Дастаи “Хуҷанд”-и шаҳри Хуҷанд дар даври дуюми марҳилаи гурӯҳии Ҷоми Конфедератсияи футболи Осиё-2019 (КФО) бар тими “Дордой” (Қирғизистон) бо ҳисоби 3:1 ғалаба намуд.

Бозии мазкур санаи 17 апрел,  дар майдони дастаи “Хуҷанд” доир гардида, ҳособи бозиро дар дақиқаи 17-ум футболбози тими меҳмон Бекжан Сагинбаев боз карда, сипас дар дақиқаҳои охири нимаи аввали бозӣ футболбози шинохтаи  дастаи “Хуҷанд” – Дилшод Восиев голи ҷавобӣ зада, ҳисобро баробар сохт. 

Дар нимаи дуюми бозӣ, дақиқаи 63-юм бошад, Дилшод Восиев голи дуюми худро вориди дарвозаи ҳариф сохта, дастаи “Хуҷанд”-ро ба пеш бароварда, голи ниҳоиро дар дақиқаи 89-ум аз пеналтӣ Ҷаҳонгир Эргашев ба самар расонида, пирӯзии “Хуҷанд”-ро таъмин сохт.
 
Бозии дигари гурӯҳи “D”-и Ҷоми КФО-2019 миёни дастаҳои “Олтин Асир” (Туркманистон) ва “Истиқлол” (Тоҷикистон) мусовӣ (1:1) анҷом ёфта, баъди натиҷагирии даври дуюми бозиҳои гурӯҳи “D”-и Ҷоми КФО-2019 “Истиқлол” бо 4 хол пешсафи гурӯҳ аст. Дастаи “Хуҷанд бошад, бо 3 хол дар ҷои дуюм, “Олтин Асир” бо 2 хол дар ҷои сеюм ва дастаи “Дордой” бо 1 хол дар ҷои чорум қарор доранд.

Дастаи “Хуҷанд”  дар даври сеюми бозиҳои гурӯҳи “D” санаи 30 апрел, дар майдони худ бо тими “Олтин Асир” ва дастаи “Истиқлол” бошад, 1-уми май дар Душанбе бо тими “Дордой” бозӣ хоҳанд кард.