Раиси Кумитаи ҷавонон, варзиш ва сайёҳӣ Аҳтам Абдуллозода бо сардори Хазинаи махсуси Кумитаи байналмилалии Салиби Сурх барои маъюбон Макс Денес мулоқот кард.

Аҳтам Абдуллозода ташрифи Макс Денес ва ҳамроҳонашро ба Тоҷикистон хайрамақдам гуфта, аз кӯмакҳои башардӯстонае, ки ин созмон дар лаҳзаҳои мушкил ба қишри эҳтиёҷманд расониданд, ёдовар ва изҳори сипос намуд.

Дар ҷараёни мулоқот масъалаҳои вобаста ба расонидани кӯмак ба варзишгарони маъюб ҷиҳати иштироки онҳо дар чорабиниҳои варзишӣ ва фароҳам намудани шароити муносиб барои тамринашон мавриди баррасӣ қарор гирифт.

Гуфта шуд имрӯз баҳри иштироки варзишгарони маъюб дар чорабиниҳои минтақавӣ, ҷумҳуриявӣ ва байналмилалӣ вобаста ба имконият тадбирҳои судманд андешида шудааст. Дар як сол 4-5 мусобиқаи сатҳи баланди ҷумҳуриявӣ байни ин табақаи ҷомеа доир карда мешавад.

Маке Денес иброз намуд, ки Фонди маъюбон ба варзишгарони маъюб барои бо дасту пойҳои сунъӣ ва дигар лавозимоти мавриди ниёз табақа таъмин кардан кӯмак мекунад. Ҳадафи дигар мусоидат намудан ба сохторҳое, ки бо ин табақаи ҷомеа кору фаъолият менамоянд, дарёфти манбаъҳои иловагии молӣ ва техникӣ ба ҳисоб меравад.

Ҷонибҳо ба хулоса омаданд, ки дар якҷоягӣ метавонанд барои расидан ба ин ҳадафҳо ва фароҳам намудани шароити муносиб тамоми имкониятро истифода намоянд.

Дар фарҷом барои густариш додани робитаҳои ҳамкорӣ ва ҷалби бештари шахсони маъюб ба варзиш ва дигар самтҳои муҳими марбут ба ҳаёти маъюбон таклифу пешниҳодҳои судманд ироа шуд.