Бозии финалии Ҷоми ФФТ-2017 дар Варзишгоҳи марказӣ, 24 феврал миёни дастаҳои “Истиқлол”-и Душанбе ва  “Регар-ТадАЗ”-и Турсунзода баргузор гардид.

Дар ин дидор тими “Истиқлол” бо ҳисоби 2:1 бо ҳарифи худ пирӯз шуда, маротибаи сеюм соҳиби  Ҷоми Федератсияи футболи Тоҷикистон шуд.

Голҳои тими “Истиқлол”-ро Дилшод Восиев (дақиқаҳои 67 ва 89) ва голи ягонаи “Регар-ТадАЗ”-ро Алишер Шарифов (90+3) ба самар расониданд.

Медали биринҷии мусобиқаро футболбозони  дастаи “Кӯктош”-и ноҳияи Рӯдакӣ ба гардан овехтанд.  

Ҷоми ФФТ аз соли 2012 инҷониб баргузор мегардад, ки тими “Истиқлол” се бор, “Регар-ТадАЗ” ду ва “Хайр”-и Ваҳдат як бор соҳиби Ҷом гардидаанд.