ВАРЗИШ
Панҷшанбе 25 Апрел 2024 10:11
4334
Тавре иттилоъ дода будем, 10-13 май дар шаҳри Тошканди Ҷумҳурии Ӯзбекистон Чемпионати Осиё оид ба гӯштини юнонӣ-римӣ ва тарзи озод баргузор гардид ва паҳлавонони навраси тоҷик дар он иштирок намуданд.

Дар мусобиқаи мазкур варзишгарони мо сазовори 4 медал шуданд.

Тибқи иттилои сомонаи расмии  Кумитаи миллии олимпии кишвар, дар намуди гӯштини юнонӣ-римӣ варзишгарони мо 3 медал ба даст оварданд. Асламҷон Азизов дар вазни 45 кг сазовори медали биринҷӣ шуд. Ӯ дар даври муқаддамотӣ бар варзишгари мизбон Ҳусанхон Юсуфхонов ва варзишгари Ҷопон Дайго Сакамото пирӯз шуда, ба нимфинал баромад. Дар ин давр аз варзишгари Эрон Амирризо Деҳбозоргӣ, ки медали тиллои вазни 45 килоро сазовор шуд, мағлуб гашт. Сипас, дар қувваозмоӣ барои ҷои сеюм бар варзишгари туркман Арсланбек Закирбаев ғолиб омад.

Фирӯз Мирзораҷабов дар вазни 51 кило медали нуқра ба даст овард. Фирӯз рақобатро аз даври чорякфинал оғоз карда, нахуст бар варзишгари туркман Тоҳир Шодиев, баъдан бар намояндаи Ҳиндустон Лайшрам Мейтей ғалаба карда, ба финал баромад. Дар финал аз варзишгари Ҷопон Ватару Сасакӣ шикаст хурд.

Ҳабибҷон Зуҳуров дар вазни -71 киол низ сазовори медали нуқра шуд. Ӯ низ қувваозмоиро аз даври чорякфинал оғоз карда, нахуст бар варзишгари ҳинд Дипак Дипак, баъдан бар варзишгари Эрон Масъуд Алӣ Акбар Ғафӣ пирӯз шуда, ба финал баромад. Дар қувваозмоии ниҳоӣ аз варзишгари Ҷопон Шу Ямада мағлуб гашт.

Паҳлавонони гӯштини тарзи озод бошад, як медал ба даст оварданд. Раҳмонҷон Маҳмадбеков дар вазни 110 кило медали биринҷиро ба гардан овехт. Ӯ дар даври ҳаштякфинал аз варзишгари ҳинд Кумар Анирудҳ шикаст хурда, дар қувваозмоии гузариш варзишгари Сурия Умар Саремро шикаст дод. Сипас, дар рақобат барои ҷои сеюм бар варзишгари Қазоқистон Ислом Тоҳиров ғалаба кард.

Дар мусобиқаи мазкур варзишгарони навраси қитъаи Осиё дар намуди гӯштини юнонӣ-римӣ 5 роҳхат, дар намуди тарзи озод 5 роҳхат ва дар гӯштини занона 10 роҳхат ба Бозиҳои олимпии наврасонро, ки моҳи октябри имсол дар Буэнос Айреси Аргентина доир мешавад, ба даст оварданд. Тибқи низомнома танҳо ғолибон имкони ба даст овардани роҳхатро доштанд. Мутаассифона, варзишгарони мо аз роҳхати олимпӣ бенасиб монданд.

Эзоҳи худро нависед



Рамзҳо дар расм