ВАРЗИШ
Якшанбе 08 Сентябр 2024 04:46
![10205](/upload/iblock/adb/%D0%93%D1%80%D0%B0%D0%BD%D0%B4%D1%81%D0%BB%D0%B0%D0%BC.jpg)
Аз нақши он дар муаррифии кишвар то интизориҳо аз ҷудочиёни меҳан
То оғози Гранд Слами Душанбе камтар аз як моҳ боқӣ мондааст. Гранд Сламе, ки метавонад ба шуҳрати варзишии Тоҷикистон шуҳрати дигаре зам намояд.
Мусобиқаи мазкур аз 3-юм то 5-уми май дар пойтахти Тоҷикистон – шаҳри Душанбе баргузор мегардад. Дар матлаби мазкур хостем ба чанде аз масъалаҳои муҳим ва зарурии баргузории Гранд Слами Душанбе рӯ оварда бошем. Мусобиқаи мазкур чӣ манфиатҳо ба кишвари мо дорад? Таъсири майдонҳои хонагӣ ба варзишгарон чӣ гуна хоҳад буд? Муҳиммияти мусобиқаи мазкур барои Бозиҳои олимпӣ чист?
Эргаш Маҳмадбеков, ноиби президенти Федератсияи ҷудои Тоҷикистон қайд кард, ки айни замон марҳилаи номнависӣ ба мусобиқаи Гранд Слами Душанбе ҷараён дорад. Дар айни ҳол шумораи умумии тимҳои иштирокчиёни мусобиқаи мазкур ба таври дақиқ муайян нашудааст. Ӯ дар идома ҳамчунин гуфт, ки дар ҳоли ҳозир зиёда аз 40 кишвар барои иштирок дар мусобиқаи Гранд Слами Душанбе номнавис шудаанд.
- Хубии баргузории Гранд Слам дар кишвар дар он аст, ки давлати мизбон имкон дорад, то дар ҳар як вазн то чаҳор нафар варзишгарро ба майдон ворид созад. Ин шонси варзишгарони моро барои ба даст овардани медал бештар месозад. Айни замон, ки Тоҷикистон мизбони сабқати мазкур мегардад, метавонем дар ҳар як вазн ҳам миёни мардон ва ҳам миёни бонувон то чаҳор варзишгарро ба майдон оварем,- гуфт Эргаш Маҳмадбеков.
Номбурда ҳамчунин дар идомаи суҳбати хеш мусобиқаи мазкурро баҳри ба даст овардани холҳои олимпӣ бисёр зарурӣ шумурда, қайд кард, ки ба ҳар яке аз ғолибони ин мусобиқа 1000 холи олимпӣ дода мешавад, ки ин чиз барои варзишгарон бисёр муҳим мебошад.
- Аз Гранд Слам ҳар як варзишгар барои дарёфти ҷойи аввал 1000 холи олимпӣ, ҷойи дуюм 700 ва ҷойи сеюм 500 холи олимпиро сазовор мегардад, - қайд кард ҳамсуҳбати мо.
Дар ҳамин ҳол ҳамсуҳбати дигари мо Муродалӣ Тешаев, шореҳи гӯштини ҷудо ин нуктаро тасдиқ карда, ҳамчунин қайд кард, ки ҳоло мо дар замони наздик ба Бозиҳои олимпӣ қарор дорем, варзишгаронро мебояд ҳарчи бештар холҳои зиёдтареро барои роҳхат ба ин мусобиқаи бошукӯҳи сатҳи ҷаҳонӣ сазовор гарданд. Айни ҳол мусобиқаи Гранд Слами Душанбе чунин имкониятро ба варзишгарон фароҳам овардааст. Бинобар ин, ҳеҷ яке аз паҳлавонон аз чунин мусобиқа рӯй намегадонанд. Ҳамсуҳбати мо ба чунин бовар аст, ки Душанбешаҳр мизбони яке аз мусобиқоти ҷаҳонии бошукӯҳе хоҳад гашт, ки дар он ситораҳои рақами яки олами ҷудо меҳмон мешаванд.
