Имрӯз дар Варзишгоҳи байналмилалии Халифаи шаҳри Давҳа бозиҳои даври аввали марҳилаи гурӯҳии Ҷоми Осиё-2024 байни бозигарони то 23-сола дар гурӯҳи “С” баргузор мешавад. Дастаи Тоҷикистон дар бозии ифтитоҳии худ бо тими олимпии Арабистони Саудӣ бозӣ хоҳад кард. Вохӯрӣ соати 21:00 ба вақти маҳаллӣ, 23:00 ба вақти Душанбе оғоз мешавад.

Ба иттилои Федератсияи футболи Тоҷикистон, сармураббии дастаи мунтахаби олимпии кишвар Мубин Эргашев барои рақобатҳои Ҷоми Осиё-2024 дар Қатар 24 бозигар – 3 дарвозабон, 8 ҳимоятгар, 9 нимҳимоятгар ва 4 ҳамлагарро даъват намудааст, ки 7 нафарашон легионер мебошанд.

Дар ҳамин ҳол дар ҷамъомадҳои таълимию тамринии пеш аз рақобатҳо, ки аз 3-юми апрел оғоз гардида буд дар ҳайати дастаи мунтахаби кишвар танҳо 21 бозигар иштирок намуда буд. Нимҳимоятгарон Руслан Хайлоев (“Тюмен”, Русия) ва Алишер Шукуров (“Динамо”, Гурҷистон), инчунин ҳамлагар Шаҳром Самиев (“Андиҷон”, Узбекистон) дар ҷамъомадҳои таълимию тамрини ба назар намерасиданд.

Нимҳимоятгари бошгоҳи “Самгурали”-и Гурҷистон, Алиҷони Бӯризод ки зонуяш дар бозии интихобии Ҷоми ҷаҳон-2026 миёни тимҳои миллии Тоҷикистон ва Арабистони Саудӣ (1:1) лат хӯрда буд, дар Ҷоми Осиё-2024 ба ҳайати мунтахаби олимпии кишвар (U-23) кӯмак карда наметавонад.

Бояд гуфт, ки дастаи мунтахаби олимпии Тоҷикистон (U-23) дар Ҷоми Осиё-2024, ки аз 15-уми апрел то 3-юми май дар Қатар баргузор мешавад, дар гурӯҳи “С” бо тимҳои мунтахаби Арабистони Саудӣ (16-уми апрел), Ироқ (19-уми апрел) ва Тайланд (22-юми апрел) рақобат мекунад.

Бино ба ақидаи коршиносони масоили варзишӣ дар гурӯҳи “С”, ки Тоҷикистон ҳам дар ин гурӯҳ қарор дорад, тимҳои мунтахаби Арабистони Саудӣ ва Ироқ метавонанд барои 23-солаҳои кишвар дарди сар эҷод кунанд, аммо ба ақидаи шореҳи ТВ “Варзиш” Бобо Холмуродзода “тими мунтахаби Тоҷикистон ҳам туҳфа набуда, аз як ҳайати ҷиддӣ ташкиш ёфтааст, ки метавонад озодона аз гурӯҳи хеш барояд”.

Дар Ҷоми Осиё-2024 байни бозигарони то 23-сола тими олимпии кишварро бозингарони зерин намояндагӣ мекунанд:

Дарвозабонҳо: Муҳриддин Ҳасанов (“Истиқлол”, Душанбе), Сафармад Ғаффоров (“Хуҷанд”, Хуҷанд), Муҳаммадрабӣ Раҳматуллоев (“Равшан”, Кӯлоб);

Ҳимоятгарон: Манучеҳр Сафаров (“Нефтчӣ”, Узбекистон), Меҳрубон Каримов (“Самгурали”, Гурҷистон), Содиқҷон Қурбонов (“Истиқлол”), Раҳматшо Раҳматзода (“Равшан”), Ҳайдар Сатторов, Бекмурод Ҳаитов (ҳарду аз “Вахш”, Бохтар), Фахриддин Аҳтамов (“Хуҷанд”), Ҷонибек Шарипов (КМВА, Душанбе);

Нимҳимоятгарон: Алишер Шукуров (“Динамо”, Гурҷистон), Руслан Хайлоев (“Тюмен”, Русия), Ҷомӣ Назаров (“CP Sarriа”, Испания), Ҳамадонӣ Камолов (“Истиқлол”), Азизбек Ҳаитов (“Равшан”), Шуҳрат Элмуродов, Фаридун Давлатов (ҳарду аз “Регар-ТадАЗ”, Турсунзода), Шоҳрух Сангов, Тоҳирҷон Тағойзода (ҳарду аз “Ҳосилот”, Фархор);

Ҳамлагарон: Шаҳром Самиев (“Андиҷон”, Узбекистон), Далер Шарипов (“Металлург”, Узбекистон), Рустам Соиров, Меҳрон Мадаминов (ҳарду аз “Истиқлол”). Сармураббӣ – Мубин Эргашев.

Бояд қайд кард, ки дар ин рақобатҳо доварон низ аз Тоҷикистон бозиҳоро қазоват мекунанд. Конфедератсияи футболи Осиё рӯйхати доваронеро, ки дар қисми ниҳоии Ҷоми Осиё-2024 миёни дастаҳои мунтахаби то 23-сола кор хоҳанд кард, нашр намуд.

Дар рӯйхати доварони Ҷоми Осиё-2024 чаҳор намояндаи Тоҷикистон низ шомиланд. Инҳо доварони ФИФА Гулмуроди Саъдулло ва Насрулло Кабиров ва ёварони довари ФИФА Ҳасан Каримов ва Вафо Қараев мебошанд.

Яҳё МАҲМАДНАБИЕВ, “ҶТ”