Баъди шашумин бор қаҳрамони Тоҷикистон шудани тими “Истиқлол” Ҷианни Инфантино, раиси Федератсиони байналмилалии футбол (FIFA), бо ирсоли як нома ба унвонии Рустами Эмомалӣ, раиси Федератсиони футболи Тоҷикистон, тими “Истиқлол”-и Душанберо барои ғалабаи пешакӣ дар чемпионати футболи Тоҷикистон-2017 табрик кардааст.

Тибқи иттилои дафтари матбуоти Федератсияи футболи Тоҷикистон, дар номаи табрикии Ҷианни Инфантино чунин омадааст: “Ман бо камоли майл бошгоҳи футболи “Истиқлол”-ро, ки барои бори шашум ва чаҳорумин бор паиҳам ба унвони қаҳрамонӣ даст ёфт, сидқан табрик мекунам. Ин унвон самараи заҳмати ҳамаи онҳоест, ки дар ин бошгоҳ пурсамар кор мекунанд, бинобар ин ман бозигарон, мураббиён, тамоми кормандони техникиву тиббӣ ва алоқамандони дастаро муборакбод мегӯям. Аз номи тамоми ҷомеаи футбол, ман мехоҳам ба бошгоҳи футболи “Истиқлол” ва Федератсиони футболи шумо барои кӯмак баҳри маъруфияти рисолати мусбати футбол миннатдории хешро баён созам”.

Аз ин пеш «Истиқлол» солҳои 2010, 2011, 2014, 2015 ва 2016 ба унвони қаҳрамони Тоҷикистон даст ёфтааст.

Дастаи «Истиқлол»-и Душанбе, ки 18-уми сентябр дар бозии даври нуздаҳуми мусобиқаи лигаи олӣ бар тими «Панҷшер»-и ноҳияи Ҷалолиддини Балхӣ бо ҳисоби 5:0 пирӯз шуд, пешакӣ ба унвони қаҳрамони Тоҷикистон даст ёфт.

Даспарварони Муҳсин Муҳаммадиев бо 42 имтиёз аз 16 бозӣ дар ҷадвали мусобиқа дар зинаи аввал қарор дорад ва сарфи назар аз натоиҷи панҷ бозии охиринаш барои рақибони худ дастнорас гардид. “Истиқлол” таҳти раҳбарии сармураббӣ Мӯҳсин Муҳаммадиев дар 13 бозӣ пирӯз шуда, 3 бозиро мусовӣ анҷом додааст.

Шодихони НАЗАР, "ҶТ"