Пас аз таҷлили ботантани Рӯзи варзишгарон дар санаи 10 августи соли 2018 дастаи мунтахаби Тоҷикистон иборат аз 105 нафар, аз ҷумла 81 варзишгар ҷиҳати иштирок дар 18-ум Бозиҳои Осиё ба Индонезия сафарбар гардиданд. Аз 18 август то 2 сентябри соли 2018 варзишгарони қораи Осиё аз рӯи 41 намуди варзиш барои ба даст овардани ҷойҳои ифтихорӣ дар шаҳрҳои Ҷакарта ва Палембанги Индонезия талош намуданд. Варзишгарони мо аз рӯи 16 намуди варзиш дар бозиҳо иштирок карда, сазовори 7 медал – 4 нуқра, 3 биринҷӣ – шуданд. Медалҳои нуқраро Дилшод Назаров (варзиши сабук, гурзандозӣ), Шаҳриёр Даминов (қайиқронӣ, С-1 1000 метр), Беҳрӯз Хоҷазода (кураш, -81кг), Умед Ҳасанбеков (самбо, -90кг) ва медалҳои биринҷиро Комроншоҳ Устопириён (дзюдо, самбо, -90кг) ва Шакармамад Мирмамадов (дзюдо, +100кг) сазовор гардиданд (Мутаассифона, баъдан Умед Ҳасанбеков бо сабаби истифодаи доруҳои мамнуъ аз ҷониби Федератсияи байналмилалии самбо ҷазо гирифт ва аз медал маҳрум шуд).

Пас аз Бозиҳои Осиё моҳи октябр дар шаҳри Буэнос Айреси Аргентина Бозиҳои тобистонаи олимпии наврасон баргузор шуд, ки дар он 3 варзишгари мо иштирок намуданд.

Баъдан омодагӣ ба Бозиҳои олимпии Токио-2020 шурӯъ гардид, ки ҳоло идома дорад. Кумитаи миллии олимпии Тоҷикистон, Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва федератсияҳои варзишӣ ба таҳлилу хулосабарории натиҷаи варзишгарон пардохтанд.

Моҳи январи соли 2019 бо роҳбарии муовини Сарвазири ҷумҳурӣ Азим Иброҳим ҷаласаи Шӯрои тарбияи ҷисмонӣ ва варзиши назди Ҳукумати ҷумҳурӣ баргузор гардид ва назди масъулони соҳа ҷиҳати омодагӣ ва ба даст овардани роҳхат ба Бозиҳои олимпии Токио-2020 як қатор вазифаҳо гузошта шуд. Дар пасманзари ин ҷаласа аз ҳисоби масъулони соҳа ва сармураббиёни дастаҳои мунтахаб гурӯҳи кории омодагӣ ба Бозиҳои олимпии Токио-2020 таъсис ёфт ва то моҳи апрел 12 ҷаласа баргузор карда, имконияту шароити федератсияҳо ва варзишгаронро таҳлилу хулосабарорӣ кард. Дар натиҷа, миёни Кумитаи миллии олимпии Тоҷикистон, Кумитаи кор бо ҷавонон ва варзиш ва 5 федератсия – намудҳои афзалиятдоштаи варзиш: дзюдо, варзиши сабук, қайиқронӣ, гӯштин ва бокс нақшаҳои сеҷонибаи маблағгузории аъзои дастаи мунтахаб ҷиҳати иштирок дар мусобиқаҳои байналмилаливу литсензионӣ ба тасвиб расид. Ҳаҷми умумии маблағи пешбинишуда дар доираи нақшаҳои имзошуда 4,5 миллион сомониро ташкил медиҳад.

Кӯшишу ғайрати варзишгарони мо аз аввали сол мушоҳида шуд. Тими мунтахаби олимпии Тоҷикистон оид ба футбол моҳи январ дар Ҷоми “Чор миллат”, ки дар Қатар баргузор шуд, ғолиб гардид. Даста бо роҳбарии сармураббӣ, мутахассиси ӯзбекистонӣ Усмон Тошев дар Туркия ва Душанбе ба марҳилаи интихобии Чемпионати Осиё-2020 омодагӣ дид, ки дар Тошканд доир гашт. Дар гурӯҳи “F” тими олимпии мо бо дастаҳои Ӯзбекистон ва Ҳиндустон майдондорӣ кард, вале натавонист ба марҳилаи финалии Чемпионати Осиё-2020 роҳхат гирад. Чемпионати Осиё миёни ҷавонони то 23-сола моҳи январи соли оянда дар Тайланд баргузор мешавад ва се дастаи беҳтарин ҳаққи иштирок дар Бозиҳои олимпии Токио-2020-ро ба даст меоваранд.

