ВАРЗИШ
Сешанбе 07 Декабр 2021 02:14
8099
Варзиш мактаби шуҷоату ҷавонмардӣ, солимию тавонмандӣ ва ягона роҳи дӯстиву бародарӣ миёни аҳли башар аст, ки инсонҳоро бо ҳам ошнову муттаҳид менамояд.

Варзишгар нафарест, ки аз мактаби номусу ҷасорат гузаштааст ва қиммати ифтихори миллӣ ва ватандӯстиро дар вуҷуди худ бештар аз ҳар касе эҳсос мекунад. Ҳамакнун сухан бобати варзишгаре меравад, ки дар вуҷудаш ғурури ниёгонист. Нафарест, ки солҳост шарафи варзиши тоҷикро дар мусобиқаҳои сатҳи ҷаҳонӣ ҳимоя менамояду бо заҳмату талошаш Суруди миллии Ҷумҳурии Тоҷикистон ифтихормандона садо медиҳад. Ин варзишгар Ҳамроз Раҷабов аст.

Ҳамроз Раҷабов варзишгари муваффақ, серталош, қаҳрамони роҳи хеш ва ҷавоне пур аз ғуруру ифтихори миллӣ, 26 сол муқаддам дар деҳаи Тоҷикободи ноҳияи Ҷаббор Расулов таваллуд шудааст. Аз хурдӣ рағбати зиёдаш ба варзиш ӯро канор гузошта натавонист ва ҳамарӯза пушти тирезаи тамрингоҳи деҳа аз кашмакашиву усулпартоии паҳлавонони ҳамдеҳааш лаззат мебурд. Маҳз ҳамаи ин дилбастагиҳояш боис шуд, то падараш ӯро ба мактаби варзишии “Ланглиф” – и деҳаашон бубарад.

“Бо хоҳишу исрори зиёд падарамро розӣ намудаму ҳарду ба толори варзишии деҳа рафтем. Аввалин нафаре, ки моро қабул намуд, устоди шоистаи варзиш Ҳақназаров Соҳибназар буд ва падарам маро ба дасти ӯ супорид. Он замон ҳамагӣ ҳашт сол дош-там ва ба падарам қавл додам, ки дар оянда қаҳрамони ҷаҳон хоҳам шуд” – гуфт Ҳамроз.

Пас аз ду соли тамринҳо Ҳамроз аввалин маротиба соли 2005 дар Чемпионати Тоҷикистон оид ба самбо дар ноҳияи Ёвон иштирок намуд. Ӯ ҳамагӣ 14 сол дошт, вале бо матонату маҳорати олии гӯштингирӣ дар мусобиқаи байни ҷавонон мақоми сеюмро ба даст овард. Чун аввалин иштирокаш дар мусобиқа бонатиҷа хотима ёфт, хурсандии Ҳамроз беканор буд ва ин ғолибият масъулияти ӯро барои расидан ба ваъдаи додааш ба падар боз ҳам бештар водор ба тамрин менамуд. Пас аз гирифтани медали биринҷӣ ва ба даст овардани роҳхати иштирок дар мусобиқаи Чемпионати Осиё, ки соли 2006 дар шаҳри Алмаатои Қазоқистон доир гардид, Ҳамроз миёни наврасон иштирок намуд ва дар вазни 42 кг сазовори медали нуқра гардид.

Яке аз мусобиқаҳои хотирмону фаромӯшнашуданӣ барои Ҳамроз ин Чемпионати Осиё оид ба самбо (соли 2014) буд, ки ӯ тавонист миёни ҷавонон дар вазни 68 кг медали тилло ва роҳхат ба Чемпионати Ҷаҳонро ба даст биёрад. Ӯ баъди ба даст овардани медали тиллои Чемпионати Тоҷикистон байни ҷавонон дар соли 2013 роҳхати Чемпионати Осиёро, ки дар шаҳри Тошканд баргузор мегардид, ба даст овард, вале қарор буд дар ин мусобиқа иштирок накунад.

“Аз сабабе ки шароити иқтисодии оилаамон он вақт хуб набуд ва падарам имконияти сафарбар намуданамро надошт, қарор буд аз иштирок дар мусобиқа даст бикашам. Аммо ташаккур ба устодам Соҳибназар Ҳақназаров, ки бо кумакаш маро фиристоданд. Мо дастаи мунтахаби кишвар дар маҷмӯъ 38 нафар иштирок намудем. Дар рӯзи якум ва дуюм ҳама медали нуқра ва биринҷӣ касб карданд ва аз ин миён танҳо маро муяссар гардид, то медали тиллои Чемпионати Осиёро ба даст биёрам”, - гуфт Ҳамроз.

