ВАРЗИШ
Чоршанбе 24 Апрел 2024 04:58
Ӯ барои он шаб то саҳар гирист, ки падараш ӯро ба мактаби варзишӣ диҳад.
Ӯ барои он зиёд хӯрок мехӯрд, ки тез калон шавад ва ба муваффақиятҳо даст ёбад.
Ӯ барои он фаро расидани тобистонро бесаброна интизор мешуд, ки ба деҳа равад ва зиёдтар ба тамрин машғул шуда, бо ҳамсолонаш гӯштин гирад.
Ӯ барои он аз падару модар дур рафт, ки оянда қаҳрамон шаваду номбардори онҳо бошад.
Ӯ барои он аз шикастҳояш руҳафтода намегашт, ки аз дастгирии волидонаш бовар дошт.
Ӯ барои он аз пешравиҳояш ғурур намегирифт, ки медонист ҳавобаландӣ ба ҷавонмардони тоҷик намезебад.
Ӯ барои он зиёда аз 10 соли дурӣ аз Ватанро таҳаммул мекард, ки тавонад бо дастоварди хубу бо сари баланд ба зодгоҳ баргардад...
Ва ҳамакнун ӯ баргашт – паҳлавони шинохтаву маҳбуби кишвар Сомон Маҳмадбеков бо медали тилло дар Чемпионати ҷаҳон оид ба дзюдо миёни ҷавонони то 21-сола. Дар тӯли ин чанд сол тавонист ба муваффақиятҳои бузург ноил гардад. Тавонист қаҳрамон шавад. Тавонист номбардори ҳам падару модар ва ҳам кулли тоҷику тоҷикистониён шавад.
Сомон дар чанд суҳбат бо хабарнигорон изҳор дошта буд, ки ҳама дастоварду пешравиҳо ва соҳиб гаштан ба номи пуршарафи “Қаҳрамони ҷаҳон”– ро пеш аз ҳама аз дастгириву пуштибонии падари бузургвораш – Моёншоҳ Маҳмадбеков мебинад. Мо тасмим гирифтем суҳбате дошта бошем бо эшон доир ба фаъолияти фарзанди номбардораш. Инак, фишурдаи он пешкаши хонандаи гиромӣ мегардад.
- Шуморо бори дигар ба муваффақиятҳои беназири писаратон табрик мегӯем.
- Ташаккур!
- Дар арафаи ҷашни Наврӯз тавлид шудани Сомонро донистем. Чаро Наврӯз нею Сомон номгузорӣ шуд?
- Ҳарчанд ки замони таваллуди Сомонҷон мо дар Ватан иқомат надоштем, вале ҳамеша дар ёду хаёли зодгоҳ будем ва пайваста аз ҳолу аҳволи кишвари азизамон хабардор мешудем. Он рӯзҳо 1100 - солагии асосгузори давлати Сомониён – Исмоили Сомонӣ ҷашн гирифта мешуд. Ба хотири ин шахси бузургвор бо оилаам тасмим гирифтем то номи аввалин писари мо Сомон шавад.
- Чаро маҳз самти варзишро пеша кард?
- Чунки дар оилаи варзишгар таваллуд шудааст. Бобою амакҳояш ҳама ба варзиш машғул буданд.
- Сомон, ки синнаш ва ҳам ҷуссааш хурд буд, чаро на ба боғчаи кӯдакона, балки ба мактаби варзишӣ рафт?
- Ба варзиш машғул шудан дар хуни Сомон аст ва он аз аҷдодонаш ба ӯ гузаштааст. Вақте ӯ хоҳиши ба мактаби варзишӣ рафтанро дошт, мактаби варзишӣ кудакони аз синни 12 – 14 - сола болоро қабул мекард. Дуруст аст, ки вай миёни наврасон синнаш майда ва дар баробари ин ҷусааш низ хурдакак буд. Вале аз доштани меҳри зиёд ба варзиш ман натавонистам хоҳишашро рад намоям. Аввал ӯро ба мактаб қабул накарданд. Аммо бо як зориву тавалло назди мураббӣ – Муҳаммадшариф Сулаймонов ба клуби варзишии “Динамо” барои ақаллан тамошои машқомӯзию тамрини бадан супурдам. Ҳамин хел баъди ду сол Сомон аз тамошо ба тамрин гузашт ва дар доираи наврасони аз худаш калон қувваозмоӣ намуд.