- Душанбешаҳр мизбони як мусобиқаи сатҳи ҷаҳонии дигар мешавад ва тавассути он мо метавонем кишвари худро ба ҷаҳониён ҳамчун давлати варзишдӯст муаррифӣ намоем. Ин мусобиқа барои рушди варзиши ҷудо дар Тоҷикистон таблиғоти хубе хоҳад буд,- қайд кард ӯ.
Муродалӣ Тешаев дар ҳамин ҳол аз Гранд Прии Душанбе ёдовар шуд, ки мизбонии онро Тоҷикистон ба зимма дошт. Ӯ гуфт, ки мусобиқа дар дохили кишвар ба мо имтиёзҳои хуберо рақам зад. Барои мисол, дар сабқати мазкур кишвари мо сазовори 7 медал гардид, ки ин нишондоди таърихӣ ба ҳисоб мерафт. Ба назари ӯ рақобат дар майдони хонагӣ имсол ҳам ба варзишгарони мо шонси хубе хоҳад дод, то онҳо аз Гранд Слам низ нишонҳои арзандаро сазовор гарданд.
- Агар дар ёд дошта бошед, соли 2023, ки аввалин маротиба шаҳри дилорои Душанбе Гранд Приро истиқбол гирифт, нишон дод, ки паҳлавонони мо дар иҳотаи мухлисон чи гуна хуб медурахшанд. Яъне, ин аввалин таърихнависӣ буд, ки паҳлавонони мо яку якбора нишонҳои тилло, нуқра ва биринҷии мусобиқаро ба хазинаи варзишии тоҷик ворид сохтанд. Ин ҳама агар аз як ҷиҳат талошу заҳмати варзишгарон ва мураббиёни онҳо бошад, аз тарафи дигар неруву ангезае буд, ки ҳаводорон ва дилбохтагони ҷудои кишвар дар дили варзишгаронамон ҷой доданд. Ҳар як ҳаводор аз сидқи дил варзишгарони меҳанро дастгирӣ карда, ба онҳо бештар ангеза бахшиданд, -мегӯяд Тешаев.
Барои кишвари мо манфиатовар ва фоиданок будани ташкили чунин як сабқати ҷаҳониро Эмомалии Нуралӣ, варзишгари бомаҳорати кишвар низ тасдиқ карда, қайд кард, ки баргузории чунин мусобиқаҳои бошукӯҳ дар меҳан ҳам барои рушди варзиш дар кишвар ва ҳам барои варзишгарон муфид мебошад. Ӯ мегӯяд, варзишгарон метавонанд, аз ин мусобиқа ба худ таҷрибаҳои заруриро касб намоянд, ки дар рақобатҳои минбаъда ба онҳо лозим хоҳад шуд. Дар баробари ин, орзуи ҳар як варзишгар аст, ки дар кишвараш чунин мусобиқоти сатҳи баланд баргузор гардад.
- Ба фикри ман мусобиқаи мазкур хеле дар сатҳи олӣ баргузор хоҳад шуд. Зеро ин аввалин маротиба аст, ки дар кишвари мо Гранд Слам доир мегардад. Мардуми мо, ки худ дӯстдори варзишанд, бо ташрифоварӣ ва ҳаводорӣ дар майдон хеле фазои зебоеро ба вуҷуд хоҳанд овард. Соҳиби майдон будан худ ҳамин чиз аст. Барои варзишгарон низ иқдоми наҷиб аст, ки дар майдони хонагии худ бо ҳарифон сабқат намоянд. Варзишгар чуноне ки худро дар хонааш роҳат ҳис мекунад, дар ҷойи бегона чунин эҳсосро ҳаргиз дошта наметавонад. Фикр мекунам эҳсоси хуб доштан пеш аз мусобиқа ин нисфи пирӯзии як варзишгар мебошад, - мегӯяд Эмомалӣ.
