Имрӯз, 3-юми ноябр, дар меҳмонхонаи “Ҳаятт Реҷенси”-и шаҳри Душанбе нишасти матуботии пеш аз бозии финалии Ҷоми КФО (Конфедератсияи футболи Осиё) - 2017 бо иштироки сармураббиёни дастаҳои “Истиқлол” – и Тоҷикистон ва “Эйр Форс” – и Ироқ баргузор гардид.

Ҳусанм Ай Саид, сармураббии дастаи “Эйр Форс” зимни нишаст тими “Истиқлол”-ро пурқувват ҳисобида иброз намуд, ки “Ягон даста тасодуфӣ ба финал роҳ намеёбад. Аз ин маълум мегардад, ки ҳариф аз ҳама ҷиҳат омода шудааст. Мо фардо барои Ҷом набард мекунем. Ҳарчанд душвор аст, вале кӯшиш менамоем, ки натиҷаи хуб ба даст орем. Бозингарони мо дар майдонҳои табиӣ бозӣ намудаанд. Фардо бозӣ дар майдони суннӣ мегузарад, ки ин метавонад то як андоза барои бачаҳои мо душворӣ пеш орад”.

Қаҳрамони шашкаратаи Тоҷикистон дастаи “Истиқлол” бори дуюм аст, ки ба марҳилаи ниҳоии Ҷоми КФО роҳ меёбад. Ин даста то ин марҳила душвориҳои зиёдро тай намудааст ва ин мавсим назди роҳбарияти бошгоҳ масъалаи барандаи Ҷоми КФО шудан меистад.

Муҳсин Муҳаммадиев, сармураббии тими “Истиқлол” дар робита ба бозии ниҳоии Ҷоми КФО зимни нишасти матбуотӣ тавре гуфт, “Аз оғози мавсим мақсади ягонаи мо ба даст овардани Ҷом аст. Аз ин рӯ, даста дар кадом ҳолате набошад, барои пирӯзӣ ба майдон мебарояд. Дар бораи заифӣ ва қавигии рақиб ҳеҷ чиз гуфта наметавонам, Фардо инро майдон муайян мекунад. Кӯшиш мекунем, ки бозии хуб нишон диҳем”.

Ёдовар мешавем, ки бозии ниҳоии Ҷоми КФО-2017 миёни дастаҳои “Истиқлол”-и Тоҷикистон ва “Эйр Форс”-и Ироқ фардо, 4-уми ноябр, дар Варзишгоҳи марказии шаҳри Ҳисор соати 17:00 шуруъ мегардад.

Шодихони НАЗАР, Шаҳбози АСОМИДДИН, “ҶТ”