Дар шаҳри Рио-де-Жанейрои Бразил Бозиҳои паралимпӣ оғоз ёфт. Маросими ифтитоҳи бозиҳо шоми дирӯз, 7 сентябр, дар майдони "Маракан", ки ҳамагӣ се ҳафта пеш дар он оташи Бозиҳои тобистонаи олимпиро хомӯш карда буданд, доир шуд.

Бозиҳои паралимпии Рио аз 7 то 18 сентябри соли равон баргузор мешавад ва дар он наздики 4 ҳазор варзишгар аз 161 кишвари ҷаҳон дар 22 намуди варзиш барои 528 маҷмуи медалҳо талош мекунанд.

Тоҷикистонро як варзишгар - Раҳмихудо Додихудоев намояндагӣ мекунад. Ӯ дар давидан ба масофаҳои 200 ва 400 метр ширкат меварзад.

Раҳмихудо соли 2014 дар Бозиҳои осиёӣ дар шаҳри Инчони Кореяи Ҷанубӣ дар давидан ба масофаи 400 метр миёни варзишгарони имконияташон маҳдуд мақоми шашумро ишғол кардааст. Соли 2015-ум бошад, дар шаҳри Сочии Русия дар мусобиқаи байналмилалӣ миёни варзишгарони имконияташон маҳдуд масофаи 400 метрро чорумин шуда тай кард ва ба ҳаққи ширкат дар Бозиҳои паралимпии Рио-де-Жанейро мушарраф шуд.