7 октябр, шуруъ аз соати 7-и субҳ дар мавзеҳои фарҳангиву фароғатии пойтахти кишвар шаҳри Душанбе, аз қабили Майдони 800-солагии Москва, боғҳои Нишон, Парчам, Устод Рӯдакӣ, Шаршараи Наврӯзгоҳ, саҳни Сирки давлатӣ ва дар 70 майдончаи навбунёдгардидаи шаҳр бо иштироки зиёда аз 10 ҳазор нафар наврасону ҷавонон машқҳои пагоҳирӯзӣ ва мусобиқаҳои гуногуни рафиқонаи варзишӣ бо мақсади таҳкими тарзи ҳаёти солим ва оммавияти варзиш миёни наврасону ҷавонони пойтахт бо ироаи Муроҷиатномаи ҷавонон ва варзишгарони шаҳри Душанбе ба раиси шаҳри Душанбе Рустами Эмомалӣ баргузор гардид.

Мавриди зикр аст, ки иқдоми мазкур дар заминаи сиёсати варзишпарварони Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон вобаста ба эълон гардидани рӯзи шанбе ҳамчун Рӯзи варзиш ва солимгардонӣ, ташкил гардида, он ба хотири аҷгузорӣ ва изҳори сипоси ҷавонон ва варзишгарони пойтахт ба раиси шаҳри Душанбе Рустами Эмомалӣ ҷиҳати дар фурсати бисёр кӯтоҳ, бо тарҳу услуби замонавӣ ва сифати баланд ба истифода қарор додани 70 адад майдончаҳои варзишӣ ва фарҳангиву фароғатӣ ташкил ва баргузор гардид.

МУРОҶИАТНОМАИ ВАРЗИШГАРОН ВА ҶАВОНОНИ ПОЙТАХТ БА РАИСИ ШАҲРИ ДУШАНБЕ РУСТАМИ ЭМОМАЛӢ ВОБАСТА БА ДАСТГИРИИ НАВБАТӢ ДАР РУШДУ ИНКИШОФИ СОҲАИ ТАРБИЯИ ҶИСМОНӢ ВА ВАРЗИШИ ШАҲРИ ДУШАНБЕ

Имрӯз бо шукргузорӣ аз даврони соҳибистиқлолии кишвар, сулҳу суботу якпорчагии Ватани ободу осуда, мо – ҷавонон ва варзишгарони шаҳри Душанбе, дар партави сиёсати варзишпарваронаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, худро хушбаттарин насл меҳисобем ва эҳсоси ғамхориҳо ва дӯстдориҳои раиси шаҳрамон, муҳтарам Рустами Эмомалиро ҳар сари қадам бо фараҳмандӣ эҳсос менамоем.

Ифтихор ва толеи баланди мо - варзишгарон ва ҷавонони даврони соҳибистиқлолӣ мебошад, ки сиёсати давлатии ҷавонон ва рушду инкишофи соҳаи варзиш ба яке аз самтҳои пурарзиш дар меҳвари нақшаву барномаҳои мақомоти иҷроияи ҳокимияти давлатии шаҳри Душанбе қарор гирифта, дар ин раванд ба манфиати насли наврасу ҷавон татбиқ гардидани корҳои созандагиву бунёдкорӣ нишонаи олии қадршиносӣ ва эътимоди Шумо ба ин насл аст.

Дар робита ба дастуру супоришҳои Пешвои муаззами миллат, муҳтарам Эмомалӣ Раҳмон зимни мулоқот бо масъулон ва фаъолони шаҳри Душанбе танҳо дар соҳаи тарбияи ҷисмонӣ ва варзиш барои сохтани 76 адад майдончаҳои варзишӣ ва иншоотҳои фароғатӣ дар соли 2017 асос гузошт, ки то ба имрӯз ҳамаи он ба пуррагӣ ба истифода дода шудаанд.

Инчунин, дар доираи “Соли ҷавонон” эълон гардидани соли 2017 бо дастгирии Шумо дар пойтахти кишвар маркази нави муҳташами истироҳатии “Обшорон” - калонтарин аквапарк ё худ парки обӣ дар мамлакат дар майдони 20 000 метри мураббаъ мавриди истифода қарор дода шуд, ки намунаи муосиру беҳамтои маҷмааи истироҳативу фароғатӣ барои наврасону ҷавонон маҳсуб меёбад.

Ин ташаббусро мо – наврасону ҷавонон ва варзишгарони пойтахт аз дастгириҳои падаронаи Пешвои миллат маънидод намуда, ҳавасмандӣ ва ҳамовозии моро ба таҳкими тарзи ҳаёти солим ва ҷалби бештари мардум ба оммавияти варзиш ва солимгардонӣ дучанд менамояд. Ин аст, ки имрӯз мо якдилона барои сипосгузорӣ аз ин ғамхорӣ ба хотири ташаккули тарзи ҳаёти солим ва оммавияти варзиш дар тамоми иншооти сохташуда ба машғулиятҳои сабуки тарбияи ҷисмонӣ ҳозир шудем.

Дар ҷавоби ин ҳама ғамхориву садоқати падарони Пешвои миллат ва Шумо, муҳтарам раиси шаҳр барои таҳкими сулҳу субот, амнияти пойдор, осудагӣ, фазои софу беғубори Ватан ва зиндагии шоистаи халқи тоҷик, солимгардонӣ, расидан ба қуллаҳои баланди илмиву варзишӣ, пайравии ҷавонмардонаи Шуморо идома дода, аз он ифтихор менамоем ва баҳри ободии Тоҷикистони маҳбуб ва пойтахти он шаҳри Душанбе ҳамеша кӯшиш менамоем.

Мо – варзишгарону ҷавонону пойтахт, ҷонибдори сиёсати сулҳпарварона ва хирадмандонаи Пешвои миллат будем, ҳастем ва мемонем.

Бо камоли эҳтиром, варзишгарон ва ҷавонони пойтахт