Дар такя ба суханони Эмомалии Нуралӣ, ҳамчунин Сомон Маҳмадбеков низ ин нуктаро ба хубӣ дарк карда, ишора кард, ки ташкил ва баргузории Гранд Слам дар Душанбе ҳам барои давлат ва ҳам барои варзишгарон бисёр муҳим ва саривақтӣ аст. Ӯ мегӯяд, вақте соли қабл дар кишвар Гранд Прӣ баргузор гардид, мардуми зиёде аз манотиқи гуногуни олам огоҳ шуданд, ки гӯштини ҷудо дар Тоҷикистон тарафдорони зиёде дорад. Дар баробари ин, агар Гранд Сламро низ дар сатҳи баланд баргузор намоем, кишвари мо ба ҷаҳониён ҳамчун давлати варзишдӯстдор бештар муаррифӣ хоҳад шуд.
Сомон мегӯяд, гарчанде айни замон тими мунтахаби кишвар дар сабқати мазкур муайян нашудааст, аммо бисёр мехоҳад, то дар ҳайати ин тим ҷой гирад ва дар Гранд Слами Душанбе ҳунарнамоии арзандае нишон диҳад.
- То ҳол ҳайати мунтахаби кишвар барои ин мусобиқа муайян нашудааст. Аммо бисёр мехоҳам дар Гранд Сламе, ки кишвари азизамон баргузоркунандаи он аст, иштирок варзам. Зеро як сол қабл дар Гранд Прии Душанбе сазовори нишони тилло шудам ва ин маротиба ҳам нақша дорам, нишони тиллои Тоскулоҳи Бузург-ро дар ватанамон нигоҳ дорам, - мегӯяд Сомон.
Дар ҳамин росто Муродалӣ Тешаев бо таҷрибае, ки дар ин самт дорад, варзишгаронеро, ки дар Гранд Слами Душанбе имконияти бештари ба даст овардани медалро доранд, номбар кард. Ба андешаи ӯ ин мусобиқа барои варзишгарон тоҷик бо натиҷаҳои назаррас бояд ҷамъбаст гардад.
- Ман ба ҳамаи варзишгарони меҳан боварӣ дорам. Дар ин росто дар вазни зери 66 кг Эмомалии Нуралӣ паҳлавони хуштолеи меҳан аст, ки умеди комил дорам, дар Гранд Слами Душанбе тиллоӣ хоҳад шуд. Обид Ҷебов низ дар ин вазн шонси хуб дорад ва метавонад, ки ҳунари ҷолибе нишон диҳад. Дар вазни зери 73 кг Беҳрӯз Хоҷазода ва Абубакр Шеров паҳлавонони умедбахши кишварро метавон ном бурд. Абубакр айни замон барои ба даст овардани медал дар Гранд Слами Душанбе хеле довталаби хуб аст. Дар вазни зери 81 кг Сомон Маҳмадбеков шонси хуб дорад. Зери вазни 90 кг ба ҳисоби миёна ба Комроншоҳи Устопириён боварӣ дорам. Зеро синну соли Комроншоҳ боло рафтааст ва охирон мусобиқаҳо нишон медиҳад, ки ҳарчанд ин варзишгари шинохтаи меҳан хизматҳои бузург дар самти варзиши кишвар кардааст, аммо он Комроншоҳи пештара нест. Дар ин вазн ҳамчунин Шодмон Ризоев низ метавонад, рақобати хубе нишон диҳад. Дар вазни то 100 кг бошад, бештар ба Ҷаҳонгир Маҷидов умед дорам. Дар вазни ҷамъи 100 кг муддаии асосӣ аз Тоҷикистон ин Темур Раҳимов аст. Вале роҳи Темур низ саҳлу сода нест. Зеро рақибони ӯ низ дар ин вазн ҳарифони пурқуввате ба ҳисоб мераванд, - мегӯяд Муродалӣ Тешаев.
