14 декабр дар толори варзишии Кумитаи андоз воқеъ дар шаҳри Душанбе, Фестивали бозиҳои миллии варзишӣ бо иштироки варзишгарони тамоми минтақаҳои кишвар, донишҷӯён ва меҳмонон таҷлил карда шуд.

Дар чорабинии мазкур раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳтам Абдуллозода, намояндаи Дастгоҳи иҷроияи Президенти Ҷумҳурии Тоҷикистон Адҳам Маъмурзода ва дигар шахсони расмӣ иштирок ва суханронӣ карданд.

Зикр гардид, ки дар заминаи сиёсати варзишпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Президенти Кумитаи миллии олимпии кишвар муҳтарам Эмомалӣ Раҳмон дар даврони соҳибистиқлолии кишвар ба рушди соҳаи варзиш дар кишвар аҳамияти ҷиддӣ дода шуда, бозиҳои миллии варзишӣ рушд намуданд. Баргузории Фестивали бозиҳои миллии варзишӣ, ки бозиҳои гуногуни варзишии минтақаҳои кишвари азизамонро дар бар мегирад, нишонаи таваҷҷуҳи хоса ба намудҳои гуногуни варзиши миллӣ мебошад.

Аҳтам Абдуллозода дар оғози суханронӣ ба Президенти кишвар муҳтарам Эмомалӣ Раҳмон ва раиси Кумитаи тадорукоти Бозиҳои миллии варзишӣ, президенти Федератсияи футболи Тоҷикистон Рустами Эмомалӣ барои эҳё, рушд ва татбиқи амалии Фестивали бозиҳои миллии варзишӣ изҳори сипос намуд.

- Маҳз бо таваҷҷуҳи хоса ва ғамхориҳои беназири сиёсати варзишпарварони Президенти Ҷумҳурии Тоҷикистон, Пешвои муаззами миллат муҳтарам Эмомалӣ Раҳмон имрӯз беш аз 9853 иншооти варзишӣ дар истифодаи ҷомеа ва варзишгарон қарор дода шудааст. Ва аз ин шумора 140 муассисаҳои варзишӣ барои омода намудани варзишгарони касбӣ бо фарогирии 47930 нафар наврасу ҷавон фаъолият намуда истодаанд. Варзишгарони беҳтарини кишвар, дар соли ҷорӣ тавонистанд 300 маротиба Суруди миллии Ҷумҳурии Тоҷикистонро суруда ва зиёда аз 800 маротиба Парчами давлатии Ҷумҳурии Тоҷикистонро дар мусобиқаҳои сатҳи байналмилалӣ парафшон намоянд,-иброз дошт Абдуллозода А.

Ба андешаи А. Абдуллозода бозиҳои миллии варзишӣ муҳимтарин воситаи устуворгардонии рушд ва ташаккули тарбияи ҷисмонӣ ва варзиши касбӣ ба ҳисоб рафта, баргузории фестивали мазкур ба эҳтиром, арҷгузорӣ, матонат, ҷасурӣ, тавоноӣ ва далериву шуҷоати қаҳрамонони миллати тоҷик, аҷдодони мо ва парчамбардорони даврони соҳибистиқлолӣ равона гардидааст.

Гуфта шуд, ки дар замони муосир ба варзиш ва тарзи ҳаёти солим, махсусан, бозиҳои миллии варзишӣ ҷалб намудани қишрҳои гуногуни ҷомеа аҳамияти муҳим дошта, он барои беҳдошти генофонди миллат арзиши калон дорад. Миллати тоҷик аз қадим вобаста ба фасли сол ва синну сол намудҳои гуногуни бозиҳои варзишӣ дошт, ки ба воситаи онҳо солимии миллат мунтазам таъмин мегардид.

Дар оғози фестивал дастаи ғолибони марҳилаи якум ва дуюми Фестивали мазкурро, ки бо ифтихори иди байналмилалии Наврӯз ва ҷашни Истиқлолияти давлатӣ дар сатҳи минтақа ва маҳал ғолиб омада, ба марҳилаи ҷумҳуриявӣ роҳхат гирифтанд, бо либосии миллии хеш вориди саҳна гаштанд. Варзишгарон аз минтақаҳои ВМКБ, Суғд, Хатлон, ШНТМ, минтақаи Рашт ва шаҳри Душанбе иштирок намуда, бозиҳои миллии варзиширо намоиш доданд.

