Майдони сабз маконе аст, ки ҳар шахс метавонад бо ворид шудан ба он машҳури ҷаҳон гардад. Қаҳрамони навбатии мо Эден Азар, футболбози 26-солаи белгиягӣ аст. Ҷавоне, ки дар ҳоли ҳозир яке аз футболбози калидии дастаи “Челсӣ” ва тими мунтахаби Белгия маҳсуб меёбад. Эден наметавонист дар мавсимҳои гузашта бозии худро дар майдон нишон диҳад ва худи ӯ мегӯяд: “Ду сол пеш ман на он қадар таҷрибаи хуби футболбозӣ доштам ва наметавонистам дар даста натиҷаи беҳтар нишон диҳам. Айни ҳол аз таҷрибаи омӯхтаам гуфта метавонам, ки дар ҳолати хуби футболбозӣ қарор дорам ва танҳо барои ғолибияти тимам талош меварзам”.

Дар мавсими 2015/16 мағлубиятҳои пай дар пайи тими “Челсӣ” дар лигаи Англия ва ба ягон дастовард соҳиб нашудани онҳо роҳбарияти клубро водор намуд, ки сармураббиро аз вазифа сабукдӯш намоянд. Барои дастаи лондониҳо сармураббие лозим буд, ки тимро қаҳрамони Англия намояд. Бошгоҳи “Челсӣ” барои дастаро аз ин мағлубиятҳо баровардан Антонио Конте, мутахассиси 41- солаи италиёвиро сармураббии нави тимаш таъин намуд. Роҳбари тозаинтихоб барои ба даст овардани қаҳрамонии Англия мебоист аз футболбозони ҷавону ботаҷриба, ба мисли Эден Азар истифода бурда, мақсади дарпешгузоштаашро амалӣ намояд. Конте мегӯяд: “Эден Азар яке аз футболбозӣ калидии даста маҳсуб меёбад. Ӯ дар майдон метавонад, гоҳ дар хати ҳамла, гоҳ дар хати ниммуҳофизат бозии олӣ нишон диҳад”.

Шуруъ аз мавсими 2016/17 Эден Азар яке аз футболбозони ҳайати асосии тими “Челсӣ” ва барои рақибон яке аз бозингарони хавфноктарин ба ҳисоб мерафт. Азар аз 4 июни соли 2012 шомили дастаи “Челсӣ” гардидааст. Ин 4-умин мавсим аст, ки ӯ дар ин тим ҳунарнамоӣ мекунад. Сеск Фабрегас, нимҳимоятгари дастаи “Челсӣ” дар бораи ҳамдастааш мегӯяд: “Дар ҳоли ҳозир Эден Азар яке аз футболбози беҳтарини сайёра ба шумор меравад”. Ин гуфтаҳои ҳамдастааш бемаврид нестанд. Зеро дар мавсими хариду фурӯши тобистонаи (трансфер) соли 2017, яке аз дастаҳои бонуфузтарини қораи Аврупо - тими “Реал Мадрид”-и Испания ӯро бо маблағи 105 миллион доллар харидор шуд. Роҳбари дастаи “Реал Мадрид”, футболбози машҳури франсузӣ Зайниддин Зидан дар бораи бозии Азар мароқ зоҳир намуда мегӯяд: “Эден дар майдон футболбози пурқудрат ва чусту чолок аст. Дар оянда ӯ яке аз футболбозони беҳтарини ҷаҳон мегардад. Ман омодаам, ӯро ба дастаи “Реал Мадрид”, бе ягон фикру андеша, қабул намоям”.

Натиҷаҳои нишондодаи Эден дар ин мавсим барои Антонио Конте, сармураббиаш чунон арзишнок аст, ки намехоҳад яке аз фавориди дастаашро ба тими “Реал” фурӯшад. Конте барои мондани ӯ дар даста ба роҳбари бошгоҳи дастаи “Челсӣ” Рома Абрамович иброз доштааст, ки, Азар яке аз беҳтарин шогирдонаш мебошад ва намехоҳад, ӯро ба дигар даста интиқол диҳад.

