Шоми 22 август дар Варзишгоҳи марказии шаҳри Ҳисор бозии аввали даври ниманиҳоии байниминтақавии Ҷоми КФО (Конфедератсияи футболи Осиё) - 2017 миёни дастаҳои “Истиқлол”-и Тоҷикистон ва “Серес Негрос”-и Филиппин баргузор гардид. Дар ин дидор футболбозони тоҷик дар шоҳидии 13800 нафар мухлис ба дарвозаи ҳариф чор голи беҷавоб заданд.

Аз оғози бозӣ шогирдони Муҳсин Муҳаммадиев ба дарвозаи рақиб зуд–зуд фишор оварда, ҳимоятгаронро барои вайрон кардани бозӣ маҷбур менамуданд, ки дар натиҷа ҳимоятгари “Серес Негрос” дар дақиқаи 25-ум ба хатоӣ роҳ дод ва довари бозӣ Нивон Робеш Гаминӣ (Шри-Ланка) зарбаи 11-метра таъин намуд. Ин имкониятро ҳимоятгари душанбегиҳо Аҳтам Назаров ба хубӣ истифода бурда, дастаашро пешсаф намуд. Дар дақиқаи 45-уми қисми якуми рақобат ҳамлагари дастаи “Истиқлол” Ромиш Ҷалилов бо як камбинатсияи хуб голи дуюмро вориди дарвозаи Роланд Муллер намуд. Дар нимаи дуюми бозӣ дар дақиқаи 67-ум ҳамлагари “Истиқлол” Манучеҳр Ҷалилов бо як зарбаи олӣ тӯби сеюмро ба самар расонд. Дар қисми охири дидор ба Манучеҳр Ҷалилов муяссар гардид, ки голи ниҳоиро ба номи худ сабт намуда, дубл намояд.



Муҳсин ​Муҳаммадиев, сармураббии “Истиқлол” дар нишасти хабарии баъди бозӣ иброз намуд, ки “Новобаста аз ғалаба рақобат душвор гузашт. Ҳеҷ чиз ба осонӣ ба даст намеояд. Ман аз бачаҳо сипосгузорам, ки онҳо ба ин бозӣ ҷиддӣ муносибат карда, ҳамаи қувваашонро комилан сарф намуданд. Дар бисёр лаҳзаҳо мо бад бозӣ накардем, дар баъзе мавридҳо бозиамон намечаспид, вале мо вазифаи дар ин бозӣ гузошташударо иҷро карда, пирӯзро ба даст овардем.”
                                                   
Дар ин нишаст Ристо Видакович, мутахассиси испанӣ ва сармураббии “Серес Негрос”, иброз дошт, ки ин бозии бадтаринашон дар Ҷоми КФО буд. “Дастаи ”Истиқлол”-ро бо ғалаба табрик мегӯям. Имрӯз кори мо омад накард. Ҳариф хеле хуб бозӣ кард, дар майдон пурқувват буд. Дар хатти дифоъ футболбозони мо суст бозӣ карданд. Мо ба ин бохти бузург нигоҳ накарда, барои ба даври баъдӣ роҳ ёфтан ноумед нашудем. Дар пеш бозии ҷавобӣ дар Баколод аст. Ин футбол аст, ҳама чиз рух доданаш мумкин. Шояд шогирдонам дар хона бо ҳисоби 5:0 пирӯз шуда, дар таърихи футболи Филиппин саҳифаи навро боз намоянд”.



Бозии ҷавобии даври ниманиҳоии байниминтақавии Ҷоми КФО-2017 миёни дастаҳои “Истиқлол” ва “Серес Негрос” 12-уми сентябр дар шаҳри Баколоди Филиппин барпо мегардад. Ғолиби ин ҷуфт ба даври баъдии Ҷоми КФО роҳ ёфта, дар финали байниминтақавӣ бо ғолиби ҷуфти “Бенгалуру” (Ҳиндустон) – “25 апрел” (Кореяи Шимолӣ) рақобат мекунад. Бозиҳои ниҳоии байниминтақавӣ 27-уми сентябр ва 18-уми октябр баргузор мешаванд.

Дар бозиҳои ниҳоии минтақаи ғарбӣ 12-ум ва 26-уми сентябр “Ал-Ваҳда”-и Сурия ва “Эйр-Форс”-и Ироқ рақобат мекунанд. Дидори ниҳоии Ҷоми КФО-2017 рӯзи 4-уми ноябр барпо мегардад. Агар дастаи “Истиқлол” ба финал роҳ ёбад, он гоҳ бозии финалии Ҷоми КФО-2017 дар Тоҷикистон баргузор мешавад.

Шаҳбози АСОМИДДИН, “ҶТ”