Комроншоҳи Устопириён, паҳлавони тоҷик, дар чемпионтаи Осиё-2017, ки дар шаҳри Ҳонконги Чин баргузор гардид, мақоми аввалро соҳиб шуд. 

Комроншоҳ баъди ғалаба бар ҳарифонаш- Алдикан Ғанам, ки таҳти парчами Федератсияи байналмилалии ҷудо (IJF) ба майдон омад, Муҳаммадкарим Хуррамов аз Узбекистон, Шоичиро Мукаи ҷопонӣ ба даврӣ ниҳоӣ роҳ ёфт. Ӯ дар даври ниҳоӣ 27-уми май Ислом Бозбоеви қазоқро шикаст дода, медали тиллои вазни 90 килоро соҳиб гардид.

Ин дуюумин медали тиллои осиёии Комроншоҳ мебошад. Соли гузашта низ дар чемпионати Осиё, ки моҳи апрел дар пойтахти Узбекистон баргузор шуда буд, Комроншоҳи Устопириён дар вазни 90 кило ҳамаи рақибонашро шикаст дода, соҳиби медали тилло гардид.

Дар мусобиқаи мазкур Тоҷикистонро ҳафт паҳлавон – Сӯҳроб Боқиев (-60 кг), Хушқадам Хусравов (-66 кг), Беҳрӯзи Хоҷазода (-73 кг), Саидмухтор Расулов (-73 кг), Садр Боев (-81 кг), Комроншоҳи Устопириён (-90 кг) ва Саидҷалол Саидов (-100 кг) бо роҳбарии сармураббӣ Фахриддин Раҳимов намояндагӣ карданд.

Паҳлавонони  тоҷик Саидҷалол Саидов дар вазни  100 кило, Сӯҳроб Боқиев  дар вазни 60 кило  мақомҳои панҷум ва Беҳрӯзи Хоҷазод дар вазни 73 кило мақоми ҳафтумро ишғол намуданд. 

Тими Тоҷикистон аз ҳисоби умумидаставӣ аз миёни 28 давлат бо гирифтани як медали тилло, ду ҷои панҷум ва як ҷои ҳафтум дар зинаи панҷум қарор гирифт.  Мунтахаби Ҷопон бо касби 12 медал (8 медали тилло, як медали нуқра ва 3 биринҷӣ) дар ҷои аввал,  Кореяи Ҷанубӣ 14 медал (3 медали тилло, 4 нуқра ва 7 биринҷӣ)  ҷои дуюм,  Муғулистон бо 9 медал (1 медали тилло, 3 нуқра ва 5 биринҷӣ) ҷои сеюум ва тими Қазоқистон бо 7  медал (як медали тилло, 3 нуқра ва 3 биринҷӣ) мақоми чорумро ишғол намуданд. 

Чемпионати имсолаи Осиё аз намуди ҷудо бо иштироки 244 варзишгар (140 мард ва 104 зан) аз 28 кишвар доир гардид.