ба мусобиқаҳои байналмилалӣ сафарбар шуда, таҷриба, малака ва маҳорати касбии худро баланд бардоранд.
Аз оғози сол сармураббиён тамоми қувва ва диққати хешро барои ба даст овардани натиҷаҳо дар мусобиқаҳои дарпешбуда сафарбар карда истодаанд. Дар соли 2022 мусобиқаҳои бонуфуз пешбинӣ шудаанд, ки аз муҳимтарини онҳо “Бозиҳои ҳамбастагии исломӣ” ва Бозиҳои осиёӣ мебошанд. Умедворем, ки таеквондочиёни мо дар ин мусобиқаҳо натиҷаҳои назаррасро ба даст меоранд.

Айни ҳол таеквондочиёни Тоҷикистон ҷиҳати ба даст овардани роҳхат ба Бозиҳои олимпии Париж-2024 омодагии ҷиддӣ дида истодаанд ва бо боварии комил метавон гуфт, ки 2 роҳхатро ба Бозихои олимпии Париж-2024 таеквондочиёни Тоҷикистон ба даст меоранд.

- Федератсия ба варзишгароне, ки истеъдоди хуб доранду имконияти молиявӣ на, чӣ кумак мекунад?

- Федератсия ба онҳо, пайваста кумак мекунад. Инчунин варзишгароне, ки дастовардҳои назаррасро соҳиб гардидаанд, аз ҷониби Кумитаи кор бо ҷавонон ва варзиш ва Кумитаи миллии олимпӣ бо стипендия (бо маблағи аз 200 то 1200 доллари ИМА) сазовор мегарданд. Аз ҷумла, Ҳалимова Моҳру, Шомаҳмадов Муҳаммадҳасан, Ойматова Муниса бо чунин маблағҳо сарфароз гардонида шудаанд.

- Беҳтарин варзишгарони ин ришта киҳо ҳастанд?

- Дар риштаи таеквондо ВТФ мо варзишгарони беҳтарин зиёд дорем, ки онҳо дар мусобиқаҳои байналмилалӣ сазовори ҷойҳои намоён гаштаанд. Аз ҷумла: Гулов Алишер-иштирокчии Бозиҳои олимпии Лондон-2012, Негматов Фарҳод-иштирокчии Бозиҳои олимпии Лондон-2012, Шарипова Шукрона-ҷоизадори Бозиҳои олимпӣ байни наврасон Сингапур-2010, Раҷабов Шокирҷон-ҷоизадори Бозиҳои Осиё, Доха-2006, Ҳалимова Моҳру-ҷоизадори Бозиҳои Осиё, Инчонг-2014, Негматов Манучеҳр-ҷоизадори Бозиҳои Осиё, Ашхобод-2017, Ворисов Насхиддин-ҷоизадори Бозиҳои исломӣ.

- Федератсияи таеквандо ВТФ-и Тоҷикистон имрӯз ба чӣ эхтиёҷ дорад?

- Федератсия ба сарпараст эҳтиёҷ дорад. Агар сарпарастон зиёд бошанд, мо зиёдтар дар мусобиқаҳои байналмилалӣ иштирок мекунем. Чунки федератсия дар танҳоӣ наметавонад, варзишгаронашро ҳамаҷиҳата дастгирӣ намояд.

- Федератсия дар оянда чӣ нақшаҳо дорад?

- Мо дар оянда нақшаҳои зиёд дорем. Аз ҷумла, нақша дорем, ки дар шаҳру ноҳияҳо сатҳи касбии мураббиёнро баланд намоем, дар Коллеҷ ва интернати тарбияи ҷисмонӣ ихтисоси таеквондо таъсис диҳем, доварони дараҷаи байналмилалиро дар кишвар зиёд намоем. Инчунин клубҳои таеквондо дар ноҳияҳои сарҳадиро зиёд гардонем.