Ду варзишгари навраси тоҷик аз мусобиқаҳои байналмилалии варзишӣ 95 медали тилло ва 20 камарбанди қаҳрамониро соҳиб гардидаанд. Ин ду қаҳрамон Мунис ва Абубакр мебошанд, ки ба варзиши ҷиу – ҷитсуи бразилӣ машғуланд. Муниси 9-сола бо 59 медали тилло дар ҷаҳон ҳамто надорад, додараш Абубакри 8-сола низ аз ӯ кам нест. Чанде пеш дар як мусобиқаи байналмилалӣ дар Аморати Муттаҳидаи Араб барои шикасти рейтинги Мунис дар финал ӯро бо додараш барои ҷойи аввал мебароранд. Аммо Абубакр дар мусобиқа дасти бародарашро боло мебардорад. Чаро ӯ дасти бародарашро боло бардошт? Чӣ гуна ин ду наврас тавонистанд, ба синни наврасии худ нигоҳ накарда, дастовардҳои арзандаро соҳиб гарданд? Дар ин бобат бо ду қаҳрамони навраси тоҷик ва падари онҳо Авазхӯҷа Каримов, ки ҳамеша ҳамроҳи варзишгарон аст, суҳбат доштем, ки фишурдаашро пешкаши хонанда мегардонем.

“ҶТ”: - Авазхӯҷа, мегуфтед, ки фарзандони шумо аз чандсолагӣ ба варзиш меҳр бастанд?

Авазхӯҷа: - Ман, ки худ дӯстдори варзишам, Мунисро аз 4-солагӣ ва Абубакрро, ки аз ӯ як сол хурдтар аст, аз 3-солагӣ ба варзиш ҷалб намудам. Худам ба футбол майл дорам, аммо фарзандонам аввал риштаи варзиши ҷудоро интихоб намуданд, сипас ба ҷиу-ҷитсу рӯй оварданд. Аз он рӯзе пай бурдам, ки ҳар ду фарзандам ба варзиш меҳр доранд, онҳоро ҳамроҳи худ ба Федератсияи Русия бурдам, то ки бо онҳо бисёртар тамрин кунам. Ман худ муқимии шаҳри Москваам. Аввал барои мо дар мулки бегона дар толори варзишӣ машқ кардан душвор буд. Мо муддати шаш моҳ дар хона тамрин кардем. Баъдан дар толори варзишии Расул Боқиев ҳамроҳ бо мураббии рус Артём Сергеевич тамринро оғоз намуданд.

“ҶТ”: - Аввалин комёбии фарзандони шумо?

Авазхӯҷа: - Бори аввал Мунис ва Абубакр дар Белорусия баромад карда, ҳар ду соҳиби ҷойи якум гаштанд. Баъди оне ки Парчами Тоҷикистонро баланд бардоштанд, хурсандии фарзандонам ҳадду канор надошт. Ҳамин ғолибият буд, ки онҳоро ҷаҳониён шинохтанду дар ин баробар мухлисони зиёд пайдо намуданд.

“ҶТ”: - Абубакрро ҳангоми баромади аввалин чӣ ҳиссиёт фарогир буд?

Абубакр: - Баъди тамрини зиёд нахуст дар 5 –солагиам, дар мусобиқае, ки байни наврасон дар вазни 15 кг дар шаҳри Белорусия баргузор гардид, ғолиб омадам. Вақте ки Парчами Тоҷикистон ва Суруди миллӣ садо дод, ашкҳои ман ҷорӣ шуданд. Он лаҳза аз ҳаяҷони зиёд ман ҳам бо овози баланд Суруди миллиро хондам. Падарам баъдан таъкид намуд, ки овозат аз ҳама баланд садо дод.

“ҶТ”: - Таассуроти Мунис чӣ гуна буд?

Мунис: - Хеле хушнуд шудам, ки дар баромади аввалин ҳам ман ва ҳам бародарам ғолиб омадем. Ҳангоми бо медали тилло сарфароз гаштан, садҳо офаринамон хонданд. Гиряам омад, аммо худамро ба даст гирифтам. Бо овози баланд мухлисони зиёд моро ояндаи Тоҷикистон мегуфтанд. Ин ба ман қувваи нав мебахшид.

“ҶТ”: - Авазхӯҷа шумо дӯстдори футбол будед, чаро фарзандонро ба ин навъи варзиш ҷалб накардед?