- Ба Иркутск рафтани Сомон хоҳиши волидон буд ё худаш?
- Бародари ман – Эргаш ба хонаамон меҳмонӣ омада буд, вақти баргаштанаш Сомон бо ӯ рафтанӣ шуд. Мехост он ҷо бо писари амакаш Маҳмадбек Маҳмадбеков, ки ӯ низ ба варзиш машғул аст, тамрин кунад. Мо аз ин тасмими ӯ бехабар ва ростӣ каме ҳам зид будем. Чунки писар хурд буд ва ҳоло ҷудоӣ аз хонаи падар ва хӯрокҳои гарму навозиши модарро намедонист. Таҷрибаи дуриро надошт. Вале чӣ илоҷ, ки ба якравӣ, хоҳиши бениҳоят зиёд доштан ва ашки чашмаш тоб наоварда бо модараш барои рафтанаш розигӣ додем.
- Оё ҳолате шуд, ки зиёд пазмони фарзанд шуда, аз баҳри варзишгар шуданаш гузашта, хостед ба хона баргардад?
- Бале, якбор ҳам не. Борҳо модараш гирён ба ман муроҷиат мекард, ки Сомонро ба хона биёрем ва дар ҳамин ҷо, назди додару хоҳараш ба мактаб раваду машқ кунад. Дар ман ҳам ин ҳолат буд. Вале кӯшиш мекардем ӯро аз мақсади дар пеш гузоштааш нагардонем. Ҳар тобистон ба дидораш мерафтем ва бо ин каме хостаи худро мешикастем.
- Тоқати тамошои саҳнаи қувваозмоии Сомонро доред?
- На ҳамеша. Сомон дар асл писари бениҳоят ҳалиму меҳрубон аст. Аз ин рӯ, ӯро дар мактаб “Золотой мальчик” (“Бачаи тиллоӣ”) ном мебурданд. Ҳатто вақти қувваозмоӣ низ кӯшиш мекунад ба ҳарифаш зарари ҷиддӣ нарасонад. Вале на ҳамеша ҳолате мешавад, ки ӯ ғолиб барояд. Лаҳзае ҳаст, ки зери дасту пои ҳарифаш мемонад. Ин ҳангом наметавонам ба саҳна бингарам. Чунки хоҳ нохоҳ ҳама кӯдак дар чашми волидон, ҳарчанд калон ҳам бошад, хурд метобад. Сомон ҳам ҳамин гуна. Дар чашми ман гӯё ҳамон кӯдаки 5 – 6 - сола аст.
- Шумо дар оянда чӣ орзуҳо доред аз писари варзишгаратон?
- Сомон, ки нақша дорад дар бозиҳои олимпӣ иштирок кунад, мо низ ӯро дастгирӣ менамоем ва орзу дорем, ки ғолиб гардад. Дуо мекунем бо дастоварду муваффақиятҳои бештар ба Ватан баргардад. То охир номбардори миллати азизамон бошад.
- Таманниёти Шумо ба ҷавонон.
- Инсон дар худ чунин қувваи бузурге дорад, ки агар як мақсади муайян гузораду амал кунад, ҳатман ба он ноил мегардад. Ҷавононро низ, ки дар ин давру замон ҳама шароиту имкониятҳо дар самтҳои гуногун барояшон фароҳам овардаанд, мебояд мақсад гузоранду амал кунанд. Чун онҳо пешбарандаи ин давлату миллат ҳастанд. Кӯшиш кунанд илм омӯзанд, забонҳои хориҷиро аз худ кунанд, ҳатман ба варзиш машғул шаванд.