Аз миёни нафароне, ки Тешаев номбар кард, Эмомалии Нуралӣ варзишгари ҷавону бомаҳорати кишвар дар Гранд Слами Душанбе иштирок нахоҳад кард. Ӯ ин нуктаро зимни суҳбат бо мо ишора кард. Сабаби иштирок накардан дар Гранд Слами Душанберо Эмомалӣ чунин баён дошт:
- Бо вуҷуди он ки бисёр мехостам дар аввалин Гранд Сламе, ки кишварамон онро баргузор мекунад, иштирок намоям, аммо ин фурсат ба ман даст надод. Сабаби иштирок накарданам ин аз меъёри муқарраршуда каме зиёд будани вазнам аст. Дар баробари ин, ҳамчунин мусобиқаи Чемпионати ҷаҳон дар пеш аст, ки бо Гран Слами Душанбе қариб, ки дар як вақт баргузор мегардад ва ман низ иштирокчии он ҳастам. Бинобар ин, наметавонам, ки яку якбора худро ба ҳардуи ин мусобиқоти муҳим омода намоям.
Пеш аз баргузории Гранд Сламҳои гуногун тими мунтахаби мо ба машқҳои дастаҷамъӣ ҷалб карда мешаванд. Ин навбат низ то оғози Гранд Слами Душанбе роҳбарияти Федератсияи ҷудои кишвар нақша дорад, то бо варзишгарон машқҳои дастаҷамъӣ ташкил намояд. Дар ин бора Эргаш Маҳмадбеков, ноиби президенти Федератсияи ҷудои Тоҷикистон зимни суҳбат бо мо иброз дошт. Ӯ гуфт, ки пеш аз оғози ин мусобиқаи бошукӯҳ дар кишвар ҳатман дар дохили ҷумҳурӣ бо ҷалби варзишгарон чунин машқҳои дастаҷамъиро ташкил ва баргузор хоҳанд кард.
Мо низ бо умеди натиҷаҳои назарраси тими мунтахаби ҷудои кишвар фарорасии Гранд Слами Душанберо бесаброна интизор хоҳем шуд ва умедворем, ки мусобиқаи мазкур ҳам аз ҷиҳати ташкил ва баргузорӣ ва ҳам аз ҷиҳати ба даст овардани медалҳои сабқат барои кишварамон таърихӣ ва баёдмонданӣ хоҳад гашт.
Ҳошим РАҲМАТУЛЛОЕВ, “ҶТ”
То оғози Гранд Слами Душанбе камтар аз як моҳ боқӣ мондааст. Гранд Сламе, ки метавонад ба шуҳрати варзишии Тоҷикистон шуҳрати дигаре зам намояд.
Мусобиқаи мазкур аз 3-юм то 5-уми май дар пойтахти Тоҷикистон – шаҳри Душанбе баргузор мегардад. Дар матлаби мазкур хостем ба чанде аз масъалаҳои муҳим ва зарурии баргузории Гранд Слами Душанбе рӯ оварда бошем. Мусобиқаи мазкур чӣ манфиатҳо ба кишвари мо дорад? Таъсири майдонҳои хонагӣ ба варзишгарон чӣ гуна хоҳад буд? Муҳиммияти мусобиқаи мазкур барои Бозиҳои олимпӣ чист?
Эргаш Маҳмадбеков, ноиби президенти Федератсияи ҷудои Тоҷикистон қайд кард, ки айни замон марҳилаи номнависӣ ба мусобиқаи Гранд Слами Душанбе ҷараён дорад. Дар айни ҳол шумораи умумии тимҳои иштирокчиёни мусобиқаи мазкур ба таври дақиқ муайян нашудааст. Ӯ дар идома ҳамчунин гуфт, ки дар ҳоли ҳозир зиёда аз 40 кишвар барои иштирок дар мусобиқаи Гранд Слами Душанбе номнавис шудаанд.
- Хубии баргузории Гранд Слам дар кишвар дар он аст, ки давлати мизбон имкон дорад, то дар ҳар як вазн то чаҳор нафар варзишгарро ба майдон ворид созад. Ин шонси варзишгарони моро барои ба даст овардани медал бештар месозад. Айни замон, ки Тоҷикистон мизбони сабқати мазкур мегардад, метавонем дар ҳар як вазн ҳам миёни мардон ва ҳам миёни бонувон то чаҳор варзишгарро ба майдон оварем,- гуфт Эргаш Маҳмадбеков.
