Муҳимтарин чорабинии варзишии имсола - Бозиҳои XXXIII тобистонаи олимпӣ аз 26-уми июл то 11-уми август дар шаҳри Парижи Фаронса доир мегардад.

Варзишгарони тоҷик ба Олимпиадаи Париж-2024 то ҳоло ду роҳхат гирифтаанд, ки ба риштаи бокс марбут аст. Инчунин, онҳо дар риштаи ҷудо низ имкони дарёфти дасти кам панҷ роҳхат ба Бозиҳои олимпии Париж-2024-ро доранд.

Бархе аз варзишгарони тоҷик бошанд, дар Бозиҳои олимпӣ бо квота дар риштаҳои шиноварӣ ва варзиши сабук ҳунарнамоӣ хоҳанд кард. Ҳамчунин, варзишгарони тоҷик имсол дар мусобиқоти қаҳрамонии ҷаҳон ва Осиё дар риштаҳои гуногуни варзиш, мусобиқаҳои интихобии олимпӣ ширкат меварзанд.

Гуфтан ба маврид аст, ки варзишгарони мо соли гузашта дар мусобиқоти мухталифи байналмилалӣ иштирок карда, ба як силсила дастовардҳои назаррас ноил гардиданд.

Медали биринҷии Баҳодур Усмонов дар қаҳрамонии бокси ҷаҳон натиҷаи беҳтарини варзиши тоҷик дар соли 2023 дар навъҳои олимпӣ мебошад.

Инчунин соли гузашта ду муштзани тоҷик - Давлат Болтаев ва Миҷгона Самадова натиҷаҳои хуб ба даст оварданд.

Дар Бозиҳои 19-уми осиёӣ дар Ҳангжоуи Чин Болтаев барандаи медали тилло ва Самадова соҳиби медали биринҷӣ гардида, дар байни варзишгарони тоҷик аввалин шуда, ба Олимпиадаи Париж-2024 роҳхат гирифтанд.

Варзишгарони тоҷик инчунин соли гузашта дар риштаи ҷудо низ дар як қатор мусобиқаҳои бонуфузи байналмилалӣ муваффақ буданд. Дар ҳамин асос рӯзи 2-юми январ Федератсияи байналмилалии ҷудо (IJF) дар сомонаи расмии худ аз рӯи натиҷагирии мусобиқоти соли 2023 феҳристи варзишгаронро дар радабандии инфиродии ҷаҳонӣ ва олимпӣ аз навъи варзиши ҷудо нашр кард.

Тибқи ин феҳрист ҳашт варзишгари тоҷик ба қатори 50 ҷудокори беҳтарини ҷаҳон дохил шуданд. Шаш нафари онҳо дар ҳамин ҳол ба рӯйхати варзишгароне, ки меъёрҳои олимпиро иҷро кардаанд, шомиланд.

Агар онҳо мавқеи худро дар радабандии ҷаҳонӣ ва олимпӣ то 23-юми июни соли 2024 аз даст надиҳанд, дасти кам панҷ нафарашон соҳиби роҳхат ба Олимпиадаи Париж-2024 мешаванд.

Паҳлавони маъруфи тоҷик Темур Раҳимов мавқеи пешсафиашро дар вазни сангинтарин миёни мардон нигоҳ дошт.

Ӯ дар феҳристи ҷаҳонӣ дар вазни беш аз 100 кило бо 6260 имтиёз дар ҷойи аввал ва дар феҳристи олимпӣ бо 3950 имтиёз баъди варзишгари русиягӣ Инал Тасоев (5000 имтиёз) дар ҷойи дуюм қарор дорад.

Сомон Маҳмадбеков дар радабандии ҷаҳонӣ дар вазни то 81 кило бо 3875 имтиёз ҷойи 6-ум ва дар феҳристи олимпӣ ҷойи 10-умро касб кардааст.

Беҳрӯзи Хоҷазода дар феҳристи ҷаҳонӣ дар вазни то 73 кило бо 3401 имтиёз ҷойи 15-ум ва дар феҳристи олимпӣ ҷойи 9-умро гирифтааст.

Комроншоҳи Устопириён дар радабандии ҷаҳонӣ дар вазни то 90 кило бо 2955 имтиёз ҷойи 19-ум ва дар феҳристи олимпӣ ҷойи 17-умро ишғол мекунад.

Эмомалӣ Нуралӣ дар радабандии ҷаҳонӣ дар вазни то 66 кило бо 2678 имтиёз дар ҷойи 21-ум ва дар феҳристи олимпӣ дар ҷойи 16-ум аст.

Дар вазни то 66 кг Обид Ҷебов дар радабандии ҷаҳонӣ бо 2132 имтиёз дар ҷойи 26-ум ва дар феҳристи олимпӣ дар ҷойи 21-ум мебошад.

Эмомалӣ Нуралӣ ва Обид Ҷебов, ки ҳарду Тоҷикистонро дар вазни 66 кг муаррифӣ мекунанд, аз ду якеаш ба олимпиада роҳ меёбад, чун аз ду варзишгари як кишвар, ки дар як вазн меъёрҳои олимпиро иҷро мекунанд, бар асоси муқаррароти Кумитаи олимпӣ танҳо як нафари онҳо дар Бозиҳои олимпӣ иштирок хоҳанд кард.

Кумитаи байналмилалии олимпӣ эълон дошт, ки дар Париж-2024 варзишгарон аз 32 навъи варзиш байни ҳам рақобат хоҳанд кард, ки илова намудани варзиши навъи Брейкинг навгониест ба фарқ аз Олимпиадаҳои дигар.

Брейкинг ягона намуди нави варзиш дар барномаи Олимпиадаи соли 2024 мебошад. Дар Париж ду маҷмуи мукофотҳо дар брейк - дар мусобиқаи яккаса байни мардон ва занон, ки дар он 16 варзишгар ширкат мекунанд, ба ғолибон тақдим мегардад. Раққосҳо дар зери зарбаи DJ маҳорати рақсии хешро ба намоиш мегузоранд. Бояд гуфт, ки соли 2018 брейк бори аввал ба барномаи Бозиҳои олимпии наврасон дар Буэнос-Айрес ворид карда шуд.

Гарчанде Бозиҳои тобистонаи олимпии соли 2024 аз 26 июл то 11 августи соли 2024 баргузор гардад ҳам, аммо мусобиқоти футбол ва регби 24 июл ва мусобиқаи гандболӣ 25 июл оғоз мешавад. Танҳо дар тули се ҳафта 329 маҷмуи медалҳо аз рӯи 32 намуди варзиш ба ғолибон дода мешаванд. Гуфтан зарур аст, ки дар Олипиадаи Париж-2024 дастаҳои 206 кишваре, ки узви Кумитаи байналмилалии олимпӣ ҳастанд, иштирок намуда, дастаи олимпии гурезаҳо низ дар Олимпиада ширкат мекунанд.

Яҳё МАҲМАДНАБИЕВ, “ҶТ”