7 октябр таҳти раёсати муовини Сарвазири Ҷумҳурии Тоҷикистон, раиси Шӯрои рушди тарбияи ҷисмонӣ ва варзиш дар назди Ҳукумати Ҷумҳурии Тоҷикистон Азим Иброҳим ҷаласаи навбатии Шӯро ҷиҳати баррасии масъалаҳои мубрами соҳаи тарбияи ҷисмонӣ ва варзиши мамлакат баргузор гардид.

Зимни ҷаласа нахуст ҳисоботи фаъолияти Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар самти татбиқи сиёсати давлатӣ дар ин соҳа барои солҳои 2016 - 2017, фаъолияти мақомоти маҳаллии ҳокимияти давлатии вилоятҳои Суғду Хатлон, ВМКБ ва шаҳри Душанбе, ахбороти Кумитаи миллии олимпии кишвар шунида шуд.

Ҳангоми ҷаласаи Шӯро инчунин ҷараёни омодагии Тоҷикистон ба Бозиҳои тобистонаи олимпии “Токио – 2020” ва таъсиси Кумитаи тадорукоти омодагӣ ба баргузории ин бозиҳо дар назди Ҳукумати кишвар, тасдиқи нақшаи кории Шӯро барои соли 2018 муҳокима гардид.
  
Зикр гардид, ки дар асоси нақшаи кории Шӯро барои соли 2018 масъалаҳои бисёр мубрами соҳа, аз қабили таҳияи Низомномаи меъёрҳои миллӣ оид ба тарбияи ҷисмонӣ ва омодагии дифоъ, таъсиси гурӯҳи корӣ ҷиҳати таҳияи лоиҳаи Қонуни Ҷумҳурии Тоҷикистон “Дар бораи тарбияи ҷисмонӣ ва варзиш” дар таҳрири нав, таҳияи Феҳристи ягонаи иншооти варзишӣ ва тартиби фаъолияти онҳо (новобаста аз шакли ташкилию ҳуқуқӣ, хусусан иншооти хусусии варзишӣ) ва масъалаи минбаъд баргузор намудани Бозиҳои варзишии толибилмон ва донишҷӯён, махсусан Фестивали бозиҳои миллии варзишӣ мавриди баррасии ҳамаҷонибаи аъзоёни Шӯро, вазорату идораҳои дахлдор, федератсияҳо ва ассотсиатсияҳои варзишӣ қарор гирифт.