Нимҳимоятгари дастаи “Челсӣ” Эден Азар аз сармураббии ҳозираи дастааш Антонио Конте бисёр қаноатманд аст, зеро ӯ буд, ки Азарро дар як мавсим гирди забони сармураббиён ва коршиносони соҳа гардонд. Азар бо роҳбарии Конте ҳолати ҳозираи дастаашро чунин фикр менамояд: “Ман имрӯз дар ҳолати хуби футболбозӣ қарор дорам ва барои ин ба Антонио Конте изҳори миннатдорӣ менамоям, зеро ба ҳама маълум буд, ки дар мавсими гузашта ман ба нокомиҳои зиёд рӯ ба рӯ гардидам. Дар ҳоли ҳозир, назар ба давраи Жозе Моуриниё (собиқ сармураббии дастаи “Челсӣ”, солҳои 2013/2015), на танҳо ман, балки тамоми бозингарони даста дар ҳолати хуби бозӣ қарор доранд. Вақте як нафар бо ту кор мекунаду меҳнати туро қадр менамояд, ту бояд кӯшиш менамоӣ, то боз беҳтар натиҷа нишон диҳӣ. Вақте як шахс ба ту дар бораи бозиат сухан намекунад, ин шаҳодат медиҳад, ки ту сазовори бозӣ нестӣ. Антонио Конте бисёр дар бораи бозии ман сухан мегӯяд, вақте тӯб дар дасти рақиб аст, вай мехоҳад, дарвозаро ҳимоя намоям. Ҳар он гоҳе ки тӯб дар дасти мост, ӯ мегӯяд, ки ҳамлаи головар анҷом диҳам. Пас аз ин суханҳо худамро дар майдон озод ҳис менамоям ва танҳо барои ғалаба ҳаракат мекунам”.

Эден Азар 7 январи соли 1991 дар шаҳри Лалувери Белгия, дар оилаи футболбоз ба дунё омадааст. Падараш Терри, нимҳимоятгари дастаи “Луверос” буд. Ин тим дар лигаи дуюми Белгия рақобат менамуд. Модараш Катрин ҳам ҳамлагари лигаи аввали тими занонаи Белгия буд.

Азар карйераашро бори нахуст аз дастаи “Ройял Стад Браин” оғоз намудааст. Баъдан дар синни ҳафтсолагӣ ба дастаи “Тюбиз” мегузарад. Бо ин даста Азар дар мусобиқаҳои шаҳрӣ бозӣ мекарданд. Маҳорати хуби футболбозии ӯро яке аз менеҷерони дастаи “Липл”-и Фаронса дида, барои харидорӣ мароқ зоҳир мекунад. Пас аз гуфтушунидҳо Эден соли 2005 ба академияи тими “Лилл” мепайвандад. Таи ду сол дар ин бошгоҳ тамрин намуда, 28 майи соли 2007 нахустин шартномаи касбиашро ба муҳлати 3 сол бо ин даста мебандад.
Мавсими 2009/10 барои Азар бобарор анҷом ёфт. Дар ин мавсим ӯ ҳамчун як футболбози ояндадор ба майдон баромад. Пас аз ин мавсим дастаҳои пурқуввати Аврупо, ба мисли “Арсенал”, “ Манчест Юнайтед”, “Реал”, “Барселона” ва дигарон барои харидории ӯ талош меварзанд. Дар ин рақобат ниҳоят тими “Челсӣ”-и Англия соли 2012 пирӯз мешавад ва ин футболбози 21-солаи белгиягиро шомили дастааш мекунад. Дар се бозии аввалини мавсими 2012 Азар пай дар пай футболбози беҳтарин эътироф мегардад ва дар таърихи пример лигаи Англия номашро сабт менамояд.

Дар тими мунтахаби Белгия соли 2008 шомил мегардад ва айни ҳол ба ҳайси сардори даста ба майдон мебарояд. Эден то имрӯз 500 бозӣ анҷом дода, зиёда аз 150 гол задааст. Дар чемпионати Фаронса бо тими “Лилл” мавсими соли 2010/11 қаҳрамонӣ ва соли 2011 Ҷоми Фаронсаро ба даст овардааст. Бо тими “Челсӣ”-и Англия як маротиба Қаҳрамони премер-лига 2014/15, як дафъа Ҷоми футболи лигаи Англия-2015 ва як маротиба Лигаи Қаҳрамонҳоро соли 2013 ба даст овардааст.

Шаҳбози АСОМИДДИН, "ҶТ"