Гулноза ҚОСИМОВА,
Гулрӯ КАЛБОДОВА, “ҶТ”
Ӯ барои он зиёд хӯрок мехӯрд, ки тез калон шавад ва ба муваффақиятҳо даст ёбад.
Ӯ барои он фаро расидани тобистонро бесаброна интизор мешуд, ки ба деҳа равад ва зиёдтар ба тамрин машғул шуда, бо ҳамсолонаш гӯштин гирад.
Ӯ барои он аз падару модар дур рафт, ки оянда қаҳрамон шаваду номбардори онҳо бошад.
Ӯ барои он аз шикастҳояш руҳафтода намегашт, ки аз дастгирии волидонаш бовар дошт.
Ӯ барои он аз пешравиҳояш ғурур намегирифт, ки медонист ҳавобаландӣ ба ҷавонмардони тоҷик намезебад.
Ӯ барои он зиёда аз 10 соли дурӣ аз Ватанро таҳаммул мекард, ки тавонад бо дастоварди хубу бо сари баланд ба зодгоҳ баргардад...
Ва ҳамакнун ӯ баргашт – паҳлавони шинохтаву маҳбуби кишвар Сомон Маҳмадбеков бо медали тилло дар Чемпионати ҷаҳон оид ба дзюдо миёни ҷавонони то 21-сола. Дар тӯли ин чанд сол тавонист ба муваффақиятҳои бузург ноил гардад. Тавонист қаҳрамон шавад. Тавонист номбардори ҳам падару модар ва ҳам кулли тоҷику тоҷикистониён шавад.
Сомон дар чанд суҳбат бо хабарнигорон изҳор дошта буд, ки ҳама дастоварду пешравиҳо ва соҳиб гаштан ба номи пуршарафи “Қаҳрамони ҷаҳон”– ро пеш аз ҳама аз дастгириву пуштибонии падари бузургвораш – Моёншоҳ Маҳмадбеков мебинад. Мо тасмим гирифтем суҳбате дошта бошем бо эшон доир ба фаъолияти фарзанди номбардораш. Инак, фишурдаи он пешкаши хонандаи гиромӣ мегардад.
- Шуморо бори дигар ба муваффақиятҳои беназири писаратон табрик мегӯем.
- Ташаккур!
- Дар арафаи ҷашни Наврӯз тавлид шудани Сомонро донистем. Чаро Наврӯз нею Сомон номгузорӣ шуд?
- Ҳарчанд ки замони таваллуди Сомонҷон мо дар Ватан иқомат надоштем, вале ҳамеша дар ёду хаёли зодгоҳ будем ва пайваста аз ҳолу аҳволи кишвари азизамон хабардор мешудем. Он рӯзҳо 1100 - солагии асосгузори давлати Сомониён – Исмоили Сомонӣ ҷашн гирифта мешуд. Ба хотири ин шахси бузургвор бо оилаам тасмим гирифтем то номи аввалин писари мо Сомон шавад.
- Чаро маҳз самти варзишро пеша кард?
- Чунки дар оилаи варзишгар таваллуд шудааст. Бобою амакҳояш ҳама ба варзиш машғул буданд.
- Сомон, ки синнаш ва ҳам ҷуссааш хурд буд, чаро на ба боғчаи кӯдакона, балки ба мактаби варзишӣ рафт?
- Ба варзиш машғул шудан дар хуни Сомон аст ва он аз аҷдодонаш ба ӯ гузаштааст. Вақте ӯ хоҳиши ба мактаби варзишӣ рафтанро дошт, мактаби варзишӣ кудакони аз синни 12 – 14 - сола болоро қабул мекард. Дуруст аст, ки вай миёни наврасон синнаш майда ва дар баробари ин ҷусааш низ хурдакак буд. Вале аз доштани меҳри зиёд ба варзиш ман натавонистам хоҳишашро рад намоям. Аввал ӯро ба мактаб қабул накарданд. Аммо бо як зориву тавалло назди мураббӣ – Муҳаммадшариф Сулаймонов ба клуби варзишии “Динамо” барои ақаллан тамошои машқомӯзию тамрини бадан супурдам. Ҳамин хел баъди ду сол Сомон аз тамошо ба тамрин гузашт ва дар доираи наврасони аз худаш калон қувваозмоӣ намуд.