Инчунин ба Фестивал варзишгарони беҳтарини кишвар, ки тавонистанд ба бозиҳои байналмилалӣ роҳхат пайдо намуда, маҳорати хеш ва кишвари азизашонро ба мамлакатҳои дигар муаррифӣ намуоянд, бо Парчами азизи кишвар вориди майдон шуданд.

Баъди хотимаи суханрониҳои меҳмонони хоси чорабинӣ, баҳри нишастагон барномаи фарҳангӣ аз ҷониби санъаткорон ва намоиши бозиҳои варзишӣ аз ҷониби варзишгарони кишвар пешкаш гардид. Онҳо маҳорати хешро дар сатҳи олӣ нишон дода, табъи тамошобинонро болида намуданд. Дар рафти намоиши фарҳангӣ низ варзишгарон намуди бозиҳои қадимаи кишвар ва намуди бозиҳои ҷаҳониро ба тамошобинон нишон доданд.

Мавриди зикр аст, ба барномаи Фестивали бозиҳои миллии варзишӣ намудҳои гӯштини миллӣ, чавгонбозӣ, шиноварӣ, вазнабардорӣ, дастхобонӣ, дав ба масофаҳои 200, 400, 800 метр, шоҳмот, бандкашӣ ворид гардидаанд. Дар доираи фестивал, ҳамчунин бозиҳои чиликдангал, ланкабозӣ, биҷилбозӣ, камонварӣ, шамшербозӣ, камолғулак, фалағмолпартоӣ, ҳой ва бандпарак намоиш дода шуд.

Ёдовар бояд шуд, ки дар заминаи сиёсати варзишпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Президенти Кумитаи миллии олимпии Тоҷикистон муҳтарам Эмомалӣ Раҳмон соли сеюм аст, ки дар ҷумҳурӣ Фестивали бозиҳои миллии варзишӣ баргузор гардида, сарпарастии онро Президенти Федератсияи футболи Тоҷикистон Рустами Эмомалӣ бар уҳда гирифтааст.

Яке аз муҳимтарин воситаи устувор гардонидани рушди соҳаи варзиш эҳтиром ва арҷгузорӣ ба бозиҳои миллии варзишӣ, ки ҳамчун рамзи матонат, ҷасурӣ, тавоноӣ ва далериву шуҷоат баҳри ҳифзи арзишҳои волои миллӣ ва таъмини солимии ҷомеа равона гардидааст, зери ҳидояту дастгириҳои ҳамешагии Пешвои муаззами миллат аз нав эҳё ва рушд ёфта истодаанд.

Фестивали бозиҳои миллии варзишӣ дар се марҳила - дар сатҳи маҳал, минтақа ва ҷумҳурӣ - ҷиҳати фарогирии ҳарчи бештари наврасону ҷавонон ба таърих, фарҳанг, расму ойин ва анъанаву суннатҳои тоҷикона баҳри баланд бардоштани ҳисси худшиносиву худогоҳӣ, эҳтиром ва арҷгузорӣ ба арзишҳои миллӣ, ҳамзамон, тарғибу ташвиқ ва таҳкими тарзи ҳаёти солим роҳандозӣ гардида аст.

Ногуфта намонад, ки марҳилаи интихобии якум аз 20 то 30 марти соли 2019 дар сатҳи маҳал (деҳа, ҷамоати деҳот, шаҳрак ва шаҳру ноҳияҳо) дар доираи таҷлили Наврӯз доир гардид. Марҳилаи интихобии дуюм аз 7 то 27 сентябри соли 2019 дар сатҳи минтақа (вилоятҳо) бо иштироки ғолибони марҳилаи якум ба муносибати Истиқлоли давлатии Ҷумҳурии Тоҷикистон доир гашта буд.

Гулрӯ СӮҲРОБЗОДА, “ҶТ”,

Ҷумъагул НАЗРУЛЛОЗОДА,

волонтёри “ҶТ”