Мунтахаби Тоҷикистон оид ба самбо аз Чемпионати ҷаҳон-2018, ки дар шаҳри Бухарести Руминия баргузор гардид бо 4 медал (1 тилло ва 3 биринҷӣ) ба Ватан баргаштанд.

Паҳлавононро Аҳтам Абдуллозода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, мураббиёну варзишгарон ва ҳаводорони сершумори варзиш истиқбол намуданд.

Хушқадам Хусравов, қаҳрамони нави ҷаҳони вазни 62 кило дар суҳбат ба хабарнигорон ба Пешвои миллат, Президенти ҷумҳурӣ, муҳтарам Эмомалӣ Раҳмон барои муҳайё кардани шароити хуби тамрин барои варзишгарон ва масъулини соҳа миннатдорӣ баён карда, иброз доштанд, ки барои муаррифӣ ва парафшон кардани Парчами Тоҷикистони азиз дар арсаи ҷаҳон минбаъд низ кӯшиш ба харҷ медиҳанд. 

Ёдовар мешавем, ки дар Чемпионати ҷаҳони имсола қатори Хушқадам Хусравов се паҳлавони дигари тоҷик - Беҳрӯзи Хоҷазода дар вазни 74 кило, Акмалиддин Каримов дар вазни 57 кило ва Сорбон Латифов дар вазни 62 кило соҳиби медалҳои биринҷӣ гардиданд.

Хушқадам Хусравов сеюмин қаҳрамони ҷаҳон дар таърихи самбои Тоҷикистон ба ҳисоб меравад. Аз ин пеш Саидмуъмин Раҳимов соли 1975 ва Беҳрӯзи Хоҷазода соли 2017 ба ин унвон даст ёфтаанд.