Бо ташаббуси Мақомоти иҷроияи маҳаллии ҳокимияти давлатии ВМКБ ва Бахши ҷавонон, варзиш ва сайёҳии шаҳри Хоруғ дар маркази ВМКБ, шаҳри Хоруғ 10 – умин Дави миллӣ бо иштироки 9800 нафар сокинони синну соли гуногун баргузор гардид.

Иштирокдорон аз маҳаллаи “Бойн” то мавзеи “УПД” дар масофаи 10 км давиданд.

Нахуст Шодихони Ҷамшед, раиси ВМКБ ҳозиринро ба муносибати Рӯзи ҷавонони Тоҷикистон ва 10 – солагии Дави миллӣ табрик намуда, гуфт, ки таҳкими тарзи ҳаёти солим миёни ҳамаи табақаҳои аҳолии кишвар иқдоми созандаи Асосгузори сулҳу ваҳдати миллӣ - Пешвои миллат, муҳтарам Эмомалӣ Раҳмон мебошад.

- “Соли ҷавонон” минбари воқеии пешрафту рушд ва солимфикрии ҷавонону наврасон буда, дар ҳаёти онҳо нақши калидӣ дорад. Маҳз дар даврони муосир зиракии сиёсии ҷавонон ва беҳзистии онҳо барои ҷомеа ҳамчун обу ҳаво зарур аст, - афзуд Шодихони Ҷамшед.

Дар ҷамъбасти Дави миллӣ аз ҷониби раҳбарияти вилоят, Бахши ҷавонон, варзиш ва сайёҳии шаҳри Хоруғ барои 400 нафар ҷавонону наврасон, 40 нафар иштирокдорони калонсол, ки натиҷаҳои беҳтаринро нишон доданд, ифтихорнома ва тӯҳфаҳои хотиравӣ тақдим гардид.

Машҳур ИМОМНАЗАРОВ, “ҶТ”