Дастаи мунтахаби Тоҷикистон шоми имрӯз дар бозии даври чорякниҳоии Ҷоми Осиё - 2023 дар Қатар аз тими миллии Урдун шикаст хӯрда, аз ҳаққи иштирок дар нимфинали ин бозӣ маҳрум гашт.

Бозии мазкур дар варзишгоҳи Аҳмад бин Алии шаҳри Ал-Райяни Қатар доир гардида, бо ҳисоби 0:1 бар фоидаи урдуниҳо анҷом ёфт.

Бо вуҷуди оне, ки дар ҷараёни бозӣ лаҳзаҳои голзанӣ бисёр буд, аммо бозигарони ҳарду даста аз онҳо ба хубӣ истифода карда натавонистанд. Голи ягона ва ҳалкунанда дар дақиқаи 66-уми бозӣ аз ҷониби ҳимоятгари мунтахаби Тоҷикистон Ваҳдат Ҳанонов ба таври ногаҳонӣ (автогол) ба дарвозаи худи Тоҷикистон зада шуд. Тӯби задаи бозигари урдуниҳо ба пойи ҳимоятгари мунтахаби Тоҷикистон Ваҳдат Ҳанонов расида, вориди дарвоза гардид.

Ҳамин тариқ, мунтахаби Урдун ба даври ниманиҳоии Ҷоми Осиё-2023 роҳ ёфту футболбозони тими миллии Тоҷикистон ба хона бармегарданд.

Мухлисону ҳаводорони футболи тоҷик аз иштироки дастаи мунтахаби Тоҷикистон дар Ҷоми Осиё-2023 бо қаноатмандӣ ҳарф мезананд ва то ин марҳила роҳ ёфтани онҳоро худ қаҳрамонӣ медонанд.

Онҳо бо вуҷуди бохти навбатии тими мунтахаби кишвар ба бозӣ ва тактикаи варзишагарони тоҷик баҳои арзанда медиҳанд.

Худи сармурабби тими миллии Тоҷикистон Петр Сегрт дар хабаргузориҳо аз бозии тими мунтахаб ситоиш карда гуфтааст, ҳарчанд ӯ интизори натиҷаҳои беҳтар буд, вале ҳунарнамоии куллии футболбозони тоҷик қобили таҳсин аст.

- Тоҷикистон ба хона бармегардад, вале мо ба хона бо ифтихор ва сари баланд бармегардем. Бозигарон эҳтиром ва истиқболи зеборо сазовор ҳастанд, - менависанд расонаҳо аз қавли Петр Сегрт.

Ёдовар мешавем, ки мунтахаби Тоҷикистон барои аввалин бор дар таърихи худ дар қисми ниҳоии Ҷоми Осиё ҳунарнамоӣ кард ва бо роҳ ёфтан ба даври чорякниҳоии мусобиқот аллакай дастоварди шоёнро дар таърихи варзиши кишвар сабт намуд.