20 октябри соли 2018 дар Муассисаи давлатии “Мактаби ҷумҳуриявии маҳорати олии варзишӣ оид ба намудҳои таэквондо” маросими ифтитоҳи даври дуюми мусобиқаҳои Ҷумҳурии Тоҷикистон байни донишҷӯёни муассисаҳои таҳсилоти олии касбӣ дар шаҳри Душанбе доир гардид.

Дар оғоз баъди ворид шудани ҳайати доварон ва мураббиён ба толор дастаҳои варзишии муассисаҳои таҳсилоти олии касбии ҳудуди шаҳри Душанбе иборат аз намудҳои бокс миёни мардон ва занон, гӯштинҳои миллӣ, тарзи озод, самбо, дзюдо, варзиши сабук байни мардон ва занон ва волейбол байни писарон ва духтарон ба навбат зери мусиқиҳои ватандӯстона саф оростанд.

Дар ифтитоҳи чорабинӣ сардори Раёсати кор бо ҷавонон ва варзиши шаҳри Душанбе иштирок ва суханронӣ намуда, таъкид дошт, ки бо таваҷҷуҳ ва дастгириҳои пайвастаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соҳаи варзиш рӯз аз рӯз рушд намуда, ба дастовардҳои назаррас ноил гардида истодааст. Тадбирҳои зарурӣ дар ин самт руйи кор омода, ҳар яки моро рӯҳбаланд мегардонад ва бунёд гардидани наздики 100 иншооти варзишӣ дар пойтахт танҳо дар соли 2018 шаҳодат аз гуфтаҳои болост.

Баъди садо додани Суруди миллии Тоҷикистон мусобиқаҳои шаҳри Душанбе байни донишҷӯёни муассисаҳои таҳсилоти олии касбии шаҳри Душанбе кушода эълон гардид.

Даври дуюми мусобиқаҳо дар толору иншоотҳои гуногуни шаҳри Душанбе аз 20 октябр то 31 октябр идома меёбад ва дастаҳои ғолиб дар алоҳидагӣ аз ҳар як намуди варзиш ба даври ҷумҳуриявӣ пешниҳод мегарданд.