Натиҷаҳои варзишгарони мо дар дигар намудҳо нисбат ба солҳои қаблӣ беҳтар аст. Соли равон Дилшод Назаров (гурзандозӣ) ва Баҳодур Усмонов (бокс) ба дарёфти унвони чемпиони Осиё сазовор гардида, Комроншоҳ Устопириён ва Темур Раҳимов (дзюдо) ба гирифтани медали нуқраи Чемпионати Осиё мушарраф шуданд. Комроншоҳ ва Темур, ҳамчунин медалҳои биринҷии Гран Прии Анталия ва Марокашро ба даст оварданд. Беҳрӯз Хоҷазода (дзюдо) бошад, бори аввал дар таърихи варзиши кишвар медали Гранд Сламро сазовор гашт. Ӯ дар Гранд Слами Екатеринбург медали биринҷӣ ба гардан овехт.

Натиҷаи варзишгарони мо дар варзиши сабук низ беҳтар гардид ва соли равон дар мусобиқаҳои гуногун иштирок карда, сазовори ҷойҳои намоён шуданд. Аз ҷумла, ҳунари Гулсунбӣ Шарифова дар дав ба масофаҳои 200 ва 400 метр сутуданист. Умед аст, ки дар мусобиқаҳои оянда натиҷаашро боз ҳам беҳтар карда, меъёри муайянкардаи Ассотсиатсияи байналмилалии федератсияҳои варзиши сабукро ҷиҳати ба даст овардани роҳхати олимпӣ иҷро мекунад. Умуман, ба иқрори сармураббии дастаи мунтахаби варзиши сабуки кишвар Ғайрат Неъматов 90 фисад варзишгарони мо соли равон натиҷаҳояшонро беҳтар карданд.

Дастоварди варзишгарони мо миёни наврасону ҷавонон низ хуб аст. Миёни наврасон соли равон Ғаниҷон Ғаниев дар намуди дзюдо ва Фирӯз Мирзораҷабов дар намуди гӯштини юнонӣ-римӣ чемпиони Осиё гардиданд. Бори аввал дар таърихи варзиши кишвар Шероз Очилов ва Фирӯз Мирзораҷабов дар Чемпионати ҷаҳон оид ба гӯштини юнонӣ-римӣ миёни наврасон соҳиби медал (як нуқра, 1 биринҷӣ) шуданд. 

Умуман, тавре раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, муовини Президенти Кумитаи миллии олимпии Тоҷикистон Абдуллозода Аҳтам зимни нишасти матбуотӣ хабар дод, варзишгарони кишвар дар шашмоҳаи аввали соли 2019 аз мусобиқаҳои байналмилалӣ 231 медал ба хазинаи варзиши кишвар ворид намуданд, ки нисбат ба нимсолаи аввали соли 2018 134 медал зиёд мебошад. Аз ҷумла шумораи медалҳои намудҳои олимпии варзиш дар шаш моҳ ба 134 адад (51 тилло, 9 нуқра, 74 биринҷӣ) мерасад, ки нисбат ба ҳамин давраи соли 2018 67 медал зиёд аст.

Дар як соли охир, дар доираи барномаҳои Ҳамбастагии олимпӣ, ҳамчунин як қатор семинару давраҳои омӯзишӣ, чорабиниҳои оммавӣ ва солимгардонӣ, мисли машқҳои пагоҳирӯзӣ ҳар рӯзи шанбе, дав ва веломарафони наврӯзӣ, Дави миллӣ ва марафони велосипедронӣ, Рӯзи олимпӣ баргузор шуданд. 

Хулоса фазои олимпии кишвар дар як соли охир пурхуруш буд ва то 32-юм Бозиҳои тобистонаи Олимпиада, ки аз 24 июл то 9 август дар шаҳри Токиои давлати Ҷопон баргузор мешавад, пурталотумтар хоҳад гашт.

Бо умеди дастоварди варзишгарони тоҷик дар Бозиҳои олимпии Токио-2020, ки дар арафаи Рӯзи варзишгарони Тоҷикистон доир мегардад.

Умаралӣ САФАРАЛӢ,
мутахассиси Бахши коргузорӣ ва таҳлилу 
иттилооти Кумитаи миллии олимпии Тоҷикистон