Фахриддин Мадкамов варзишгари 22-солаи тоҷик дар Чемпионати ҷаҳон оид ба шиноварӣ, ки дар шаҳри Будапешти Венгрия аз 18 июн то 3 июли соли равон доир гардид, иштирок намуда, дар даври аввали мусобиқа ба масофаи 50 метр (тарзи батерфляй) сазовори ҷойи дуюм шуд.

Ӯ дар даври аввали мусобиқа ба масофаи 50 метр аз миёни 10 нафар бо ба даст овардани ҷойи дуюм ба даври нимниҳоӣ роҳ ёфт, вале дар ин давр бо вуҷуди талошу кӯшишҳо натавонист, то ба даври ниҳоӣ бирасад.

- Айни ҳол донишҷӯи курси 4-уми Донишкадаи тарбияи ҷисмонии Тоҷикистон ба номи С. Раҳимов мебошам. Кулли дастовардҳоям натиҷаи дастгириҳои роҳбарияти Ҳукумати кишвар, баъдан наздикону волидон, мураббиён ва роҳбарияти ДТҶТ ба номи С. Раҳимов мебошад. Аз ректори ДТҶТ ба номи С. Раҳимов миннатдорам, ки барои иштирок дар Чемпионати ҷаҳон оид ба шиноварӣ, ки дар шаҳри Будапешти Венгрия шуда гузашт, дастгирӣ намуданд. Дар оянда ҳадафам ин аст, ки бо зиёд намудани таҷрибаи варзишӣ дар мусобиқаҳои сатҳи ҷаҳонӣ иштирок намояму бо сазовор гардидани ҷойҳои ифтихорӣ Парчами ватанамонро баланд бардорам, - гуфт Фахриддин Мадкамов.

Ин аввалин иштироки Фахриддин дар мусобиқаҳои сатҳи ҷаҳонӣ набуда, ӯ то ин дам дар чандин мусобиқаҳои дигари хориҷӣ иштирок ва кишвари азизамонро дар риштаи варзиши шиноварӣ муаррифӣ кардааст. Аз ҷумла, соли 2016 дар Канада, ки мусобиқаи ҷаҳонӣ баргузор гардид, фаъолона ширкат варзидааст. Соли 2021 дар мусобиқаи байналмилалӣ оид ба шиноварӣ, ки миёни варзишгарони ИДМ дар шаҳри Душанбе шуда гузашт, дар масофаи 100 метр сазовори ҷойи якум гардидааст. Инчунин, соли 2021 дар мусобиқае дар Амороти Муттаҳидаи Араб иштирок намуда, дар сабқатҳо ба масофаи 50 метр сазовори ҷойи 5-ум шудааст.

“ҶТ”