Номбурда ҳамчунин дар идомаи суҳбати хеш мусобиқаи мазкурро баҳри ба даст овардани холҳои олимпӣ бисёр зарурӣ шумурда, қайд кард, ки ба ҳар яке аз ғолибони ин мусобиқа 1000 холи олимпӣ дода мешавад, ки ин чиз барои варзишгарон бисёр муҳим мебошад.
- Аз Гранд Слам ҳар як варзишгар барои дарёфти ҷойи аввал 1000 холи олимпӣ, ҷойи дуюм 700 ва ҷойи сеюм 500 холи олимпиро сазовор мегардад, - қайд кард ҳамсуҳбати мо.
Дар ҳамин ҳол ҳамсуҳбати дигари мо Муродалӣ Тешаев, шореҳи гӯштини ҷудо ин нуктаро тасдиқ карда, ҳамчунин қайд кард, ки ҳоло мо дар замони наздик ба Бозиҳои олимпӣ қарор дорем, варзишгаронро мебояд ҳарчи бештар холҳои зиёдтареро барои роҳхат ба ин мусобиқаи бошукӯҳи сатҳи ҷаҳонӣ сазовор гарданд. Айни ҳол мусобиқаи Гранд Слами Душанбе чунин имкониятро ба варзишгарон фароҳам овардааст. Бинобар ин, ҳеҷ яке аз паҳлавонон аз чунин мусобиқа рӯй намегадонанд. Ҳамсуҳбати мо ба чунин бовар аст, ки Душанбешаҳр мизбони яке аз мусобиқоти ҷаҳонии бошукӯҳе хоҳад гашт, ки дар он ситораҳои рақами яки олами ҷудо меҳмон мешаванд.
- Душанбешаҳр мизбони як мусобиқаи сатҳи ҷаҳонии дигар мешавад ва тавассути он мо метавонем кишвари худро ба ҷаҳониён ҳамчун давлати варзишдӯст муаррифӣ намоем. Ин мусобиқа барои рушди варзиши ҷудо дар Тоҷикистон таблиғоти хубе хоҳад буд,- қайд кард ӯ.
Муродалӣ Тешаев дар ҳамин ҳол аз Гранд Прии Душанбе ёдовар шуд, ки мизбонии онро Тоҷикистон ба зимма дошт. Ӯ гуфт, ки мусобиқа дар дохили кишвар ба мо имтиёзҳои хуберо рақам зад. Барои мисол, дар сабқати мазкур кишвари мо сазовори 7 медал гардид, ки ин нишондоди таърихӣ ба ҳисоб мерафт. Ба назари ӯ рақобат дар майдони хонагӣ имсол ҳам ба варзишгарони мо шонси хубе хоҳад дод, то онҳо аз Гранд Слам низ нишонҳои арзандаро сазовор гарданд.
- Агар дар ёд дошта бошед, соли 2023, ки аввалин маротиба шаҳри дилорои Душанбе Гранд Приро истиқбол гирифт, нишон дод, ки паҳлавонони мо дар иҳотаи мухлисон чи гуна хуб медурахшанд. Яъне, ин аввалин таърихнависӣ буд, ки паҳлавонони мо яку якбора нишонҳои тилло, нуқра ва биринҷии мусобиқаро ба хазинаи варзишии тоҷик ворид сохтанд. Ин ҳама агар аз як ҷиҳат талошу заҳмати варзишгарон ва мураббиёни онҳо бошад, аз тарафи дигар неруву ангезае буд, ки ҳаводорон ва дилбохтагони ҷудои кишвар дар дили варзишгаронамон ҷой доданд. Ҳар як ҳаводор аз сидқи дил варзишгарони меҳанро дастгирӣ карда, ба онҳо бештар ангеза бахшиданд, -мегӯяд Тешаев.
