10 феврал дар студияи ТВ “Варзиш” маросими қуръакашии тақвими Чемпионати Тоҷикистон миёни дастаҳои лигаи олӣ дар мавсими соли 2017 доир гашт.

Дар 26-умин Чемпионати Тоҷикистон ҳашт даста ширкат мекунанд. Намояндагони дастаҳо пеш аз қуръакашӣ рақамгузории тартибии дастаҳоро муайян карданд. Рақамгузорӣ тартиби вохӯриҳоро дар хона – меҳмонӣ аниқ мекунад. Дастаҳо ба тариқи зайл рақамгузорӣ шуданд:

1. «Барқчӣ» (Душанбе)
2. «Регар-ТадАЗ» (Турсунзода)
3. «Ҳосилот» (Фархор)
4. «Вахш» (Қӯрғонтеппа)
5. КМВА «Помир» (Душанбе)
6. «Хуҷанд» (Хуҷанд)
7. «Панҷшер» (Ҷалолиддин Балхӣ)
8. «Истиқлол» (Душанбе)

Тибқи натиҷаи қуръакашӣ дар даврҳои якуму дуюм вомехуранд:

1-ум давр:
«Барқчӣ» – «Истиқлол»
«Регар-ТадАЗ» – «Панҷшер»
«Ҳосилот» – «Хуҷанд»
«Вахш» – КМВА «Помир»

2-юм давр
«Истиқлол» – КМВА «Помир»
«Хуҷанд» – «Вахш»
«Панҷшер» – «Ҳосилот»
«Барқчӣ» – «Регар-ТадАЗ»

Ёдовар мешавем, ки чемпионати миллӣ, тибқи нақшаи Лигаи футболи мамлакат, 5 март оғоз шуда, дар се марҳила доир мегардад. Ҳар даста 21 бозӣ анҷом медиҳад. Дастае, ки ҷои охирро мегирад, лигаи олиро тарк мекунад. Дастаи ҷои ҳафтум бошад, барои мондан дар лигаи олӣ бо барандаи медалҳои нуқраи лигаи якум бозии интихобӣ мегузаронад.

Ҷадвали мукаммали бозиҳои чемпионати Тоҷикистон-2017 дар ду марҳила баъд аз тасдиқ шуданаш нашр мешавад. Ҷадвали бозиҳои марҳилаи сеюм баъд аз анҷом ду марҳилаи аввал муайян мегардад.