Манижа Самадова гулдухтари шуҷоъ ва размкори ҷавони тоҷик чанде пеш дар Чемпионати ҷаҳон (Белгради Сербия) дар намуди муҳорибаи омехтаи ғайрикасбӣ қаҳрамони ҷаҳон гардид. Манижа аввалин бонуварзишгари тоҷик аст, ки аз ин намуди варзиш қаҳрамони ҷаҳон гардида, саҳифаи наверо дар таърихи варзиши Тоҷикистон рақам зад. Маҳз ин нишони тилло номи ӯро дар таърихи варзиши муҳорибаҳои омехтаи ғайрикасбӣ бо ҳарфҳои заррин дарҷ кард. Дар рӯзи Иди модар мо доир ба фаъолияти варзишии Манижа суҳбате оростем, ки фишурдаи онро манзури хонандагон мегардонем.

- Нахуст шуморо бо фарорасии Иди модар табрик менамоям.

- Ташаккури зиёд. Ман дар симои шумо кулли модарони рӯйи дунёро ба фарорасии идашон табрик гуфта, ба онҳо тани сиҳат ва хотири ҷамъ хоҳонам.

- Дар ин рӯзҳои баҳорӣ чӣ ҳолу ҳавое дореду баҳоратонро чӣ гуна оғоз кардед?

- Ҳолу ҳавои хубе дорам. Дар ин рӯзҳои баҳорӣ чун дар канори падару модарам ҳастам, бо онҳо натанҳо рӯзҳои баҳориям зебо мегузарад, балки ҳама рӯзам шоду беғам гузашта истодааст. Шукри буданашон, бо онҳо баҳор боз зеботар аст.

- Манижа ба ғайр аз варзиш боз чӣ ҳунар дорад?

- Ростӣ, ҳар рӯзи ман аз варзиши пагоҳирӯзӣ оғоз мегардад. Пас аз анҷоми тамрин ба корҳои хона машғул мешавам, яъне ба модарам каме ҳам бошад, кумак мекунам. Ғайр аз ин, ягон ҳунари иловагӣ надорам. Мутаассифона.

- Шумо либосҳои миллиро ба бар мекунед?

- Бале, либосҳои миллиро ба бар мекунам, аммо хело кам. Азбаски вақти зиёдам дар тамрин мегузарад, шояд аз ҳамин лиҳоз бошад, ки хело кам ба тан мекунам. Аммо дар умум дӯстдори либоси миллиам.

- Дар Чемпионати ҷаҳон, ки дар шаҳри Белгради Сербияшуда гузашт, ҳарифи пурқувват барои шумо кӣ буд?

- Ҳамаи ҳарифонам пурқувват буданду ман низ аз онҳо камӣ надоштам. Пеш аз мусобиқа тайёрии ҷиддӣ дида будам. Дар даври аввал муқобили размикори муғул нерусанҷӣ карда, ғолиб омадам. Дар даври дигар бо варзишгари мизбон аз кишвари Сербия рақобат намуда, ба даври нимниҳоӣ роҳ ёфтам ва дар он ҷо имкони медал гирифтан пайдо шуд. Дар як сабқати тӯлонӣ рақибамро шикаст дода, ба даври нимниҳоӣ баромадам. Боз дар даври нимниҳоӣ размкори дигари сербӣ рақиби ман шуд. Бо боварӣ ӯро шикаст дода, дар финал намояндаи Озарбойҷонро низ тавонистам, аз сари роҳам дур кунаму барандаи нишони тилло гардам.

- Қабл аз иштирок дар Чемпионати ҷаҳон дар Сербия дар намуди муҳорибаҳои омехта барои пирӯз шудан то чӣ андоза аз худ боварӣ доштед?

- Ман аз худ он қадар боварӣ надоштам, ки дар Чемпионати ҷаҳон сазовори ҷои аввал мешавам. Пас аз омодагиҳои тӯлонӣ моро дар пеш Чемпионати ҷаҳон дар кишвари Сербия мунтазир буд. Мо 3 духтар дар ин мусобиқа Тоҷикистонро намояндагӣ кардем. Ман дар вазни 65кг баромад кардам. Албатта, дар ин мусобиқаи бонуфуз маҳз роҳнамоиҳои устодам Рустам Зиёев буд, ки ман ба ин ҷода расидам. Барояш арзи сипос мегӯям.