Барои кишвари мо манфиатовар ва фоиданок будани ташкили чунин як сабқати ҷаҳониро Эмомалии Нуралӣ, варзишгари бомаҳорати кишвар низ тасдиқ карда, қайд кард, ки баргузории чунин мусобиқаҳои бошукӯҳ дар меҳан ҳам барои рушди варзиш дар кишвар ва ҳам барои варзишгарон муфид мебошад. Ӯ мегӯяд, варзишгарон метавонанд, аз ин мусобиқа ба худ таҷрибаҳои заруриро касб намоянд, ки дар рақобатҳои минбаъда ба онҳо лозим хоҳад шуд. Дар баробари ин, орзуи ҳар як варзишгар аст, ки дар кишвараш чунин мусобиқоти сатҳи баланд баргузор гардад.
- Ба фикри ман мусобиқаи мазкур хеле дар сатҳи олӣ баргузор хоҳад шуд. Зеро ин аввалин маротиба аст, ки дар кишвари мо Гранд Слам доир мегардад. Мардуми мо, ки худ дӯстдори варзишанд, бо ташрифоварӣ ва ҳаводорӣ дар майдон хеле фазои зебоеро ба вуҷуд хоҳанд овард. Соҳиби майдон будан худ ҳамин чиз аст. Барои варзишгарон низ иқдоми наҷиб аст, ки дар майдони хонагии худ бо ҳарифон сабқат намоянд. Варзишгар чуноне ки худро дар хонааш роҳат ҳис мекунад, дар ҷойи бегона чунин эҳсосро ҳаргиз дошта наметавонад. Фикр мекунам эҳсоси хуб доштан пеш аз мусобиқа ин нисфи пирӯзии як варзишгар мебошад, - мегӯяд Эмомалӣ.
Дар такя ба суханони Эмомалии Нуралӣ, ҳамчунин Сомон Маҳмадбеков низ ин нуктаро ба хубӣ дарк карда, ишора кард, ки ташкил ва баргузории Гранд Слам дар Душанбе ҳам барои давлат ва ҳам барои варзишгарон бисёр муҳим ва саривақтӣ аст. Ӯ мегӯяд, вақте соли қабл дар кишвар Гранд Прӣ баргузор гардид, мардуми зиёде аз манотиқи гуногуни олам огоҳ шуданд, ки гӯштини ҷудо дар Тоҷикистон тарафдорони зиёде дорад. Дар баробари ин, агар Гранд Сламро низ дар сатҳи баланд баргузор намоем, кишвари мо ба ҷаҳониён ҳамчун давлати варзишдӯстдор бештар муаррифӣ хоҳад шуд.
Сомон мегӯяд, гарчанде айни замон тими мунтахаби кишвар дар сабқати мазкур муайян нашудааст, аммо бисёр мехоҳад, то дар ҳайати ин тим ҷой гирад ва дар Гранд Слами Душанбе ҳунарнамоии арзандае нишон диҳад.
- То ҳол ҳайати мунтахаби кишвар барои ин мусобиқа муайян нашудааст. Аммо бисёр мехоҳам дар Гранд Сламе, ки кишвари азизамон баргузоркунандаи он аст, иштирок варзам. Зеро як сол қабл дар Гранд Прии Душанбе сазовори нишони тилло шудам ва ин маротиба ҳам нақша дорам, нишони тиллои Тоскулоҳи Бузург-ро дар ватанамон нигоҳ дорам, - мегӯяд Сомон.
Дар ҳамин росто Муродалӣ Тешаев бо таҷрибае, ки дар ин самт дорад, варзишгаронеро, ки дар Гранд Слами Душанбе имконияти бештари ба даст овардани медалро доранд, номбар кард. Ба андешаи ӯ ин мусобиқа барои варзишгарон тоҷик бо натиҷаҳои назаррас бояд ҷамъбаст гардад.