Авазхӯҷа: - Ман зиёда аз 7 сол футболбозӣ кардам. Аммо вақте дидам писаронам ба футбол шавқу рағбат надоранд, онҳоро дар интихоби навъи варзиш ихтиёр додам. Вақте дидам, ки ба варзиши хостаи худ майли беандоза доранд, ҷиддан аз пайи тамрин ва пайдо кардани шароиташон шудам.

“ҶТ”: - Идеали Абубакр дар дунёи варзиш кист ва ба кӣ монанд шудан мехоҳад?

Абубакр: - Ман кӯшиш мекунам, ки ба ягон варзишгари дунё монанд набошам ва ба онҳо пайравӣ накунам. Ман ҳамаи варзишгарони тоҷикро дӯст медорам, бозиҳои онҳоро тамошо мекунам, аммо мехоҳам дар риштаи варзиши ҷиу – ҷитсу номи ман муаррифӣ шавад.

“ҶТ”: - Назари Мунис дар ин бобат чӣ гуна аст?

Мунис: - Ман дар дунёи варзиш Ҳабиб Нурмагамедовро дӯст медорам ва мехоҳам мисли ӯ ҳамаи рақибони худро шикаст дода, Парчами Тоҷикистонро дар арсаи байналмилалӣ баланд бардорам.

“ҶТ”: - Чаро Абубакр дар мусобиқаи охирин, ки дар финал мебоист бо бародараш сабқат мекард, аз мусобиқа даст кашиду дасти Мунисро баланд кард?

Абубакр: - То имрӯз Мунис мағлуб нашудааст. Гарчанде бори охир дар шаҳри Абу-Дабии Аморати Муттаҳидаи Араб маро бо бародарам рӯ ба рӯ карданд, вале ман нахостам, ки рақиби ӯ бошам ва дасташро боло карда, аз рақобат даст кашидам. Нахос-там, ки аз акаам болотар бошам, чун ӯро азиз медорам. Барои эҳтиромаш дасти ӯро боло бардоштам.

“ҶТ”: - То имрӯз ин ду қаҳрамон дар кадом давлатҳои дунё маҳорати худро нишон додаанд ва кадом дастовардҳо ба даст овардаанд?

Авазхӯҷа: - Мунис то имрӯз дар мусобиқаҳои байни наврасон дар вазни 24 кг ба Ватан 59 медали тилло овардааст. Абубакр, бародари хурди Мунис то имрӯз 36 медали тилло ба даст овардааст. Ҳардуи онҳо дар арсаи ҷаҳонӣ аз номи Тоҷикистон баромад намуда, парчами кишварро баланд мебардоранд. Мунис ва Абубакр дар маҷмуъ 95 медали тилло ва 20 камарбанди қаҳрамонӣ аз риштаи варзиши ҷиу-ҷитсу доранд. Ман ифтихор мекунам, ки дар камарбандҳои онҳо парчами Тоҷикистон инъикос ёфтааст.

“ҶТ”: - Расул Боқиев дар шаҳри Москва устоди ду қаҳрамони навраси тоҷик аст, мегуфтед, ки тайёрии имрӯзаи онҳо ба мусобиқаҳои Осиё ва Аврупо, ки баҳори соли 2022 ба нақша гирифта шудааст, чӣ гуна аст?

Авазхӯҷа: - Тайи 5 сол аст, ки Мунису Абубакр зери назари се мураббӣ тамрин кардаанд, ки яке аз онҳо варзишгари номии Тоҷикистон Расул Боқиев аст. Расул Боқиев дар баробари қаҳрамон гаштани ин ду наврас, боз ҳам кӯшиш мекунад, ки дар мусобиқаҳои Осиё ва Аврупо, ки баҳори соли 2022 ба нақша гирифта шудааст, онҳо ғалаба ба даст оварда, парчамбардори кишвар бошанд.

“ҶТ”: - Ҳамроҳ бо қаҳрамонҳо оянда чӣ нақша доред?

Авазхӯҷа: - Чун фарзандони ман ҳоло хеле хурданд, нақшаҳо ҳам бисёранд. Ман кӯшиш мекунам, ки риштаи варзиши ҷиу – ҷитсу дар кишвари мо бисёртар рушд кунаду Тоҷикистонро бо ин намуди варзиш муаррифӣ намоянд.