Имрӯз, 17 апрел дар меҳмонхонаи “Ҳаятт Реҷенс”-и Душанбе, дар доираи бозиҳои гурӯҳии Ҷоми Конфедератсияи футболи Осиё (ҶФО)-2017, бо ширкати сармураббиёни дастаиҳои “Истиқлол”-и Тоҷикистон ва “Олой”-и Қирғизистон нишасти хабарӣ баргузор гардид.

Муҳсин Муҳаммадиев сармураббии дастаи “Истиқлол”-и Душанбе дар суҳбат бо рӯзноманигорон аз бозии фардо ва дар бораи тими рақиб чунин ибрози андеша намуд. “Имрӯз дар футбол ягон дастаи заиф дида намешавад. Дастаи рақиб пурқувват аст ва бо тайёрии ҷиддӣ омадаанд.Фардо барои мо ғалаба бисёр душвор мешавад, зеро дастаи “Олой” дар ду бозии гурӯҳӣ шикаст хӯрдааст. Аз ин лиҳоз мо бар муборизаи шадид омода мешавем. Мухлис дар майдон дувоздаҳум бозингар дониста мешавад ва нақши муҳимро мебозад. Мо умедворем, ки фардо мухлисон барои дастгирии мо ба варзишгоҳ меоянд ”.

Неъмат Қушоқов сармураббии дастаи “Олой”-и Қирғизистон”истиқлол”-ро тими пурқувват ҳисобида, иброз дошт: “Ман бо дастаи “Истиқлол” хуб ошно ҳастам, ин тими бисёр пурқувват аст. Зеро бисёри бозингарони рақиб шомили тими мунтахаби Тоҷикистон мебошанд. Фикр мекунам фардо бозии шадид мешавад ва мо танҳо барои ғалаба ба майдон мебароем”.

Ёдовар мешавем, ки бозии даври сеюми марҳилаи гурӯҳии Ҷоми КФО-2017 миёни дастаҳои «Истиқлол», қаҳрамони панҷкаратаи Тоҷикистон ва «Олой», қаҳрамони секаратаи Қирғизистон, 18 апрел дар Варзишгоҳи марказии Душанбе соати 19:00 оғоз мегардад.

Дар бозии дигари ин гурӯҳ “Дордой”-и Ӯш, ҷоизадори нуқраи қаҳрамонии Қирғизистон, дар майдони худ бо «Олтин Асир»-и Ашқобод, қаҳрамони Туркманистон, рақобат мекунад.

Шаҳбози АСОМИДДИН,"ҶТ"