Дар шаҳру навоҳии ҷумҳурӣ бозиҳои даври пешакии Ҷоми ФФТ-2017 идома доранд.

Дар минтақаи Суғд дастаи “Хуҷанд” ғолиб шуд. Пеш аз анҷоми мусобиқа футболбозони Хуҷанд ҷои аввалро сазовор гашта, ба даври финалӣ, ки 10-19 феврал дар шаҳри Душанбе баргузор мешавад, роҳхат гирифт. Барои як роҳхати дигар дастаҳои “Оли Сомон” (Мастчоҳ) ва “Ашт” (Ашт) муддаиянд.  

Дар минтақаи Хатлон даври гурӯҳии мусобиқа ба анҷом расид. Дар даври нимфинал, ки имрӯз, 6 феврал, доир мегардад, “Парвин”-и Бохтар бо “Ҳулбук”-и Восеъ ва “Равшан”-и Кӯлоб бо “Саройкамар”-и Панҷ вомехуранд. Ғолибони даври нимфинал ба даври финалии Ҷоми ФФТ роҳхат мегиранд.

Аз минтақаи Душанбе роҳхати сеюмро ба даври финалӣ дастаи “Куктош”-и ноҳияи Рӯдакӣ ба даст овард. “Куктош” дар даври навбатии гурӯҳи “А” бар тими “Локомотив-Помир”-и Душанбе бо ҳисоби 6:0 ғалаба кард.

Қаблан дастаҳои “Ҳосилот” ва “Хайр” аз гурӯҳи “Б”-и минтақаи Душанбе ба даври ниҳоии Ҷоми ФФТ роҳхат гирифта буданд.