Бошукӯҳтарин марҳилаи варзишии сол - Фестивали бозиҳои миллии варзишӣ оғоз ёфт. Давраи фароғату истироҳат, шодию нишот, барқарорсозии солимии бадан, оммавияти варзиш, муаррифии бозиҳои мардуми тоҷик баҳри оламиён, эҳёи анъанаҳову варзиши гузаштагон дар “Соли рушди сайёҳӣ ва ҳунарҳои мардумӣ” фаро расид.

Мақсад: эҳё, рушд ва амалии бозиҳои миллии варзишӣ дар Ҷумҳурии Тоҷикистон, тарбияи насли наврас дар рӯҳияи эҳтиром ва арҷгузорӣ ба таърих, фарҳанг, расму оин ва анъанаву суннатҳои тоҷикона баҳри баланд бардоштани ҳисси худшиносиву худогоҳӣ таъриху анъанаҳои миллии аҷдодон, ҳамзамон таҳкими тарзи ҳаёти солим, ҳисси худшиносиву худогоҳӣ, зиракии сиёсӣ ва пешгирии омилҳои номатлуб дар байни насли наврас роҳандозӣ мегардад.

Вазифаҳо:
1.Муайян ва ҷамъоварӣ намудани маълумотномаи муфассал оид ба таърих ва тартиби баргузории Бозиҳои миллии варзишӣ вобаста ба минтақаҳо дар сатҳи маҳаллӣ, минтақавӣ ва миллӣ (ВМКБ, Суғду Хатлон, шаҳри Душанбе ва шаҳру ноҳияҳои тобеи марказ);

2.Омода намудани дастурамали корӣ барои истифодаи масъулини соҳаи тарбияи ҷисмонӣ ва варзиш вобаста ба таърих ва тартиби намудҳои миллии варзишӣ;

3.Тасдиқи номгўи бозиҳо барои ворид намудан ба Низомномаи бозиҳои миллии варзишӣ дар сатҳи маҳаллӣ, минтақавӣ ва миллии Фестивал;

4.Омода ва чопи маводҳои иттилоотӣ дар ВАО вобаста ба шиносоии мардум аз бозиҳои миллии варзишӣ, махсусан насли наврас ва ҷавонон ва таҳияи барномаҳои телевизионӣ аз ҷараёни эҳё ва тартиби баргузории онҳо;

5.Таҳияи нишон, суруди ягона, оҳанги мусиқӣ ва Ҷоми Фестивали бозиҳои миллии варзишӣ.

Фестивали бозиҳои миллии варзишӣ бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон роҳандозӣ шуда, зери роҳбарии президенти Федератсияи футболи Тоҷикистон, муҳтарам Рустами Эмомалӣ гузаронида мешавад. .

Дар фестивали мазкур наврасону ҷавонони аз 14 то 30 сола дар се марҳила: маҳаллӣ (қишлоқ, деҳа, ҷамоату деҳот ва шаҳру ноҳияҳо), минтақавӣ (вилоятӣ) ва миллӣ дар сатҳи ҷумҳуриявӣ дар остонаи таҷлили иди байналмилалии Наврӯз (марҳилаи якум), Ваҳдати миллӣ (марҳилаи дуюм) ва ҷашни Истиқлолияти давлатӣ (марҳилаи сеюм) иштирок карда метавонанд.

Бозиҳо бинобар хусиятҳои хоси минтақавӣ, расму оин ва анъанаву суннатҳо доштан аз рўи ду талабот баргузор мегарданд:
1. Бозиҳое, ки танҳо хоси як маҳал ё минтақа мебошанд, танҳо дар марҳилаи якум ва дуюм яъне маҳаллӣ ва минтақавӣ баргузор карда мешаванд;
2. Бозиҳое, ки хосият ва характери миллӣ дошта, новобаста аз хусусиятҳои хоси мардум истифода ё иҷро мегарданд, дар сатҳи миллӣ ё ҷумҳуриявӣ ташкил ва баргузор карда мешаванд.

Вақт ва рӯзҳои баргузорӣ:
1. Бозиҳои миллии варзишӣ дар сатҳи маҳал – аз 20 то 30 марти соли 2018;
2. Бозиҳои миллии варзишӣ дар сатҳи минтақавӣ – аз 20 то 30 июни соли 2018;
3.Бозиҳои миллии варзишӣ дар сатҳи ҷумҳуриявӣ аз 7 то 10 сентябри соли 2018

Тибқи нақшаи Фестивали бозиҳои мазкур, ки бо таҳлили коршиносон ва пешниҳоди мутахассисони соҳа тартиб дода шудааст, иштирокчиён аз аз рӯи 2 намуди бозиҳо: намудҳои сабқат, рақобати даставӣ ва намудҳои бозиҳои намоишӣ, ки бо чунин тартиб тақсимбандӣ шудааст дар Фестивал иштирок мекунанд.

Намудҳои миллии варзишие, ки аз рўи онҳо мусобиқаҳои даставӣ баргузор карда мешаванд:
Гӯштингирӣ ё гӯштин миллии суннатӣ;
Чавгонбозӣ;
Шиноварӣ;
Вазнабардорӣ (сангбардорӣ);
Дастхобонӣ;
Пойга (варзиши сабук, давидан ба масофаҳои 200,400,800 метр)
Шоҳмот;
Бандкашӣ;

Намудҳои миллии варзишие, ки ҳамчун намудҳои намоишӣ дар ҷараёни оғози Фестивали бозиҳои миллии варзишӣ ба маърази тамошои мардум гузошта мешаванд:
Хурусҷанг;
Чиликдангал;
Ланкабозӣ;
Биҷилбозӣ;
Камонварӣ;
Шамшерзанӣ;
Камолғулак;
Фалағмолпартоӣ;
Ҳойталак;
Бандпарак.

Баррасию баҳогузорӣ ва муайян намудани ғолибони бошукӯҳтарин чорабинии сол - Фестивали бозиҳои миллии варзишӣ ба души ҳайати Комиссияи салоҳиятдори тасдиқшудаи Кумитаи тадорукот буда, кори Комиссия ба таври ошкоро ва равшан сурат мегирад. Ба ҳар як иштирокчӣ барои ифоданок ва саҳеҳ иҷро намудани бозии миллӣ аз 1 то 5 хол дар ду самт, даставӣ ва шахсӣ баҳо дода мешавад.

Ғолибон ва иштирокчиёни фаъолро Ҷом, диплом, сипоснома ва туҳфаҳо интизор аст.

Марҳабо ба Фестивали бозиҳои миллии варзишӣ!