- Манижа Самадова миёни ғолибон бо ба даст овардани нишони заррини мусобиқа аввалин тоҷикдухтар гардид, ки дар ин риштаи варзиш барои Тоҷикистон медали тилло ба даст овард. Ин ғолибият ба шумо чӣ ҳиссе дод?

- Ростӣ, ин ғолибият бароям як ҳисси хубе доду ҳеҷ гоҳ аз хотираам зудуда нахоҳад гашт. Ин муваффақият на танҳо ғолибияти ман, балки ғолибияти кулли мардуми Тоҷикистон аст. Ин чизро дар худ эҳсос кардам, ки ҳамватанони ман аз ин ғолибиятам сарфароз гаштанд. Ва ин ҳис беҳтарин ҳиссе буд, ки дар ҳаёти варзишиям таҷриба кардам.

- Варзиш дар ҳаёти рӯзмарраи шумо чӣ аҳамият дорад? Бароятон варзиш, яъне чӣ?

- Варзиш дар ҳаётам аҳамияти калон дорад. Варзиш мактаби ҳаёт аст. Ман чунон ба варзиш дил бохтаам, ки дигар зиндагиямро бе он тасаввур карда наметавонам. Барои ман варзиш ҳама чиз аст.

- Манижа чӣ гуна ба муҳорибаҳои омехтаи ғайрикасбӣ роҳ ёфт?

- Боварӣ ба худ маро ба ин самти варзиш овард. Пас аз бозгашт аз Узбекистон ва нишони тилло ба худ бештар бовар мекардагӣ шудам. Баъдан эҳтирому боварии падару модар ва аҳли дӯстону ҳамсинфонам. Ин муносибати гарми онҳо меҳри маро ба варзиш дучанд гардонид. Ҳамин буд, ки пас аз 4 соли тамрин дар риштаи кикбоксинг хостам дар дигар намуди варзиш низ худро бисанҷам. Ва ҳамин тавр ҳам шуд. Намуди варзиши муҳорибаҳои омехтаро интихоб намудам. Ва чи хеле, ки мебинед, муваффақ низ гаштам.

- Дар яке аз мусоҳибаҳоятон қайд кардед, ки ошиқи бозии тенниси рӯйи миз ҳастед. Пас чӣ шуд, ки рӯй овардед ба муҳорибаҳои омехтаи ғайрикасбӣ?

- Воқеан, дуруст қайд кардед. Ба ман то ҳол бозии тенниси рӯйи миз писанд аст. Дар вақтҳои холиям низ ба ин бозӣ машғул мешавам. Ҳатто устоди варзиши Тоҷикистон дар риштаи тенниси рӯйи миз ҳастам. Аммо хостам дар ин намуди варзиши душвор худро бисанҷам. Ба ҳамин хотир рӯй овардам ба муҳорибаҳои омехтаи ғайрикасбӣ. Лекин волидонам дар аввал зид баромаданд. Ин намуди варзишро ба ман лоиқ надонистанд. Модарам мегуфт, азоб мекашед ва ман таҳаммули инро надорам. Баъдан диданд, ки ман талош намуда истодаам, дуои хайрам доданд. Ва дуои хайри модарҷонам дар ин мусобиқа пушту паноҳи ман гардид.

- Барои шумо ҳамчун зан ин намуди варзиш мушкил нест?

- Фикр мекунам, ки ҳамаи намуди варзиш мушкил аст. Барои ман низ дар аввал мушкил буд. Вале бо мурури замон ба мушти рақибону сиёҳшавии таги чашмонам одат кардаам.

- Шудааст ҳолатҳое, ки шумо аз касби интихобнамудаатон пушаймон гардида бошед?

- Бале, ҳамон вақте пушаймон мешавам, ки дар вақти тамрин сахт осеб мебинам. Худ ба худ мегӯям, ки эй кош ин роҳро интихоб намекардам. Аммо вақте ки хуб мешудаму дар мусобиқаҳо дастболо мегардидам, фаромӯш мекардам. Ва боз ба тамринҳоям давом медодам. Вақте ки шаҳди ғолибиятро мечашӣ, дигар ҳамаи ранҷҳои кашидаат, фаромӯш мешудааст.

- Дар оянда чӣ нақшаҳо доред?

- Азм дорам, ки тамринҳоямро дучанд карда, имсол ба Донишкадаи тарбияи ҷисмонии Тоҷикистон ба номи С. Раҳимов дохил шавам. Баъди хатми донишкада мехоҳам ба ҳайси устод дар ин ришта фаъолият намоям.