- Ман ба ҳамаи варзишгарони меҳан боварӣ дорам. Дар ин росто дар вазни зери 66 кг Эмомалии Нуралӣ паҳлавони хуштолеи меҳан аст, ки умеди комил дорам, дар Гранд Слами Душанбе тиллоӣ хоҳад шуд. Обид Ҷебов низ дар ин вазн шонси хуб дорад ва метавонад, ки ҳунари ҷолибе нишон диҳад. Дар вазни зери 73 кг Беҳрӯз Хоҷазода ва Абубакр Шеров паҳлавонони умедбахши кишварро метавон ном бурд. Абубакр айни замон барои ба даст овардани медал дар Гранд Слами Душанбе хеле довталаби хуб аст. Дар вазни зери 81 кг Сомон Маҳмадбеков шонси хуб дорад. Зери вазни 90 кг ба ҳисоби миёна ба Комроншоҳи Устопириён боварӣ дорам. Зеро синну соли Комроншоҳ боло рафтааст ва охирон мусобиқаҳо нишон медиҳад, ки ҳарчанд ин варзишгари шинохтаи меҳан хизматҳои бузург дар самти варзиши кишвар кардааст, аммо он Комроншоҳи пештара нест. Дар ин вазн ҳамчунин Шодмон Ризоев низ метавонад, рақобати хубе нишон диҳад. Дар вазни то 100 кг бошад, бештар ба Ҷаҳонгир Маҷидов умед дорам. Дар вазни ҷамъи 100 кг муддаии асосӣ аз Тоҷикистон ин Темур Раҳимов аст. Вале роҳи Темур низ саҳлу сода нест. Зеро рақибони ӯ низ дар ин вазн ҳарифони пурқуввате ба ҳисоб мераванд, - мегӯяд Муродалӣ Тешаев.
Аз миёни нафароне, ки Тешаев номбар кард, Эмомалии Нуралӣ варзишгари ҷавону бомаҳорати кишвар дар Гранд Слами Душанбе иштирок нахоҳад кард. Ӯ ин нуктаро зимни суҳбат бо мо ишора кард. Сабаби иштирок накардан дар Гранд Слами Душанберо Эмомалӣ чунин баён дошт:
- Бо вуҷуди он ки бисёр мехостам дар аввалин Гранд Сламе, ки кишварамон онро баргузор мекунад, иштирок намоям, аммо ин фурсат ба ман даст надод. Сабаби иштирок накарданам ин аз меъёри муқарраршуда каме зиёд будани вазнам аст. Дар баробари ин, ҳамчунин мусобиқаи Чемпионати ҷаҳон дар пеш аст, ки бо Гран Слами Душанбе қариб, ки дар як вақт баргузор мегардад ва ман низ иштирокчии он ҳастам. Бинобар ин, наметавонам, ки яку якбора худро ба ҳардуи ин мусобиқоти муҳим омода намоям.
Пеш аз баргузории Гранд Сламҳои гуногун тими мунтахаби мо ба машқҳои дастаҷамъӣ ҷалб карда мешаванд. Ин навбат низ то оғози Гранд Слами Душанбе роҳбарияти Федератсияи ҷудои кишвар нақша дорад, то бо варзишгарон машқҳои дастаҷамъӣ ташкил намояд. Дар ин бора Эргаш Маҳмадбеков, ноиби президенти Федератсияи ҷудои Тоҷикистон зимни суҳбат бо мо иброз дошт. Ӯ гуфт, ки пеш аз оғози ин мусобиқаи бошукӯҳ дар кишвар ҳатман дар дохили ҷумҳурӣ бо ҷалби варзишгарон чунин машқҳои дастаҷамъиро ташкил ва баргузор хоҳанд кард.
Мо низ бо умеди натиҷаҳои назарраси тими мунтахаби ҷудои кишвар фарорасии Гранд Слами Душанберо бесаброна интизор хоҳем шуд ва умедворем, ки мусобиқаи мазкур ҳам аз ҷиҳати ташкил ва баргузорӣ ва ҳам аз ҷиҳати ба даст овардани медалҳои сабқат барои кишварамон таърихӣ ва баёдмонданӣ хоҳад гашт.
Ҳошим РАҲМАТУЛЛОЕВ, “ҶТ”
Эзоҳи худро нависед