Дар Чемпионати Осиё-2021 оид ба бокс, ки қарор аст аз 21-уми май то 1-уми июн дар шаҳри Дубайи Аморати Муттаҳидаи Араб баргузор шавад, 14 муштзани тоҷик номнавис шудааст.

Ин мусобиқа аз рӯи 10 категорияи вазнӣ миёни бонувон ва 10 категорияи вазнӣ миёни мардон сурат мегирад.

Федератсияи бокси Тоҷикистон, ҷиҳати иштирок дар Чемпионати Осиё-2021 дар дастаи мунтахаби Тоҷикистон 14 нафарро сафарбар менамояд, ки инҳоянд: Сумайя Қосимова -51кг, Руҳафзо Ҳақназарова -51кг, Миҷгона Самадова -57кг, Шоира Зулқайнарова -60кг, Нилуфар Бобоёрова -69кг, Иззатулло Алиев -52кг, Бахтовар Сагизов -56кг, Сомон Ҳабибов -60кг, Баҳодур Усмонов -64кг, Саидикром Амонов 69кг, Мирзомуҳаммад Бахтиёр -75кг, Шаббос Негматуллоев -81кг, Ҷасур Қурбонов -91кг ва Сиёвуш Зуҳуров +91кг.

Бояд гуфт, ки дар намуди бокс ду варзишгари мо Баҳодур Усмонов дар вазни 64кг ва Шаббос Негматуллоев дар вазни 81кг роҳхати Бозиҳои олимпиро ба даст оварда, Тоҷикистонро дар Бозиҳои олимпии Токио, ки аз 23 июл то 8 августи соли 2021 баргузор мешавад, намояндагӣ мекунанд.

И. АМАКҶОНОВ, “ҶТ”