Ғолибони он дар Данғара муайяну қадрдонӣ шуданд

Нахустин Мусобиқаи байналмилалӣ оид ба тенниси рӯи миз барои дарёфти Ҷоми Президенти Ҷумҳурии Тоҷикистон, ки аз 22 то 24 майи соли ҷорӣ дар ноҳияи Данғара баргузор гардид, дар ҳисоби даставӣ мунтахаби Тоҷикистон соҳиби Ҷоми мусоқаи мазкур шуд.

Мусобиқаи мазкур дар доираи истиқбол аз Рӯзи ҷавонони Тоҷикистон ва Рӯзи ҷаҳонии футбол бо ибтикори Федератсияи тенниси рӯи миз дар ҳамкорӣ бо Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Мақомоти иҷроияи ҳокимияти давлатии вилояти Хатлон гузаронида шуда, дар он варзишгарони ҷумҳуриҳои Тоҷикистон, Узбекистон, Қазоқистон ва Озарбойҷон иштирок ва барои зинаҳои ифтихорӣ рақобат намуданд.

Давоми рӯзҳои баргузории мусобиқа варзишгарон бо маҳорати баланд баромад намуда, чорабиниро шукуҳу шаҳомати хосса бахшиданд.

Гуфта шуд, ки баргузории ин мусобиқа дар арафаи таҷлили Рӯзи ҷаҳонии футбол ва Рӯзи ҷавонони Тоҷикистон рамзи таваҷҷуҳи хос ба рушди варзиш ва дастгирии ҷавонон дар кишвар мебошад. Имрӯз варзиш ҳамчун омили муҳими таҳкими дӯстии халқҳо, густариши ҳамкориҳои байналмилалӣ ва муаррифии давлатҳо дар арсаи ҷаҳон мавқеи арзишманд дошта, ҷавононро ба иродаи қавӣ, матонат ва эҳсоси баланди ватандӯстӣ раҳнамун месозад.

Ҳамчунин, илова гардид, ки бо талошу сиёсати созандаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соҳаи варзиш дар мамлакат ба марҳилаи нави рушд расида, барои оммавигардонии намудҳои гуногуни варзиш ва ҷалби наврасону ҷавонон ба тарзи ҳаёти солим тамоми шароити мусоид муҳайё гардидааст.

Ба гуфти масъулин, чунин мусобиқаҳои сатҳи байналмилалӣ дар рушди минбаъдаи тенниси рӯи миз, таҳкими дӯстии варзишгарон ва баланд бардоштани нуфузи байналмилалии варзиши тоҷик саҳми арзишманд мегузоранд.

Дар охир, ғолибони чорабинӣ бо диплом ва мукофотпулӣ қадрдонӣ гардиданд.

“ҶТ”