Дар Ҷоми ҷаҳон оид ба каратэ-до варзишгарони тоҷик ду медали тилло ба даст оварданд.

Мусобиқаи мазкур дар шаҳри Батуми давлати Гурҷистон миёни наврасону калонсолон бо иштироки  800 варзишгар аз 30 кишвари дунё баргузор гардид.

Тоҷикистонро дар Ҷоми ҷаҳон-2016 ду варзишгар-Далер Баротов ва Алишер Қаюмов муаррифӣ намуданд. Далер Баротов дар вазни 60 кило миёни варзишгарони синашон аз 18 боло ҳунарнамоӣ карда мақоми аввалро соҳиб гашт. Миёни варзишгарони наврас дар вазни 70 кило Алишер Қаюмов медали тиллоро ба гардан овехт.

Варзишгарони тоҷик баъди ин натиҷа ба мусобиқаи қаҳрамонии Осиё, ки дар  Индонезия баргузор мегардад, омодагӣ мегиранд.

Варзишгарони тоҷик дар Чемпионати ҷаҳон, ки моҳи сентябр баргузор гашта буд бо панҷ медал -Шероз Икромов дар вазни то 84 кило тилло, Сафаралӣ Давлатов дар вазни то 67 кило нуқра ва миёни наврасони синашон  16-17-сола Мурод Назаров вазни  55 кило, Ҳоҷиқурбон Маҳмадов  вазни 52 кило биринҷӣ ва Бадриддин Умедов вазни беш аз 84 кило миёни калонсолон медали биринҷиро соҳиб гардиданд.