Гурзандози машҳури кишвар Дилшод Назаров дар асоси холҳои бадастоварда, дар барномаи "IAAF Hammer Throw Challenge" дар рӯйхати ҷаҳонии гурзандозҳо сазовори ҷои дуюм шуд.

Дилшод Назаров дар Юҷини Амрико дар мусобиқаи "Diamond League Meetings" иштирок намуда, гурзро ба масофаи 78,12 метр ҳаво дод. Ҳамчунин дар шаҳри Острави Чехия дар сабқати "55th Ostrava Golden Spike" ҳунарнамоӣ карда, натиҷаи 78,82-ро ба даст овард. Дар ҳар ду мусобиқа ҳам варзишгар соҳиби медалҳои нуқра шуд. Дар баробари ин Дилшод Назаров дар мусобиқаи "62nd Janusz Kusocinski Memorial", ки дар Полша доир гардид, иштирок карда, гурзро ба масофаи 77,20 метр ҳаво дод ва соҳиби медали биринҷӣ гардид. Дар мусобиқаи "Paavo Nurmi Games" бошад, Дилшод Назаров бо нишондоди 78,87 метр соҳиби медали нуқра гардид.

Гурзандози тоҷик дар Бозиҳои тобистонаи олимпии Рио-2016 натиҷаи беҳтарин нишон дода, соҳиби медали тилло ва қаҳрамони олимпӣ оид ба гурзандозӣ шуд. Дар баробари ин, дар Олмон гурзро ба масофаи 78,34 метр ҳаво дода, соҳиби медали нуқра шуд.
Ҷои аввал дар рейтинги беҳтарин гурзандозони ҷаҳон бо 242.89 хол насиби варзишгар аз Полша Павел Файдек гардид. Мақоми сеюмро Войтсех Новитски бо 232.63 хол ба худ ихтисос дод. Дар ҷои чорум Ашраф Элсефи (229.94 хол) аз Қатар ва дар ҷои панҷум Марсел Ломнитский (229.70 хол) варзишгар аз Словакия қарор доранд.