20 август барои мардуми тоҷик ид буд. Дар арафаи таҷлили 25-солагии Истиқлолияти кишвар бузургтарин тӯҳфа ҳам гӯем, меарзад. Тамоми мардуми тоҷику тоҷикистонӣ аввалин бор шаҳди медали тиллои бозиҳои олимпиро чашиданд. Албатта, тавассути машҳуртарин варзишгари даврони Истиқлолият – Дилшод Назаров. Аз ин рӯ, меарзид, ки дар ин рӯз фараҳу шодӣ дошт, ашки хурсандӣ рехт. Аз аввалинҳо шуда Пешвои миллат, муҳтарам Эмомалӣ Раҳмон Дилшод Назаровро бо ғолибият табрику таҳният гуфт: “Дилшод Назаров бо сазовор гардидан ба медали тиллоии ин мусобиқаи ҷаҳонӣ шаъну шарафи Тоҷикистонро ҳимоя карда, парчами давлатиро боло бардошт, ки ин ифтихори мардуми шарафманди тоҷик аст”.

Медали тиллои Дилшод Назаров барои мардуми тоҷик дар арафаи 25-солагии Истиқлолияти кишвар тӯҳфаи беҳамто аст. Мутахасиссони таҷрибадори варзиши кишвар такя ба карйераи варзишии Дилшод намуда аз миёни 7 варзишгари тоҷик, ки роҳхати Бозиҳои олимпиро ба даст оварда буданд, аз Дилшод боварии бештар доштанд. Чунки Дилшод дар баробари имкониятҳои фарох доштан таҷирибаи зиёди варзишӣ дорад. Носир Бозор, сардори Раёсати варзиш ва инкишофи тарбияи ҷисмонии Кумитаи ҷавонон, варзиш ва сайёҳӣ зимни як суҳбат пеш аз олимпиада таъкид намуда буд, ки “Дилшод Назаров дар радабандии ҷаҳонӣ миёни гурзандозон дар мақоми дуюм қарор дорад. Ӯ аз олимпиада бо медал бармегардад ва мо аз Дилшод Назаров боварӣ дорем”.

Мардуми тоҷик воқеан ҳам ташнаи медали тиллои олимпӣ буд. Инро натиҷаи Дилшод Назаров исбот намуд. Субҳи 20 август аз воситаҳои ахбори омма сар карда тамоми истифодабарандагони сомонаҳои иҷтимоӣ ин пирӯзиро ба якдигар муборак мегуфтанд. Хурсандии мардуми тоҷикро худи Дилшод ҳам қаҳрамон шудан баробар тариқи саҳифаи иҷтимоияш эҳсос намуд. Бори дигар дарк намуд, ки ӯ танҳо нест ва пушти ӯ зиёда аз 8 миллион аҳолии кишвар меистанд. Корбарони интернет дар Тоҷикистон ба хотири қаҳрамонии фарзанди миллат суханоне иншо намуданд, ки сар то по инъикосгари ҳувияти миллӣ буд:  “Ин аст хушбахтӣ, сарфарозӣ, миллатдорӣ ва ватандорӣ”. “Имрӯз ва чанд рӯз баъди дигар тоҷикону Тоҷикистониён тӯй доранд. Туйи олимпӣ. Ба шарафи гурзандози машҳури тоҷик Дилшод Назаров, ки ба мардуми тоҷик аввалин медали тиллои олимпиро ҳадя кард. Худоро шукри беадад, ки сари миллати тоҷикро ба осмон расонд. Ин медали деринтизор қалби ҳазорон мардуми сарбаланди тоҷикро шоду масрур кард... Зиҳӣ Дилшод - қаҳрамонписари номовари тоҷик!!!!!”, “... Ҳаёти ин ҷавонмард ва талошҳои милливу меҳанияш бояд мавриди мутолеа қарор гирад. Ин шери тоҷик бори дигар нишон дод, ки мо миллати бенишону нотавон нестем. Офарин каҳрамони миллӣ!!!!!!!!!!!!!!! Туро барои ватандориву ватанхоҳият ҳифз хоҳем кард ва дӯст хоҳем дошт”...
Дилшод Назаров набояд варзишгари шаҳру ноҳияи алоҳида бошад. Чунки ӯ дар мусобиқаҳо варзиши Тоҷикистонро муаррифӣ мекунад. Аз ҷониби дигар, варзишгарро дар хориҷ аз кишвар бо номи кишвараш мешиносанд, на шаҳр ё деҳааш. Дилшод Назаров дар Бозиҳои олипии Рио-2016 варзишгари Тоҷикистон муаррифӣ шуд.
  
