ВАРЗИШ
Сешанбе 23 Октябр 2018 11:00
4942
Дастаи яккачини наврасони 16-солаи Тоҷикистон бо медалҳои нуқраи чемпионати Осиё-2018, 10-уми октябр ба ватан баргаштанд.

Футболбозонро дар фурудгоҳи байналмилалии шаҳри Душанбе, Президенти Федератсияи футболи Тоҷикистон Рустам Эмомалӣ, раиси кумитаи кор бо ҷавонон ва варзиш Аҳтам Абдуллозода ва мухлисони бешумори варзиш пешвоз гирифтанд.

Бо ворид шудани варзишгарон ба дохили толори фурӯдгоҳ футболбозон бо нишони миннатдорӣ медали нуқраи мусобиқаро ба роҳбари Федератсияи футболи кишвар тақдим намуданд.

Баъдан барои ёдоштҳо Президенти Федератсияи футболи Тоҷикистон ва ҳайати даста ба тӯб соядаст монданд.

Дар пешгоҳи фурӯдгоҳ, ки ҳазорон дӯстдорони футбол ҷамъ омаданд, Президенти Федератсияи футболи Тоҷикистон Рустам Эмомалӣ суханронӣ намуда, ҳайати дастаи наврасони ҷумҳуриро барои бозии хуб нишон доданашон дар Чемпионати Осиё-2018 арзи сипос кард.

“Дар Чемпионати Осиё-2018 миёни наврасон, ки аз 20 сентябр то 7 октябр дар Малайзия доир гашт, тими мунтахаби кишвари мо на танҳо медалҳои нуқра, ҳамчунин роҳхат ба Чемпионати ҷаҳон-2019 (U-17) дар Перуро ба даст овард. Инчунин бо нишондоди бозии олӣ дар мусобиқа бори дигар Тоҷикистонро ба ҷаҳониён муаррифӣ намуд”, - зикр кард президенти ФФТ.

Эмомалӣ Аҳмадхон сардори дастаи наврасон миннатдориашро ба пешвозгирандагон, мухлисони футболи тоҷик, инчунин донишҷӯёни макотиби олии мамлакат, ки бо вуҷуди ҳавои боронӣ ба фурӯдгоҳ омада буданд, баён намуд. Ӯ аз ҷумла гуфт: “Рақобат дар Чемпионат бароямон сахту пуршиддат буд, вале мо барои ғалаба талош кардем. Ин комёбиҳо, бешубҳа натиҷаи дастгириҳои Асосгузори сулҳу ваҳдати миллӣ, Пешвои миллат, Президенти кишвар, муҳтарам Эмомалӣ Раҳмон ва Президенти Федератсияи футболи Тоҷикистон Рустам Эмомалӣ мебошад”.

Дастаи мунтахаби наврасон аз фурӯдгоҳ ҷиҳати гулчанбар гузоштан ба пояи муҷассамаи Исмоили Сомонӣ ба майдони Дӯстӣ рафтанд. Пасон, дар Варзишгоҳи марказии ҷумҳуриявии шаҳри Душанбе барои футболбозони наврас консерти идона бо иштироки сарояндагони шинохта ва беш аз 15 000 мухлисон доир гардид.













Шаҳбози АСОМИДДИН, Толиб ФОЗИЛОВ,  “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31 1 2 3 4

Октябр 2018 c.