Дар доираи чорабиниҳо бахшида ба Рӯзи ҷавонони Тоҷикистон ва Рӯзи олимпӣ, 20 май бо иқдоми Мақомоти иҷроияи ҳокимияти давлатӣ дар шаҳри Душанбе, Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон, Кумитаи миллии олимпии Ҷумҳурии Тоҷикистон, ва ширкати ватании "Iamdifferent” аввалин марафони ҷумҳуриявии велосипедронӣ баргузор гашт.

Тибқи иттилои сомонаи Кумитаи миллии олимпии Ҷумҳурии Тоҷикистон дар он беш аз 1000 нафар велосипедсавор аз шаҳру ноҳияҳои ҷумҳурӣ дар масири майдони "Дӯстӣ” – посгоҳи Чорбоғ, ки беш аз 10 километрро ташкил медиҳад, ширкат намуданд.

Дар маросими ифтитоҳи чорабинӣ Аҳтам Абдуллозода , раиси Кумитаи ҷавонон, варзиш ва сайёҳӣ, Зувайдзода Маҳмадсаид , муовини аввали раиси шаҳри Душанбе ва, ҳамзамон муовини Президенти Кумитаи миллии олимпӣ иштирокчиёнро шобош гуфта, ба онҳо барор хостанд.

Миёни мардҳо Меҳроб Одинаев аз мактаби маҳорати олии варзишӣ оид ба варзиши сабук мақоми аввалро соҳиб шуд. Писару падар – Игнат ва Ринат Батиришинҳо аз шаҳри Душанбе ҷойҳои дуюму сеюмро сазовор гаштанд.

Миёни занҳо бошад, Юлия Жукова аз шаҳри Душанбе мақоми аввал, Фараҳнози Баҳром мақоми дуюм ва Екатерина Батиришина мақоми сеюмро касб намуданд.

Ҳамчунин, хурдсолтарин иштирокчӣ миёни мардон – Файзуллои Зубайдуллои 9-сола аз мактаби маҳорати олии риштаҳои амалӣ, миёни бонувон Милана Батиришинаи 10-сола аз шаҳри Душанбе ва калонсолонтарин иштирокчӣ миёни мардон – Зафар Шаропов, миёни бонувон Муҳаббат Давлатова соҳиби мукофоти хотиравӣ гардиданд.