Ҳанӯз айёми хурдсолӣ Рафоат ба варзиш шавқу ҳаваси зиёд дошт. Ин буд, ки ҳамроҳи писарбачаҳои ҳамсол дар қади кӯча аз паси тӯб медавид. Машғул ба бозии футбол. Модар ин гуна рафтори духтарчаи хурдсолашро, ки мебоист имсол ба мактаб равад, писанд надошт. Падар бошад, баръакс. Мегуфт, ки духтарчааш азбаски ба варзиш шавқ дорад, шояд дар оянда ба воя расаду варзишгар шавад. Аз ин хотир, монеи чунин амалҳои духтари хурдсолаш намегардид.

Рафоат қатори дигар ҳамсолонаш мактабрав шуд. Дар мактаб аз ҳама беш ба варзиш шавқу ҳаваси бештар дошт. Аз ин хотир, маҳорати хешро маҳз дар ин ҷода нишон дода, ҳангоми баргузории дарсҳои варзишӣ саъю кӯшиши зиёд ба харҷ медод. Миёни ҳамсинфон ҳамчун хонандаи чусту чолок фарқ дошт. Ин аз назари муаллимони фанни тарбияи ҷисмонӣ пинҳон намемонд. Ба ӯ маслиҳат доданд, ки пас аз хатми мактаб ҳатман ё донишкадаи соҳаи варзиш дохил шавад. Зеро маҳз дар ин ҷода комёбиҳоро ноил хоҳад шуд. Рафоат гуфтаҳои устодонро сарфи назар накард.

Ӯ мактаби миёнаро дар зодгоҳаш, ноҳияи Бохтар (ҳоло Кушониён) ба итмом расонда, бо дуои неки волидон ва устодон ҷониби пойтахт, барои дохил шудан ба Донишкадаи тарбияи ҷисмонии Тоҷикистон ба номи С. Раҳимов роҳ пеш гирифт. Азбаски дар мактаб ба якчанд нишондиҳандаҳо ноил гашта буд, пас супурдани санҷишу имтиҳонҳоро ба осонӣ пушти сар карда, ба гирифтани номи донишҷӯ мушарраф гардид.

Дар донишкада аз рӯи ихтисоси гӯштини миллӣ ҳунар аз бар дошт. Ҳамчунин, ба футбол, варзиши сабук, тӯби дастӣ, чавгон ва ғайра машқ варзида, маҳорат аз бар мекард. Илова бар он, дар мусобиқаҳои гуногун дар ҳайати дастаи донишкада ширкат варзида, натиҷаҳои дилхоҳро ба даст меовард. Маҳорати варзиши ӯро ба назар гирифта, ӯро ба ҳайати дастаи яккачини духтаронаи кишвар аз рӯи тӯби дастӣ даъват карданд.
– Соли 2017 дар ҳайати дастаи яккачини духтарони кишвар оид ба тӯби дастӣ дар мусобиқаи байналмилалӣ, ки дар шаҳри Тошканди Ӯзбекистон доир гашт, ширкат варзидам, – нақл кард Рафоат зимни суҳбат. – Дастаи мо дар ин мусобиқа ҷои сеюмро ба даст овард. Ҳамин тавр, бароям муяссар гашт, меъёри номзад ба устоди варзиши ҷумҳуриро ба ҷо орам.

Рафоат донишкадаро бомуваффақият хатм карда, қарор дод, таҳсилро идома бахшад. Ҳоло ӯ ҳамчун магистрант дар факултаи фалсафаи Донишгоҳи милли Тоҷикистон машғули илмомӯзист.

Таҳсили ӯро дар донишгоҳ пай бурда, сармураббии дастаи футболи духтаронаи донишгоҳ мураббии шоистаи кишвар Шоҳ Ҳабибов ӯро ба ҳайати даста даъват кард. Зеро аз комёбиҳои ин духтари донишҷӯ огаҳӣ дошт. Кунун Рафоат баробари таҳсил ба бозии дӯстдошта, яъне футбол низ машғул аст. Зикр намудан бамаврид аст, ки дастаи футболи духтаронаи донишгоҳ – “Гулдухтарон” яке аз беҳтарин дастаи занонаи кишвар маҳсуб меёбад. Дар ҳамаи мусобиқаҳои дохили кишвар ва берун аз он, дастаи “Гулдухтарон” пайваста пешсаф аст.
– Рафоат аз зумраи варзишгардухтаронест, ки ба варзиш шавқи беандоза дорад, – изҳор дошт Шоҳ Ҳабибов. – Ӯ ҳамчун ташкилотчӣ бобати дуруст ба роҳ мондани рафти бозӣ ва сариштаи ҳайати даста саҳми беандоза дорад. Ин гуна маҳоратро на ҳар кас дорост. Чунин хислатҳояшро ба назар гирифта, Рафоатро сардори даста интихоб намудем. Таҳти роҳбарии ӯ дастаи футболи духтаронаи мо доимо комёбиҳоро ноил аст. Илова бар он, Рафоат ёвари мураббӣ маҳсуб ёфта, ҳамчун варзишгари ботаҷриба бо аъзои даста мустақилона машқу тамрин мегузаронад.

Тавре дар боло ишора рафт, Рафоат хатм-кардаи мактаби олии соҳаи варзиш маҳсуб ёфта, ҳоло ба омӯзиши илми фалсафа машғул аст. Аз чунин тасмими ӯ пурсон шудем, чунин посух дод:

– Варзиш шуғли дӯстдоштаи ман аст. Ҳамеша ба он машғул хоҳам буд. Бо гузашти сину сол, гарчи ба майдон набароям ҳам, ҳамчун мураббӣ дар тарбияи варзишгарони ҷавон саҳми худро гузошта метавонам. Ба фалсафа рӯ оварданам ба он хотир аст, ки баробари обутоби ҷисмонии насли ҷавон, инчунин бо гузарондани машғулиятҳои мактабӣ, баҳри инкишофи зеҳнии онҳо мехоҳам кумак-расон бошам. Аз ин хотир, ба омӯзиши фалсафа машғулам.