21 май, дар маркази вилояти Суғд, Дави миллӣ баргузор гардид, ки дар он Раиси вилоят Абдураҳмон Қодирӣ ва сокинони касбу кори гуногун иштирок намуданд.

Дар оғози чорабинӣ сардори Раёсати ҷавонон, варзиш ва сайёҳии вилояти Суғд Олимҷон Зоҳидзода суханронӣ намуда, изҳор дошт: “Рӯзи Дави миллӣ бо ташаббуси Президенти Ҷумҳурии Тоҷикистон мӯҳтарам Эмомалӣ Раҳмон бо мақсади таҳкими тарзи ҳаёти солим, рушду инкишофи соҳаи варзиш ва оммавияти он дар байни аҳолӣ аз соли 2007 инҷониб баргузор мешавад”.

Чорабинии мазкур имсол аз назди Маҷмааи ҳавзҳои шиноварии “20 солагии Истиқлолияти Тоҷикистон” оғоз ёфта, ба воситаи кӯчаи Сирдарё то назди Парчами давлатии Ҷумҳурии Тоҷикистон, воқеъ дар хиёбони ба номи Раҳмон Набиев идома ёфт.

Ба иттилои масъулини Раёсати ҷавонон, варзиш ва сайёҳии вилоят дар ин чорабинии варзишӣ беш аз 84 ҳазор нафар сокинони вилоят фаъолона иштирок намуданд.

Дар поёни чорабинии мазкур намояндагони фаъоли 15 муассисаву ташкилот бо тӯҳфаҳои хотиравӣ қадрдонӣ шуданд.

Шералӣ АЗИМӢ, “ҶТ”