Дар Маҷмааи ҳавзҳои шиноварии шаҳри Хуҷанд 3-юми сентябр маросими кушодашавии мусобиқаи байналмилалӣ оид ба шиноварӣ барои дарёфти Ҷоми Президенти Ҷумҳурии Тоҷикистон бахшида ба таҷлили 31 - солагии Истиқлоли давлатии Ҷумҳурии Тоҷикистон оғоз гардид.

Дар маросими мазкур Раҷаббой Аҳмадзода, раиси вилояти Суғд, намояндагони Вазорати корҳои дохилии Ҷумҳурии Тоҷикистон ва Федератсияи миллии шиноварии кишвар иштирок намуданд.

Раҷаббой Аҳмадзода, раиси вилояти Суғд зимни баромади хеш варзишгаронро ба ифтихори ҷашни бузурги миллӣ, 31 – солагии Истиқлоли давлатии Ҷумҳурии Тоҷикистон табрик намуда, қайд кард, ки давоми солҳои Истиқлол маҳз бо дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати рушди соҳаи варзиш ва дастгирии варзишгарон аз ҷониби давлату Ҳукумат иқдомҳои саривақтии муфид роҳандозӣ мешаванд.

Дар ин мусобиқаи байналмилалӣ беш аз 100 нафар варзишгар аз кишварҳои Русия, Узбекистон Тоҷикистон ва Беларус иштирок ва миёни ҳам рақобат карда истодаанд. Мусобиқаи мазкур то 6-уми сентябри соли равон давом ёфта, ғолибони он бо диплому медал ва туҳфаҳои хотиравӣ қадрдонӣ карда мешавад.