Соли 2014 пас аз касби ғолибияти Чемпионати Осиё ва ба даст овардани роҳхати Чемпионати ҷаҳон, ки дар шаҳри Сеули Корея доир мегардид, Ҳамроз омодагии ҳамаҷониба гирифт. Дар сабқати мазкур ӯ байни ҷавонон дар вазни 72 кг иштирок намуд. Ҳамроз дар даври аввал ба се ҳарифи худ ғолибияти соф ба даст овард, аммо дар даври ниманиҳоӣ бинобар сабаби осеб бардоштанаш аз ҳарифи русиягии худ шикаст хӯрд ва аз идомаи сабқат маҳрум монд. Тавре худи ӯ мегӯяд: “Барои амалӣ намудани ваъдаи додаам ба падарам, ки “Қаҳрамони ҷаҳон мешавам” бисёр омодагии хуб дида будам, се ҳарифи аввалинамро низ дар аввалин фурсат бо усулҳои ҳалол мағлуб намудам, аммо осеби бардоштаам нагузошт, ки корро то охир барам ва аз медали қаҳрамонии ҷаҳон маҳрум мондам”.

Пас аз мағлубият Ҳамроз ноумед нашуд ва шикастро порае аз муваффақият ҳисобид. “Ҳар як бохт ба мо меомӯзад, ки чӣ гуна бояд устувор буд ва роҳи минбаъдаро чӣ гуна интихоб намуд”, – мегӯяд ӯ.
Соли 2015 Ҳамроз, ки ҳамагӣ 20 сол дошт, дар чемпионати Тоҷикистон миёни калонсолон оид ба самбо иштирок намуд ва медали тиллоро ба даст овард. Ин ғолибият ба ӯ имкон дод, то роҳхат ба Чемпионати Осиё миёни калонсолонро ба даст биёрад. Соли 2016 ӯ дар шаҳри Ашқободи Ҷумҳурии Туркманистон миёни калонсолон баромад намуда, медали тиллоро аз намуди самбо дар вазни 74 кг ба даст овард ва дубора унвони қаҳрамони Осиёро дар ду зина касб кард. Ҳамчунин моҳи ноябри ҳамон сол Ҳамроз дар Чемпионати ҷаҳон оид ба самбо, ки дар Булғористон доир гардид, иштирок намуда, бо касби медали биринҷии ин мусобиқаи бонуфузи сатҳи ҷаҳонӣ орзуи падарро амалӣ намуд.

Ҳамроз ғайр аз қаҳрамони риштаи самбо будан, боз дар дигар намуди гӯштин низ таҷрибаи хуб дошта, ба як қатор натиҷаҳои арзандаи сатҳи байналмилалӣ ноил гардидааст. Аз ҷумла, солҳои 2017 – 2019 дар Чемпионати ҷаҳон оид ба кураш, ки дар шаҳри Мински Ҷумҳурии Белорусия ва шаҳри Алмаатои Ҷумҳурии Қазоқистон баргузор гардида буданд, дар вазни 80 кг медалҳои тиллои ин сабқатҳои бузурги ҷаҳониро ба даст овард ва унвони қаҳрамони ҷаҳонро аз намуди кураш касб кард.

Дастоварди охирине, ки бори дигар бо шарофаташ парчами номуси миллат боло бардошта шуд, дар Чемпионати Осиё оид ба самбо буд, ки 4 - 6 июни соли ҷорӣ дар шаҳри Тошканди Ҷумҳурии Ӯзбекистон баргузор гардид. Дар ин сабқати бонуфуз Ҳамроз Раҷабов бо шикаст додани ҳамаи ҳарифони худ медали тиллоро ба гардан овехт ва роҳхат ба Чемпионати Ҷаҳонро ба даст овард.

Ёдовар мешавем, ки Ҳамроз Раҷабов соли 2018 Донишгоҳи давлатии Хуҷанд ба номи академик Бобоҷон Ғафуровро бо ихтисоси “Омодагии дифои ҳарбӣ ва тарбияи ҷисмонӣ” хатм намуда, айни замон таҳсилашро дар Донишгоҳи давлатии Қазон ба номи Калинини Федератсияи Русия идома дода истодааст. Ӯ ҳамзамон устоди варзиши дараҷаи байналмилалӣ аз намуди самбо буда, фаъ-олияти варзишиашро ба ҳайси мураббии ҳамин ришта дар толори варзишии “Ланглиф” – и зодгоҳаш гузаронида истодааст. Ҳамроз аллакай қаҳрамони роҳи хеш аст ва калиди ҳама муваффақиятҳояшро аз заҳматҳо ва омӯзишҳои пайвастаи устодонаш Усто Устопиров, Ҳақназар Соҳибназаров ва Фаридуншоҳ Устопиров медонад. “Ба даст овардани медали тиллои қаҳрамонии ҷаҳонро қарзи ҷавонмардии худ медонам”, - мегӯяд Ҳамроз.

Барои фатҳи қуллаи мурод ва ба даст овардани медали тиллои Чемпионати ҷаҳон ба Ҳамроз барору комёбӣ орзумандем.

Қиёмиддин МАҲМАДҶОНОВ, “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
29 30 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2

Декабр 2021 c.