- Ба Иркутск рафтани Сомон хоҳиши волидон буд ё худаш?
- Бародари ман – Эргаш ба хонаамон меҳмонӣ омада буд, вақти баргаштанаш Сомон бо ӯ рафтанӣ шуд. Мехост он ҷо бо писари амакаш Маҳмадбек Маҳмадбеков, ки ӯ низ ба варзиш машғул аст, тамрин кунад. Мо аз ин тасмими ӯ бехабар ва ростӣ каме ҳам зид будем. Чунки писар хурд буд ва ҳоло ҷудоӣ аз хонаи падар ва хӯрокҳои гарму навозиши модарро намедонист. Таҷрибаи дуриро надошт. Вале чӣ илоҷ, ки ба якравӣ, хоҳиши бениҳоят зиёд доштан ва ашки чашмаш тоб наоварда бо модараш барои рафтанаш розигӣ додем.
- Оё ҳолате шуд, ки зиёд пазмони фарзанд шуда, аз баҳри варзишгар шуданаш гузашта, хостед ба хона баргардад?
- Бале, якбор ҳам не. Борҳо модараш гирён ба ман муроҷиат мекард, ки Сомонро ба хона биёрем ва дар ҳамин ҷо, назди додару хоҳараш ба мактаб раваду машқ кунад. Дар ман ҳам ин ҳолат буд. Вале кӯшиш мекардем ӯро аз мақсади дар пеш гузоштааш нагардонем. Ҳар тобистон ба дидораш мерафтем ва бо ин каме хостаи худро мешикастем.
- Тоқати тамошои саҳнаи қувваозмоии Сомонро доред?
- На ҳамеша. Сомон дар асл писари бениҳоят ҳалиму меҳрубон аст. Аз ин рӯ, ӯро дар мактаб “Золотой мальчик” (“Бачаи тиллоӣ”) ном мебурданд. Ҳатто вақти қувваозмоӣ низ кӯшиш мекунад ба ҳарифаш зарари ҷиддӣ нарасонад. Вале на ҳамеша ҳолате мешавад, ки ӯ ғолиб барояд. Лаҳзае ҳаст, ки зери дасту пои ҳарифаш мемонад. Ин ҳангом наметавонам ба саҳна бингарам. Чунки хоҳ нохоҳ ҳама кӯдак дар чашми волидон, ҳарчанд калон ҳам бошад, хурд метобад. Сомон ҳам ҳамин гуна. Дар чашми ман гӯё ҳамон кӯдаки 5 – 6 - сола аст.
- Шумо дар оянда чӣ орзуҳо доред аз писари варзишгаратон?
- Сомон, ки нақша дорад дар бозиҳои олимпӣ иштирок кунад, мо низ ӯро дастгирӣ менамоем ва орзу дорем, ки ғолиб гардад. Дуо мекунем бо дастоварду муваффақиятҳои бештар ба Ватан баргардад. То охир номбардори миллати азизамон бошад.
- Таманниёти Шумо ба ҷавонон.
- Инсон дар худ чунин қувваи бузурге дорад, ки агар як мақсади муайян гузораду амал кунад, ҳатман ба он ноил мегардад. Ҷавононро низ, ки дар ин давру замон ҳама шароиту имкониятҳо дар самтҳои гуногун барояшон фароҳам овардаанд, мебояд мақсад гузоранду амал кунанд. Чун онҳо пешбарандаи ин давлату миллат ҳастанд. Кӯшиш кунанд илм омӯзанд, забонҳои хориҷиро аз худ кунанд, ҳатман ба варзиш машғул шаванд.
Гулноза ҚОСИМОВА,
Гулрӯ КАЛБОДОВА, “ҶТ”
Хабарҳои дигар
Рӯзнома
Эзоҳи худро нависед