Дар варзишгоҳи “20-солагии Истиқлолияти Тоҷикистон”-и шаҳри Хуҷанд миёни дастаҳои “Хуҷанд”-и шаҳри Хуҷанд ва “Динамо”-и шаҳри Самарқанди Ҷумҳурии Ӯзбекистон бозии рафиқона доир гардид.

Раҷаббой Аҳмадзода, раиси вилояти Суғд, қабл аз оғози бозии футбол ҳайати меҳмонон аз вилояти Самарқандро ба вилояти Суғд хайрамақдам гуфта, иброз доштанд, ки бо сиёсати хирадмандонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Ӯзбекистон Шавкат Мирзиёев робита миёни кишварҳо аз нав барқарор гардида, муносибатҳои дӯстонаи байни вилоятҳо тақвият меёбанд.

Сипас бозии дӯстона оғоз гардида, он бо ҳуҷумҳои пайдарпайи дастаҳо ҷараён гирифт. Нахустин гол аз ҷониби бозингари меҳмонон Дилмурод Каримов дар дақиқаи 31 - ум ба дарвозаи мизбонон ворид карда шуд.

Мухлисони беш аз 20 ҳазорнафараи дастаи “Хуҷанд” ноумед нагардиданд ва ниҳоят ҳуҷумкунандаи марказӣ Ҷаҳонгир Эргашев дар дақиқаи 52 -ум тӯбро моҳирона вориди дарвозаи меҳмонон намуд.

Бо вуҷуди хатарҳои зиёди гол ба дарвозаи меҳмонон ҳисоби бозӣ то охир тағйир наёфт ва ҳамин тавр дидори дӯстона бо ҳисоби 1:1 хотима ёфт.