Албатта, ҳар тоҷик метавонад бо Дилшод Назаров ифтихор дошта бошад, аммо ӯ дигар мутааллиқ ба ҳар гӯшаву канори Тоҷикистон аст, на аз кадом шаҳру ноҳияи алоҳида. Чунки ӯ Тоҷикистонро намояндагӣ мекард, на як қисми онро. Худи Дилшод ҳам дар суҳбаташ хубтар гуфтааст, ки “Муваффақияти ман танҳо аз худам нест, он дастоварди 8 миллион аҳолии Тоҷикистон аст, чунки дастгирии онҳоро ман ҳар лаҳза эҳсос мекардам.”

Дилшод Назаров аз моҳи январи соли 2014 то имрӯз муовини раиси Кумитаи ҷавонон, варзиш ва сайёҳии Тоҷикистон мебошад ва ҳамзамон раисии Федератсияи варзиши сабуки Тоҷикистонро бар уҳда дорад. Имрӯз масъули назорати тамоми мактабҳои ҷумҳуриявӣ ва ҳатто тамомои клубҳову марказҳои тамринӣ Дилшод Назаров аст. Пешвои миллат бовар карда, ин масъулияти азимро ба ӯ супурдааст.

Дилшод Назаров аз тамоми имкониятҳо бархурдор аст, давлат ва Ҳукумати кишвар, хусусан Пешвои миллат, муҳтарам Эмомалӣ Раҳмон ба тамоми варзишгарон, аз ҷумла ба Дилшод таваҷҷуҳи хоса доранд, варзишгарони мо дигар чун солҳои пеш вобастаи ягон шахсу гурӯҳ нестанд. Имрӯз Ҳукумати кишвар тамоми имкониятҳоро дорад, ки варзишгаронро пурра барои мусобиқаҳо омода созад. Пешвои миллат, муҳтарам Эмомалӣ Раҳмон ба ин соҳа бевосита таваҷҷуҳ доранд ва онҳоро ҳамаҷониба дастгирӣ менамоянд. Ташкили Ҷоизаи махсуси Президенти кишвар дар соли 2015 барои варзишгарон ҳамчун идомаи дастгирии соҳаи варзиш намунаи олии таваҷҷуҳ ба варзишгарон мебошад. Албатта, ин ҳама имконот самараи Истиқлолияти давлатӣ ва Ваҳдати миллӣ дар Тоҷикистони азиз мебошад. Ба андешаи Дилшод Назаров ҳам ғалабаи ӯ дар ин ҳамоиши бузурги варзишӣ бо шарофати ваҳдату истиқлол ва дастгирию ғамхориҳои Пешвои миллат, муҳтарам Эмомалӣ Раҳмон ба даст омадааст: “Маҳз талошҳову ташаббусҳои Пешвои миллат, муҳтарам Эмомалӣ Раҳмон боис гардид, ки соҳаи варзиш дар ҷумҳурӣ рушд карда, варзишгарон дар мусобиқаҳои гуногуни сатҳи ҷаҳонӣ иштирок карда, соҳиби ҷойҳои ифтихорӣ мегарданд”.

Табиати мо чунин аст ё намедонам чӣ сабаб бошад, ки агар касе муваффақ шуд, кӯшиш мекунем, ки дар муваффақияти ӯ саҳм доштани худро махсус эълон кунем. Аммо агар ӯ муваффақ нашуд, айбро дар масъулин меҷӯем. Агар Дилшод ҳам муваффақ намешуд, ман бовар дорам, ки айнан чунин мешуд. Ҳатто ба сангандозии масъулини соҳаи варзиш қабл аз оғози ин мусобиқа сар карда буданд. Пас аз он ки Дилшод қаҳрамони Бозиҳои олимпӣ гашт, баъзеҳо кӯшиш доранд, инро аз дастгирии ночизи худ вобаста донанд.  

Аммо Дилшод Назаров варзишгари Тоҷикистон ва ифтихори миллат аст...