Дар рӯзи нуҳуми 5-умин Бозиҳои Осиё - 24 сентябр дар иншооти пӯшида ва ҳунарҳои размӣ варзишгарони кишвар 4 медали дигар – 2 нуқра ва 2 биринҷиро ба номи худ муҳр заданд.

Ба гуфти Умаралӣ Сафаралӣ, сухангӯи Кумитаи миллии олимпии кишвар медалҳои нуқраро Ҷомии Ҳасан аз намуди самбо ва Искандари Рустам дар гӯштини тарзи озод ба даст оварданд. Ҷомӣ дар даври чорякфинал варзишгари Қазоқистон Ербол Ардухан ва дар даври нимфинал варзишгари Узбекистон Саттор Эргашевро шикаст дода, дар финал аз варзишгари дигари Қазоқистон Беймет Канжанов мағлуб гашт. Искандари Рустам дар даври ҳаштякфинал варзишгари афғон Сардор Нодирӣ, дар чорякфинал Такашӣ Ишигурои ҷопонӣ, дар нимфинал Бакдайлет Алментайи қазоқистониро мағлуб карда, дар финал аз варзишгари Эрон Моҷтаба Голейҷ шикаст хурд.
  
Медалҳои биринҷиро бошад, Фотима Холова дар намуди кикбоксинг ва Умед Ҳасанбеков дар намуди самбо сазовор шуданд. Фотима Холова, ки 23 сентябр дар вазни -55 килои даври чорякфинал бар варзишгари Урдун Реҳам Абуғазала пирӯз шуда буд, имрӯз дар нимфинал аз варзишгари эронӣ Шаҳноз Мирҳайдарӣ шикаст хурд. Умед Ҳасанбеков дар вазни -90 кг дар даври ҳаштякфинал бар варзишгари мизбон Нурмурат Танирбердиев, дар чорякфинал бар Пиерре Боу аз Лубнон ғалаба карда, дар нимфинал аз варзишгари узбекистонӣ Немат Ёқубов шикаст хурд. Сипас, дар рақобат барои ҷои сеюм бар варзишгари Қирғизистон Туралбек Жолдошқазиев пирӯз шуд.

Шумораи медалҳои Тоҷикистон ба 38 адад расид – 10 нуқра ва 28 биринҷӣ.

Аз ҳисоби даставӣ тими Тоҷикистон дар миёни 65 дастаи иштирокчӣ дар ҷои 27-ум қарор дорад. Туркманистон, ки 206 медал, аз ҷумла 79 тилло дорад, дар ҷои аввал аст. Чин бо 61 медал, аз ҷумла 23 тилло ба ҷои дуюм баромад. Эрон бо 89 медал, аз ҷумла 22 тилло дар мақоми сеюм аст.

Шодихони НАЗАР, “ҶТ”